Read Rongmei Naga LATZANPOUC NUNC 4 Bible Online

LATZANPOUC NUNC 4 - Rongmei Naga bible

LATZANPOUC NUNC 4

¹Ehud theic kanmei tangv Isaraelmei RINGHPOUC ruc khou paapc taanc dat khwan e.

²Kumna RINGHPOUC rui kaniw ta Hazar kaidai sinmei Kanaanmei guangc Jabin baanc bangc khou tiilou khwan e. Katuang ricmei nunc kapy rui Haroset Haggoyim khou bammei Sisera khwan e.

³Jabin tei ntanh tuang takuanh gari 900 nai khwan e. Kamei rui Isaraelmei ta meic nzina swkasicna tingkwm 20 sin khwan e. Khoutei nkhavlou khang Isaraelmei rui RINGHPOUC khou kauc khwan e.

⁴Mi douc tei, Lappidot now Debora twmeipui muhzwng sw bam khwan e. Kamei Isaraelmei tuang latzanpeic ni sw bam khwan e.

⁵Kamei Ephraim tuang chyngramv khou Rama lev Bethel kak khou naimei tadanvbang bangc khou dungcna khou tei meic nunc rui latzan swlou khang guangna latzan sw raph rap bam khwan e.

⁶Zaeng neih khat thu kamei rui Naphtali ramv khou Kades kaidaimei Abinoam nac mpouh Barak ta kaw guangna kakhou sa the, “RINGHPOUC, Isaraelmei Racguangc rui kumna nang khang latdanv tii e: ‘Naphtali khatni Zebulun kaikhwang kanei khou rui meic 10,000 laana Tabor Chyng thangc nduanghna tat ro.

⁷Kumna nangniw lev Kishon duithuak daeng khou adow khang ai rui Jabin tuang ricpy Sisera ta thouc guang puni. Kamei rui rihmei pang khatni takuanh gari pang phungcna guang puni, tiki ai rui kata nang baanc khou tiilou puni.’ ”

⁸Khoutei Barak rui daw the, “Nang tat kazauh e thei ai tat puni, tiki nang tat mak ge thei thu ai ni tat mak ge.”

⁹Kamei rui daw the, “Gay the, ai ni tat puni the, tiki rih ngammei tei nang rui e tw pw lak khe, kalam thu RINGHPOUC rui Sisera ta ntumei baanc khou tiilou puni the.” Kumna Debora tei Barak lev Kades thangc tat khang kaamc thau the.

¹⁰Barak rui Naphtali lev Zebulun kaikhwang ta Kedes thangc tat khang kaw the, kumna meic 10,000 kathei laylou the. Debora ni kathei lay tat the.

¹¹Mi ganv khou tei Kenmeipu, Hobab kiktamei, Mousi maekpu kazanc Heber twna kawmeipu gaanv khat Kenmei pang khou rui tat pat lana Kedes daeng khou Zanannim twna kawmei bamv khou mphauhbang daihmei akhat daeng khou zypuikai swna bam khwan e.

¹²Barak tei Tabor chyng khou ku kan the twmei Sisera tei chu pwkhou

¹³kamei rui katuang ntanh gari 900 khatni kamei guay ta khuam kaduai lana Haroset Haggoyim khou rui Kishon duithuak khou thouc guang the.

¹⁴Khoutei Debora rui Barak khou sa the, “Tat tho! RINGHPOUC rui aseic tingmik hei Sisera ta nangniw baanc khou tiilou the. RINGHPOUC rui chaeng huna gut kan the.” Kumna Barak tei kamei 10,000 ta nduanghna Tabor Chyng khou rui tat key the.

¹⁵Barak rui karicmei nunc ta nduanghna adow gut pwkhou, RINGHPOUC rui Sisera khatni katuang takuanc gari guay khatni kamei nunc lung tei swtamangvlou the. Sisera tei katuang gari khou rui kachakc keyna kaphay rui pak kan the.

¹⁶Kumna Barak rui takuanh gari guay khatni rihmei nunc ta tei Haroset Haggoyim nganv alay tangc the, kumna Sisera tuang ricmei guay ta tei swluai ngam the. Meic gaanv khat na ta sini nsaekclou mak khe.

¹⁷Sisera tei Kenmei Heber now Jael tuang pheykai khou pak guang khwan e, kalam thu Hazormei guangc Jabin tei Heber kai lev giang sw khwan e.

¹⁸Jael tei Sisera ta pat ariwna kakhou sa the, “Kaipoucle, gut tho; kainung khou gut tho. Ping nangh e.” Kumna mipu tei pheykai kalungc khou gut the kumna kata phey rui daengc liamlou the.

¹⁹“Ai dui tari e, dui tiilou o,” twna kamei rui sa the. Mipui tei rui guaihgic khau khou rui guaih noudui laa patna tizangv the kumna kata tei nkamhlou dat the.

²⁰Khoutei Sisera rui mipui khou tei sa the, “Nang chaengmun khou dingna zauc o. Meic guangna ‘meic gut bu cho’ twna thanv pw e thei gut mak ge twna dawlou o.”

²¹Sisera tei ryanra langvna zipri tat kan the. Khoutei Jael rui tandiak lev pheykai muih tiangc akhat sin lana suaicna kadaeng khou guangna mi thing tei rui katalip khou rui kandih khou hian alamv phut keylouna swluai the.

²²Barak tei Sisera ta phu guang pwkhou Jael rui patna ariwna sa the, “Khou hei gut tho! Nang rui phu bammeipu ta tei nang khou lyanlou puni the.” Kumna kamei rui mipui thei tei lay gut pwki Sisera tei kapy khou thing tiangc hianlouna theiclou bammei ta ariw the.

²³Mi nungc tei Ravguangc rui Isaraelmei ta Kanaanmei guangc Jabin ruc khou rih tingamlou the.

²⁴Kaniw rui Jabin ruc khou ranv hay hay gutna kata swmutsutlou the.