Read Rongmei Naga LATZANPOUC NUNC 3 Bible Online

LATZANPOUC NUNC 3 - Rongmei Naga bible

LATZANPOUC NUNC 3

¹Kumhpui zaeng rui, Kanaan kandic khou suc-rih bamv khou tatlou tow makmei Isaraelmei nunc ta nchanv khang RINGHPOUC rui mi kandic khou tei zaatc baihmei asaekc ta nsaekclou khwan e.

²Suc-rih bamv khou tatlou makmei Isaraelmei nunc khou suc-rih tat nchamlou khang kamei rui mi nunc ti hei loumei tuang e.

³Mi ganclou duhmei nunc kiu Philistinmei tuang kaidai panguh, Kanaanmei guay, Sidonmei, khatni Baal Hermon Chyng khou rui Hamat nganvmei kak khou Lebanon chyng khou lungc bammei Hivimei zaat hei nunc hei e.

⁴Mousi khou rui kaniw pupouc nunc khang Poubauhmei rui tii guangmei latdanv guay tei piu ny piu mak ny twmei zauh khang mi nunc ta tei loumei tuang e.

⁵Heikumna Isaraelmei tei Kanaanmei, Hittimei, Amormei, Perizimei, Hivimei khatni Jebusimei pang khou lungc kariu the.

⁶Kaniw mi nunc hei lev nowkaw nahlaa karyna kaniw tuang rav nunc ta ni kalum the.

⁷Isaraelmei tei RINGHPOUC, kaniw Racguangc ta amuc the; kumna Baal khatni Ashera tuang ravmaengc nunc ta kalumna Ravguangc ruc khou paapc taanc khwan the.

⁸Kumna RINGHPOUC Isaraelmei nunc ta lunghpuamcna kaniw ta Mesopotamiamei guangc Kushan Rishathaim baanc khou tiilou tina mi guangc tei rui kaniw ruc khou tingkwm tachat guangh twna sin the.

⁹Khoutei Isaraelmei rui RINGHPOUC khou kauc the, kumna kaniw ta tiduaklou khang meic gaanv khat thouc guang the. Mipu kiu Kaleb kainac Kenaz rui puanhmei Othniel e.

¹⁰RINGHPOUC tuang bumaengc kakhou keylou the, kumna kamei Isaraelmei tuang latzanpouc sw the. Othniel rihbamv khou tatna, RINGHPOUC paan rui kamei rui Mesopotamiamei guangc ta ngam the.

¹¹Kumna mi kandic khou hei tingkwm 40 nchu-nzaenghna lungc dat khwan e, kumna mi tangv tei Othniel tei theic the.

¹²Isaraelmei nunc tei RINGHPOUC ruc khou paapc taanc dat khwan the. Hei zaeng rui Moabmei guangc Eglon ta Isaraelmei khang suangc titanclou khwan e.

¹³Eglon tei Ammonmei khatni Amalekmei lev kariuna; Isaraelmei ta rih ngam the kumna tadanvbang kaidai Jeriko ta laa the.

¹⁴Isaraelmei tei Eglon bangc khou tingkwm 18 bamlou khwan e.

¹⁵Khoutei Isaraelmei rui RINGHPOUC khou kauc dat the, kumna kaniw ta tiduaklou khang meic gaanv khat thouc guang khwan e. Mipu kiu Benjamin kaikhwangmei Gera rui puanhmei mbaipouc Ehud the. Isaraelmei nunc rui kaipat kazauhna Ehud ta Moabmei guangc Eglon daeng khou thouc guang the.

¹⁶Ehud tei chowbuk akhat dou saenghmei kamun kaneimei baengsaeng akhat kasiamh lana hei tei kanaeng baanzat biak thangc pheybangc khou phungc the.

¹⁷Khoutei daicgaymeipu Eglon khang tei kaipat tei guang tii the.

¹⁸Mi kaipat tei tiilou lana kaipat phungc guangmei nunc ta tei kaniw kai tat dat khang thouclou kan the.

¹⁹Ehud tei Gilgal daeng khou naimei ravmaengh tauc pang naimei bamv khou tei rui ngalanc datna Eglon daeng khou guangna “He Guanghle, nang khang nkamhmei lat akhat nai e,” twna sa the. Kum tina guangh tei rui kamei guay ta tei thouc ganc ngamna karana bam khwan the.

²⁰Guangh tei kainam khou nchu nrimei kailungc khou karana dungc bam khou, Ehud rui kadaeng khou guangna sa the, “Ravguangc rui nang khang tii guangmei lat akhat nai e.” Khoutei guangh tei ding thau the.

²¹Khoutei Ehud tei kanaeng khou naimei baeng tei mbai biak rui sat patna guangh bung khou tei chum phuplou the.

²²Baeng kapwm tei kadaan kazauhna kathouh mphumhlou kan the, kumna kathav rui hei tei gumliam kan the. Hei tei kathei thangc chum alamv pat the. Mi baeng tei Ehud rui laa pat dat mak khe.

²³Khoutei Ehud tei kapaengc pat datna kainam kaikhamv tei phouh ta mbanghbinlou the khatni kaikhamv taanlou the.

²⁴Kamei rui tat kanmei tangv kabangc nunc tei guang dat the, kaniw rui kainam thangc kaikhamv taanloumei ta how pwkhou guang tei kailungc thangc zaengsw bam lana khwang e twna laalou the.

²⁵Kaniw tei nkhwan ni saanv nkhwan pwkhou kaikhamv tei laanc pat timakna, kaniw rui khamvtaan laana laanc pat the. Khoutei kaniw kaipouc tei theicna kandih khou zip bam khwan the.

²⁶Kaniw nkhwan bammei dak khou tei Ehud tei tat kan the. Kamei rui ravmaengc nunc tei tat kaan patna Seira thangc pak duak tat kan the.

²⁷Kamei rui Ephraim tuang chyngramv tei guang tangc pwkhou Isaraelmei nunc khang rihsaanvna bianggun amuan the. Kumna kamei rui Isaraelmei nunc ta nduanghna chyngramv thangc tei rui key the.

²⁸Kamei rui sa the, “Athei lay tho! Kalam thu RINGHPOUC rui nangniw ta zauczihmei Moabmei ta nangniw baanc khou tiilou the.” Kumna kaniw Ehud thei lay keyna Moabmei nunc rui Jordan kaan nimei chaeng kaanv tei key sin the; meic gaanv khat na sini pak duak mak khe.

²⁹Mi nungc tei kaniw rui Moabmei ricmei tanhmei meic 10,000 ta swluai the; meic gaanv khat na sini pak duak mak khe.

³⁰Mi nungc tei Isaraelmei rui Moabmei ta rih ngam the kumna mi kandic khou tei nchu-nzaenghna tingkwm 80 lungclou dat khwan e.

³¹Mi tangv tei latzanpouc swlou datmei rui Anat nac mpouh Shamgar khwan e. Kamei rui Philistinmei meic 600 ta guaih gaengh builwang rui swluaina Isaraelmei ta kanlou khwan e.