Read Rongmei Naga LATZANPOUC NUNC 5 Bible Online

LATZANPOUC NUNC 5 - Rongmei Naga bible

LATZANPOUC NUNC 5

¹Mi nungc tei Debora khatni Abinoam nac mpouh Barak rui mi lu hei suan e.

²RINGHPOUC ta thuanc o! Isaraelmei kapy nunc rui rih tat thau pwkhou; meic nunc rui zawgayna tat pat khwan e.

³He guangh nunc, nking o! Chu lo, he dihsinpouc nunc! RINGHPOUC, Isarael Racguangc khou nkhuangh nrah sinna ai suan puni.

⁴He RINGHPOUC, Nang rui Seir tuang chyngbut guay khou rui tat pat pwkhou, Edom tuang ramv khou rui tat pat pwkhou, kandih rui kadunh khwan e, khatni tingpuk khou rui ting riu key khwan e. Ngguay, muangh khou rui dui bun key khwan e.

⁵Sinai RINGHPOUC hu khou chyngbut guay kadunh khwan e. Isaraelmei Racguangc RINGHPOUC hu khou.

⁶Anat nac mpouh Shamgar ganv khou, Jael ganv khou, guaikuan phungcna ngginmei nunc mi kandic tat ruan nthaekc khwan e, gin nunc tei nkicmei chaeng tat khwan e.

⁷Isaraelmei tuang namvdai guay ganc rymlou khwan e, Debora ai thau mak saanv, Isaraelmei tuang pui thau mak saanv.

⁸Kaniw rui rav baihmei ta laapui ganv khou kaidai tuang raengcmun khou rih guang the, Isaraelmei 40,000 pang khou tei buy-baeng khatni nggih how pw lakna cho?

⁹Alung thw tei Isaraelmei ricpy nunc khou bam khwan e, neihla neihlana zawgayloumei meic nunc khou tei. RINGHPOUC ta thuanc o.

¹⁰He kuanniam mphwanmei khou tuanghmei nunc, takuanh tuanghmei nunc, kaphay rui tatmei nunc, nangniw ni mi hei rac tat ro.

¹¹Duikhunc daeng khou meic kangdai kaduaina RINGHPOUC rui rih ngamloumei lam racna bammei, Isaraelmei nunc rui rih ngammei pary racna kachin-karo bammei tei nking o! Kumlana Ravguangc mei nunc tei kaidai raengckat guay khou tat key the.

¹²Thau tho, Thau tho, Debora! Thau tho, thau tho, suan thau tho! He Abinoam nac mpouh Barak nang rui rih nymguangmei guay tei zay pat tho!

¹³Khoutei lwmnuhmei nunc tei kapy nunc daeng khou guang the. Khoutei Ravguangc mei nunc tei rih bamv tat khang chamdaanvna kadaeng khou guang the.

¹⁴Kaniw tei Ephraim khou rui nzaengc khou key the, Benjamin kaikhwangmei nunc thei khou lwanna key the. Rihpy nunc Makir khou rui, meicdaihmei nunc Zebulun khou rui key the.

¹⁵Isakar tuang kapy nunc Debora lev key the, ngguay, Isakarmei khatni Barak key the. Kaniw Barak theilayna nzaengc khou key the. Tiki Reuben kaikhwangmei tei chamdaanv mak khe; tat nimei lat ding key ngam mak khe.

¹⁶Tabui swna kaniw lauziu pang khou bam duh tu cho? Lauziu gaenghmei nunc rui lauziu kawmei khwan nking nii na cho? Ngguay, Reuben kaikhwangmei chwn chamh mak khe; tat nimei lat ding key ngam mak khe.

¹⁷Gad kaikhwang tei Jordan neihpat biak thangc bam kan the, khatni Dan kaikhwang tei rungh pang khou bam kan the. Aser kaikhwangmei duipui daeng thangc bam kan the. Kaniw duipui tin thangc bam kan the.

¹⁸Tiki Zebulun khatni Naphtali kaikhwang na rui rih bamv khou gut the.

¹⁹Megiddo duithuak daeng khou, Taanak khou, guangh nunc guangna adow the; Kanaanmei guangc nunc adow the, tiki kaniw daandi laa tat kan mak ge.

²⁰Gaanchuangcna guay tingpuk thangc adow the; kaniw tingpuk khou tat patna Sisera ta adow the.

²¹Kishon duidai rui kaniw ta phungc tat kan the, luangc taek makmei Kishon duithuak rui, gut tho he adu lev pumtan kazauhna!

²²Khoutei takuanh pang kachuamhna guang the, kaniw tan kandih khou kadymna guang the.

²³RINGHPOUC tuang Baanchara rui sa the, “Meroz ta sianglou o,” “Mi khou tei bammei nunc ta sianglou o. Kaniw RINGHPOUC ta nkhav khang guang nii mak ge, kakhang adow khang guang mak ge.” kaniw tan kandih khou kadymna guang the.

²⁴Sangay liangmeipui kiu Heber now Kenmeipui Jael ne. pheykai khou lungcna kasan gay liangmeipui e.

²⁵Sisera rui dui ney tiki guaihnoudui tii the; bwangh gaymei khou guaihnoudui laaguang the.

²⁶Kabaanc akhat khou muih sin, kabiak akhat thangc taanvtaanhmei nunc tuang tandiak sinna, kamei rui Sisera py hian alamvphutlou the.

²⁷Kamei nkhungh nwat key kan the, bow keyna kaphay daeng khou zip bam the. Kaphay daeng khou nkhungh nwat keyna kandih khou theicna aliau bam the.

²⁸Sisera pui tei kailat khou rui zauc pat the, kalung thangc rui kamei rui kauc pat the, “Tabui swna katuang takuanh gari heidi guang nyan tu cho? Tabui swna katuang takuanc nunc heidi guang nyan tu cho?”

²⁹Ningtyngmeipui rui kakhou daw the, kamei rui karana kakhou sa the,

³⁰“Kaniw puat laa bam kan e, nzanh bam kan e, rihmei pumc sing tunac gaanv khat gaanv nei, Sisera khang phey gaymei, lyammavpui khang mun huiloumei phey.”

³¹He RINGHPOUC nang ta zauczihmei guay kumna theic kan diu, tiki nang ta nzianmei nunc mu neih kumc gaanc bam kan diu! Kumna mi kandic khou tei tingkwm 40 nchu-nzaenghna lungc dat khwan e.