Read Rongmei Naga LATZANPOUC NUNC 6 Bible Online

LATZANPOUC NUNC 6 - Rongmei Naga bible

LATZANPOUC NUNC 6

¹Isaraelmei rui RINGHPOUC ruc khou paapc taanc dat khwan the, kum tina RINGHPOUC rui Midianmei ta kaniw ruc khou tingkwm chanei tisin khwan e.

²Midianmei tei Isaraelmei suangc tanc timei zaeng rui, Isaraelmei nunc tei Khowlang khowlang khou khatni chyngramv dup nuhmei bamv asaekc khou dupna lungc bam khwan e.

³Isaraelmei rui phunling lingc key rap tithei Midianmei nunc tei Amalekmei khatni sypungramv khou bammei zaat nunc ta nduanghna guang adow raph rap bam khwan e.

⁴Mi kandic khou tei zypui guang sw lana dihba biak thangc Gaza daeng nganv kaniw tuang phunling sw kasic raph rap bam khwan e. Kaniw tei rui lauziu, guaih, kuanniam kaguayna khuam tat ngam ngamna bam khwan e.

⁵Kaniw tei kaniw tuang khouringh khounah khatni pheykai phungcna alunkav pang kumc guang raph rap khwan e. Kaniw khatni kaniw tuang guaikuan nunc tei kasing chak ngam thay lak khwan e. Kaniw rui mi kandic tei swkamut kamailou raph rap khwan e,

⁶Kumna Isaraelmei nunc tei kaniw ta sw kasic hakcloupui ganv khou tei nkhavlou khang RINGHPOUC khou kauc the.

⁷Midianmei zaeng rui RINGHPOUC khou nkhavlou khang kauhpui ganv khou tei

⁸RINGHPOUC rui kaniw khou muhzwng akhat ndiu guangna sa the, “Nangniw Izip khou bangh sw bammei khou rui ai rui nangniw ta phungc guangmei tuang e mi hei RINGHPOUC Isarael Racguangc rui sa tuang the.

⁹Ai rui nangniw ta Izipmei nunc baanc khou rui khatni mi kandic khou hei nangniw ta adowmei nunc baanc khou rui kanlou the. Ai rui kaniw ta nangniw hu khou rui alay ganclouna kaniw tuang kandic tei nangniw khang tii the.

¹⁰Ai hei RINGHPOUC nangniw Racguangc e, kumna ntaw nangniw lungc bammei kandic tuang dilungmei Amormei tuang rav nunc ta kalum nuh mak ge twna ai rui nangniw khou kadylou kanmei tuang e. Tiki nangniw alat piu mak khe.”

¹¹Khoutei RINGHPOUC tuang baanchara Ophra namv khou guangna Abiezer puinac mei Joas tuang mphauh bang akhat bangc khou dungc bam khwan e. Kanac mpouh Gideon kawmei gaanv khat Midianmei khou rui nkamhna drakhadui sunhmei bamv khou gehu dy nkamh bam khwan e.

¹²RINGHPOUC tuang baanchara akhat kakhou guangna sa the, “He tanc bauhmeipu, RINGHPOUC rui nang ta nduanghlou bam e!”

¹³Gideon rui kakhou sa the, “Kaipoucle, RINGHPOUC rui aniw ta nduanghlou bam e thei tabui swna mi guay heikumna pat bam tu cho? RINGHPOUC kamei rui charynmei taanv taanclouna Izip khou rui aniw pupouc nunc ta phungc patlou khwan e twna rac bammei tei thu akumhmei tuang cho? Kum e tiki ntaw thu RINGHPOUC rui aniw ta mpatlouna Midianmei baanc khou tiilou the.”

¹⁴Khoutei RINGHPOUC rui latdanv swna sa the, “Nang tuang pumtan kaguay tiipatna tat tho kumna Isaraelmei ta Midianmei khou rui kanlou tho. Ai kahak rui nang ta thouhmei tuang the.”

¹⁵Gideon rui daw the, “He Poubauhmei akumhna ai rui Isaraelmei ta kanlou ngam nina cho? Akai puinacmei hei Manase kaikhwang khou nsuan liangmei de. Ai hei akai khou ni nthyam liangmei de.”

¹⁶RINGHPOUC rui daw the, “Nang ngam puni, kalam thu ai rui nkhavlou puni. Nang rui Midianmei ta meic gaanv khat na ta kumcna chiw nana niakpiaklou puni.”

¹⁷Gideon rui daw the, “Nuh e thei thu, nang hei RINGHPOUC changh e twmei tuang lyanloumei akhat tiilou o.

¹⁸Ai rui taektw puatkat phungc guangna katlou mak saanv tatlou dat rio.” Kamei rui sa the, “Nang guang mak saanv nkhwan puni the.”

¹⁹Gideon kakai thangc tat lana ziuhnac akhat zanc suangc lana ntyan buay kaduk ruh rui khay lou makmei ntyan kasiamh the. Zanhbangv tei nggiuh khou khatni gandui tei lai khou louna hei tei nphauh bang bangc khou tei RINGHPOUC tuang baanchara khang tei phungc guangna tii the.

²⁰Baanchara tei rui kakhou latdanv tii the, “Mi zanc khatni ntyan tei mi tauc ruc khou hei lou tho, kumna gandui tei karuc khou bunlou tho.” Gideon rui hei tei swlou the.

