Read Rongmei Naga LATZANPOUC NUNC 21 Bible Online

LATZANPOUC NUNC 21 - Rongmei Naga bible

LATZANPOUC NUNC 21

¹Isaraelmei guay tei Mizpa khou guang kariuna “Benjaminmei gaanv khat na now khang sini aniu nac ta tii lak ge” twna nthukmei latdyng RINGHPOUC khou sw the.

²Ntaw thu Isaraelmei tei Bethel khou guangna RINGHPOUC hu khou tingzyn nganvna dungcna bam the. Kaniw rui kap ranvna kumna latlu the:

³“He RINGHPOUC Isaraelmei Racguangc, mi kumhmei hei tabui swna tipatlou bam tu cho? Tabui swna Benjamin kaikhwang hei amaan kan nina bam tu cho?”

⁴Nthuanh lauthwan thwanzingh kaniw rui mi khou tei ravchabamv kasiamh thauna alamvpuatkat kat the khatni rawna khaeng the.

⁵Kumna kaniw rui sa the, “Isaraelmei nunc Mizpa khou RINGHPOUC mav khou guang kariumei khou tei guang kazauh makmei meicpang thow nai cho?” Mizpa khou guang makmei ta swluai puni twmei tuang nthukmei latdyng swlou khwan e.

⁶Isaraelmei rui kaniw tuang chana punav Benjaminmei khang tei kaniw lung kabiuna sa the, “Aseic hei Isaraelmei kakai kaikhwang akhat swmaan the.

⁷Kaniw theic nsaekcloumei gaanvsaekc now khang hei tabui khou rui tii nina cho? Aniu nac aluh nunc ta thu tii lak khe twna RINGHPOUC khou latdyng sw kan the.”

⁸Mizpa khou guang kaduai khou tei guang kazauh makmei kaikhwang nai bw ny twna kakhi thau ki Gilead khou bammei Jabesmei thu meic gaanv khat na sini kazauh mak bam khwan the.

⁹Rihmei nunc zanc kawmei ganv khou Jabesmei thu dawmei maek khe.

¹⁰Kumna guang bammei kang tei rui tancbauhmei rihphyan 12,000 ta thoucna sa the, “Nangniw tatna Jabesmei meic guayna ta ntumei khatni alauc nunc ta nganvna swluai tho.

¹¹Nggaanvmei guay ta khatni meicpui guay ta swluai ngam tho.”

¹²Jabesmei pang khou tunac liuchang 400 ariw the kumna Kanaan khou Shilo tuang zypui khou kaniw ta tei nduangh guang the.

¹³Kumlana kaniw rui Rimmon khow khou bammei nunc ta tei guang dat tho, rih maek khe twna kaw the.

¹⁴Benjaminmei nunc tei guang dat the kumna Jabes khou rui nym guangmei tunac nunc tei kaniw now khang tii the. Tiki kaniw khang tei meic ntangh mak khe.

¹⁵Meic nunc tei Benjaminmei khang mpeyna lungh kabiu the kalam thu RINGHPOUC rui Isaraelmei kaikhwang nunc tuang chwn chamhmei tei swbaklou the.

¹⁶Guang kariu bammei khou tei kapy sw bammei nunc rui sa the, “Benjaminmei ntumei nunc ta swluai ngamlou kanmei khou hei now thu ntangh makna bammei nunc khang tabui sw kho cho?

¹⁷Isaraelmei tuang kaikhwang 12 sing hei amaan nuh mak ge. Benjamin kaikhwang hei mut mak khang aniu sw nina de.

¹⁸Aniu nac aluh nunc ta thu tii nuh mak khe kalam thu Benjaminmei now khang tii tiimei ruc khou syang keylou kan diu twna salou kan the.”

¹⁹Khoutei kaniw rui sa the, RINGHPOUC tuang tingkwm ngai Shilo khou nai the, Shilo hei Bethel tuang dihpy Bethel khou rui Sekem tatmei chaengdai tuang neihpat biak khatni Lebonan tuang dihba biak khou nai e.

²⁰Kaniw rui Benjaminmei khou sa the, “nangniw drakhalau khou gutna nkamhna

²¹nchwan tho. Ngai khou tei alaamh khang Shilomei tunac nunc pat pwkhou nangniw drakhalau khou tei rui pat tho, kumna nangniw now khang gaanv khat gaanv khat ta nym tho kumna Benjamin ramv thangc phungc tat tho.

²²Kaniw puchaic nunc guangna sa pw e thei ‘Aniw rui aniw mei nunc now khang tiilou tho, kaniw ta suc-rih bamv khou rui nymmei tuang hamh e cho, nangniw rui ni tii pat tuang hamh e kum thena nangniw khou latdyng swbakmei tuang khuay maek ge twna kaniw khou sa puni.’ ”

²³Benjaminmei nunc rui hei tei kumcna sw the; Shilo khou alaamhmei pang khou rui kaniw now khang kadahna nduangh tat the. Kumna kaniw ramv thangc tatna kaniw tuang kaidai guay tei kasiamh thau dat lana lungc the.

²⁴Heikumna baih baihmei Isaraelmei guay tei kakai kakai thangc hanc dat ngam kan the.

²⁵Mi douc tei Isaraelmei khou guangh maek khwan e. Meic kathuicna kamei kamei rui ningmei swna lungc bam khwan e.