Read Rongmei Naga LATZANPOUC NUNC 7 Bible Online

LATZANPOUC NUNC 7 - Rongmei Naga bible

LATZANPOUC NUNC 7

¹Zaeng neih khat Gideon khatni kamei nunc lauthwan thwanzingh thau lana Harod tuang duipuakkai daeng khou zypui kasiamh the. Midianmei tuang zypui rui kaniw bamv khou rui dihpy biak thangc naimei nzaengc khou More Chyng daeng khou nai bam khwan e.

²Khoutei RINGHPOUC rui Gideon khou sa the, “Midianmei ta nang baanc khou tiilou khang nang tuang mei geic langv e. Kaniw pumtan rui ngammei tuang e, ai rui hamh e twna kaniw ning puni.

³‘Thow thow pwni pingmei guay tei Gilead Chyng hei mpatlouna kakai kakai thangc hanc dat tho’ twna meic nunc khou tei sa ti tho.” Kumna meic gaanv 22,000 thu hanc dat kan the, meic 10,000 bam duc the.

⁴Khoutei RINGHPOUC rui Gideon khou sa e, “Mi hei ni meic geic langv di he. Kaniw ta tei duithuak thangc nduangh key tho, kumna ai rui kaniw ta nang khang kadahlou puni the. Ai rui tat ro twpui mei tei tat nina e, tat riu twpui mei tei tat lak nina e.”

⁵Gideon rui meic nunc ta tei duithuak khou nduangh key the, hei khou tei RINGHPOUC rui sa the, “Dui tei kabaley rui si kumcna zangvmei khou tei rui tangkhungh keyna zangvmei ta kalangv kalangv kadah pat tho.”

⁶Kaniw baanc rui dui suak thauna aliakcna zangvmei meic 300 na khwan the; baihmei guay tei thu tangkhungh keyna zangvmei rana khwan the.

⁷RINGHPOUC rui Gideon khou sa the, “Mi kabaanc rui suak thauna zangvmei 300 hei rui nangniw ta kanlou puni the khatni Midianmei ta rih ngam puni the. Baihmei guay tei thu kakai kakai tat dat tho twna sa ti tho.”

⁸Kumna Gideon rui baihmei guay tei kakai kakai thangc thouclou dat ngam kan the, kumna bam duhmei 300 rui puktaek khatni bianggun guay tei laalou the. Kumna Midianmei tuang zypui tei nzaengc khou kaniw bammei bangc khou bam khwan e.

⁹Mi nungc zingbangc tei RINGHPOUC rui Gideon khou kumna latdanv tii the, “Thau tho, kumna mi nunc ta tei adow tho; ai rui kaniw ta nang baanc khou tiilou kan the.

¹⁰Nang adow khang ping e thei, nang bangc Pura ta nduanghna kaniw tuang zypui thangc tei key zauh tho.

¹¹Kaniw rui sa bammei tei nang chu pwkhou nang adow diwmei lungning pat puni.” Kumna Gideon tei kabangc Pura ta nduanghna zauczihmei tuang zypui daeng khou tei key the.

¹²Midianmei, Amalekmei, khatni sypungramv khou lunghmei nunc tei mi nzaengc khou tei alunkav pang kumc bam khwan the, khatni kaniw tuang guaikuan pang ni duipui syniang zu bam khwan the.

¹³Gideon tei mi khou tei guang pwki meic gaanv khat pu kapammei gaanv khat khou kamang racna bam khwan the. Mipu tei rui kumna sa the, “Amang thangc kiu sipian ntyan dwm akhat aniu tuang zypui khou kahuy guangna pheykai akhat ta guangna diangc the. Mi pheykai tei kandih khou bow nkhungh parup keylou bam khwan the.”

¹⁴Kapammeipu tei rui daw the, “Hei tei Isaraelmei tuang baengsaeng the, Joas nac mpouh Gideon the! Hei tei kabah baihmei maek ge. Ravguangc rui Midianmei khatni aniu tuang ricmei kapwm ta kabaanc khou tiilou kan the.”

¹⁵Gideon rui mipu tuang mang khatni mi tuang kabac tei chu pwkhou, khuksun keyna Ravguangc ta kalum the. Kumna kamei Isaraelmei tuang zypui thangc tei tatna sa the, “Thau tho! RINGHPOUC rui Midianmei ricmei nunc ta aniu baanc khou tiilou the!”

¹⁶Kamei rui katuang ricmei 300 ta tei kalangv kathumh khang nzanhlouna meic kathuic khou tei bianggun akhat akhat khatni kalungc khou mairam loumei laibung akhat akhat nsinlou the.

¹⁷Kamei rui kaniw khou sa the, “Ai rui kaniw tuang zypuikai daeng khou guangmei ta tei zauc chuyna zauc o, kumna ai rui taanhmei tei taanc o.

¹⁸Ai khatni akangmei rui aniw tuang bianggun amuan pw e thei nangniw ni nangniw tuang tei amuanna ‘RINGHPOUC khang khatni Gideon khang!’ twna kabamv kathuic khou rui kauc lik sikh sikna kauc tho.”

¹⁹Zipchwng key zaic ni khou, rigaanv ding kalaic rap twmei tangv Gideon rui kamei meic 100 ta nduanghna Midianmei tuang zypui daeng khou guang the. Khoutei kaniw tuang bianggun amuan the khatni kaniw sin bammei laibung guay tei swbak the.

²⁰Baihmei kang kanei tei rui ni hei tei kumcna sw the. Kaniw kaguay baandau thangc mairam khatni baanzat thangc bianggun sinna “RINGHPOUC khang khatni Gideon khang baengsaeng!” twna kauc the.

²¹Meic kathuicna tei kabamv kabamv khou dingna zypui tei ding nkuay the, kumna zauczihmei rihmei kapwm tei khwan ranvna kaucna pak kan the.

²²Gideon tuang ricmei nunc rui kaniw tuang bianggun amuanna bam khou, RINGHPOUC rui zauczihmei nunc ta kaniw nchamc khat khat ta ti-adow the. Kaniw tei Zerethan biak thangc Beth Shitta nganv, Tabbat daeng khou naimei Abel Mehola kaidai nganv pak tangc kan the.

²³Naphtali, Aser khatni Manase kalangv kanei kaikhwang nunc tuang riphyan guay patna Midianmei nunc ta tei nthau the.

²⁴Ephraim tuang chyngramv kapwm khou Gideon rui meic thouclouna kumna sa the, “Keyna Midianmei ta adow tho. Jordan duithuak tei Bethbara nganv dingbin tho, Midianmei ta tei tikaan pat nuh mak ge.” Ephraimmei guay ta kaw guang kaduaina Jordan duithuak khatni duibaek tei Bethabra nganv dingbin the.

²⁵Kaniw rui Midianmei guangc kanei Oreb lev Zeeb ta nym the, kumna Oreb ta Oreb taudaic khou khatni Zeeb ta Zeeb tuang drakhadui sunhmei bamv khou swluai the. Kaniw rui Midianmei ta alay keyna Jordan tuang neihpat khou bammei Gideon khou Oreb lev Zeeb tuang py phungc guang the.