²¹Khoutei RINGHPOUC tuang baanchara tei kamei rui sin bammei builwang tei kari patna mi twan tei rui zanh khatni ntyan tei kahi the. Khoutei ntauh khou tei rui mai patna zanh lev ntyan tei raw kan the. Mi tangv tei baanchara tei amaan kan the.

²²Gideon kamei rui howmei tei RINGHPOUC tuang baanchara the twmei kamei thay the, kumna kamei pingna kumna sa the, “He Kauh Liangmeipu RINGHPOUC, ai rui nang tuang baanchara ta zaw lev zaw puanc adyangna how dyng the!”

²³Tiki RINGHPOUC rui kakhou sa the, “Lunghgeih riu! Ping riu! Nang theic ni tuang hamh e.”

²⁴Gideon rui khou tei RINGHPOUC khang ravchabamv akhat kasiamh thauna mi zanc tei “RINGHPOUC hei nchu-nzaenghmei e,” twna phuaklou the. (Hei tei Abiezer puinacmei tuang Ophra khou ntaw ni nai bam e.)

²⁵Mi nungc zingbangc tei RINGHPOUC rui Gideon khou sa the, “Nang pu tuang guaituamchic akhat khatni tingkwm chaneimei guaituamchic akhat twna laa tho. Kumlana nang pu tuang Baal ravchabamv tei swra tho, kumna mi ravchabamv daeng khou naimei Ashera tuang racmaengc tei gaibau key tho.

²⁶Kumna mi chingc twan khou hei RINGHPOUC nang tuang Racguangc khang ravchabamv kasiamh chuyna kasiamh tho. Kumna kaneimei guaituamchic tei laana mi kapwm tei rawna khaeng o. Nang rui dowbau keymei Ashera tuang racmaengc tei rui thing swna ntei o.”

²⁷Gideon rui kabangc gaanv ruh ta nduanghna RINGHPOUC rui kakhou samei tei kamei taanc the. Kamei rui hei tei kalaanv taanh khang kakai khatni mi kaidaimei guay ta ping lana, kamei rui hei tei zingbangc taanc the.

²⁸Nthuanh tinggaanc pat pwkhou Baal tuang ravchabamv khatni Ashera tuang racmaengc tei swkasiclouna mi khou tei ravchabamv kathanc swlou datna kaneimei guaituamchic tei khaenglou bammei ta mi kaidaimei nunc tei rui how khwan the.

²⁹“Hei tei thow rui swlou tuang cho?” twna kaniw khat khat khou thanv the. Kaniw rui phu guang pwki hei tei Joas nac mpouh Gideon rui the twmei thay pat the.

³⁰Khoutei kaniw rui Joas khou sa the, “Nang nac tei mi khou hei nduangh guang tho, kata swluai puni the! kamei rui Baal tuang ravchabamv sw kasic the khatni mi daeng khou naimei Ashera tuang maengc dowbau the.”

³¹Khoutei Joas rui zauczihmei nunc khou tei sa the, “Nangniw Baal khang ding bam tu cho? Nangniw Baal ta gaek khang sw bam tu cho? Kumna sw bammei guay ta tei tinggaanh makmei mav khou swluai ngam puni. Baal hei rav e thei kara na kata gaek kan diu. Sw kasic kanmei tei katuang ravchabamv de cho.”

³²Mi khou tei rui thauna Gideon zanc tei Jerubbaal twna kaw kan the, kalam thu Joas rui sa the, “Baal kiu karana kata gaek kan diu; sw kasic kanmei tei katuang ravchabamv de.”

³³Khoutei Midianmei, Amalekmei khatni sypungramv khou lungc bammei nunc guang kariuna Jordan duithuak kaan pat the kumna Jezreel nzaengc khou zypui swna bam the.

³⁴Ravguangc tuang bumaengc rui Gideon ta sin the, kumna Abiezer puinacmei guay kathei lay khang bianggun amuan the.

³⁵Manase tuang ramv kanei khou bammei meic guayna kathei lay khang meic kabai khang thouclou kan the. Aser, Zebulun, khatni Naphtali kaikhwangmei nunc khou rui ni meic kabai khang thouclou kan the kumna kaniw rui ni laylou the.

³⁶Khoutei Gideon rui Ravguangc khou sa the, “Isaraelmei ta kanlou khang ata sinsw ni the twna nang dinglou the twna nang rui sa kan the.

³⁷Gay the, aniw tuang gehu dymei bamv khou tei kandih khou ramh hiw ganclou puni the. Kumna laukhwan thau pwkhou kandih khou zikdui maekna ramh hiw khou na tei nai bam khwan e thei Isaraelmei ta kanlou khang nang rui ata sinsw puni the twmei ai thay puni the.”

³⁸Hei tei kumcna pat khwan the. Gideon tei lauthwan thwanzingh zip thauna ramh hiw tei sunc pwki dui tamkuak akhat sunc padik pat the.

³⁹Khoutei Gideon rui Ravguangc khou sa the, “Ata lunghpuamhlou rio ramh lam akhat na kha sa dat ni he. Mi ramh hiw tei rui ramhkhat masi dat ni he. Ntaw thu kandih tei timcna ramh hiw tei tiphuilou o.”

⁴⁰Mi nungc zingbangc tei Ravguangc rui hei tei kumcna swlou the. Nthuanh thau pwki ramh hiw tei phuina kandih tei timc bam khwan the.