Read Rongmei Naga LATZANPOUC NUNC 8 Bible Online

LATZANPOUC NUNC 8 - Rongmei Naga bible

LATZANPOUC NUNC 8

¹Khoutei Ephraimmei nunc rui Gideon khou sa the, “Midianmei ta adow khang tat ni khou tabui swna aniw ta kaw mak tu cho? Tabui swna aniw ta kumna sw bam tu cho?” Kumna kaniw neihla makmei lat tei ranv sihna sa the.

²Khoutei kamei rui daw the, “Nangniw rui taancloumei taanv tei ataanv lev twna kida pwkhou ataanv thu ramhkhat na sini hamh e. Ephraimmei suanmei nac akhat rui taancloumei tei akai puinacmei kapwm rui taancloumei lev nchamcmei tuang de.

³Ravguangc rui nkhavloumei paan rui nangniw rui Midianmei kapy gaanv nei Oreb lev Zeeb ta swluai kan the. Ai rui taancloumei thu hei tei lev kida khang ramhkhat sini maek dyng e cho?” Kamei rui hei tei salou pwkhou kaniw lungpuam nchu key dat the.

⁴Mi ganv khou tei Gideon tei kamei meic 300 tei lev twna Jordan duithuak khou keyna dui kaan pat the. Kaniw tei lak the tiki zauczihmei nunc ta tei suic nthaekc makna suic key the.

⁵Kaniw tei Sukkot guang tangc pwkhou mi kaidaimei nunc khoutei kamei rui sa the, “Amei nunc khang hei ntyan tiilou o. Kaniw ryanra the, ai hei Midianmei guangc Zeba lev Zalmunna ta suic tat bammei tuang e.”

⁶Khoutei Sukkotmei kapy nunc rui daw the, “Nang rui Zeba lev Zalmunna ta ngam mak he ki tabui zaeng rui aniw nangniw tuang ricmei nunc ta titu bam nina cho?”

⁷Khoutei Gideon rui sa the, “Gay the! Zeba lev Zalmunna ta RINGHPOUC rui abaanc khou tiilou pwkhou tazikramv tuang sauhraengc rui nangniw ta kathamv puni the!”

⁸Gideon tei Penuel kaidai thangc tatna kaniw khou tei hei tei kumcna ney pwkhou Penuelmei ni Sukkotmei rui samei kahak tei sa daw the.

⁹Kum tina kamei rui kaniw khou sa the, “Ai rih ngamna guang dat pwkhou kiu nangniw tuang rihgaekkai tei swra key puni the.”

¹⁰Zeba lev Zalmunna tei kaney tuang ricmei nunc ta nduanghna Karkor khou bam khwan the. Tazikramv khou lungc bammei nunc tuang ricmei 120,000 ta swluai kan the; kumna ganclou duhmei 15,000 na di the.

¹¹Gideon rui Noba lev Jokbeha kaney tuang neihpat biak khou naimei chaeng khou nganghna mi ricmei nunc ta tei kaniw thay makna bam khou adow the.

¹²Midianmei guangc nei Zeba khatni Zalmunna tei pak kan the, tiki kamei rui nthauna kaney ta nym the, kumna kaney tuang ricmei kapwm ta tiping kadunhlou the.

¹³Gideon tei rih tei luai lana Heres chaeng hanc guang dat khwan the,

¹⁴Kumna chaeng khou Sukkotmei chabwan gaanv khat ta nymna kakhou lat thanv the. Mi chabwan tei rui Sukkotmei kapy swmei meic 77 zanc hylou the.

¹⁵Khoutei Gideon rui Sukkotmei nunc khou tei guangna sa the, “Zeba khatni Zalmunna kaney ta rih ngam guang mak he ki tabui zaeng rui aniw nangniw ricmei nunc khang taektw tii nina cho” twna matevna sakanmei tei mi khou hei bam the chy.

¹⁶Kumlana kamei rui sypungramv tuang sauh bang laana Sukkotmei kapy nunc ta dandi tii the.

¹⁷Kamei rui Penuel tuang rihgaekkai tei swra key the kumna mi kaidaimei nunc ta tei swluai the.

¹⁸Mi tangv tei Gideon rui Zeba lev Zalmunna khou “Nangney rui Tabor khou swluai kanmei tei tabui kumhmei nunc cho?” twna thanv the. “Kaniw tei nang ta luic e kaniw tei guangh nac nunc kumc e,” twna daw the.

¹⁹Gideon rui sa the, “Kaniw tei achana nunc the, pui akhat na nac nunc the. Ai rui mi hei latdyng swna samei tuang e twmei thu nangniw rui kaniw ta swluai mak ge thei ai rui ni nangniw ta swluai lak ni tuang e.”

²⁰Khoutei kamei rui kanac mpouh gaanvthaih liangmeipu Jether khou “Kaniw ta dowluai tho!” twna sa the. Tiki mipu tei katuang baengsaeng satpat khang rouhna sat pat mak khe, kalam thu kamei alauc na khwan e.

²¹Khoutei Zeba khatni Zalmunna rui Gideon khou sa the, “Nang kahak rui guangna dow o. Nggaanvmei taanv thu nggaanvmei rui taanhmei tuang de.” Kumna Gideon rui kaney ta swluaina kaney tuang guaikuan guang khou nleiloumei karuhpwan guay tei laa the.

²²Mi tangv tei Isaraelmei rui Gideon khou sa the, “Nang rui aniw tuang dihsinpouc sw tho nang tou nang tak nang nac nunc rui ni sw tho. Nang rui aniw ta Midianmei khou rui kanloumei tuang dyng the.”

²³Gideon rui daw the, “Ai nangniw tuang dihsinpouc sw lak ge, anac rui ni sw lak ge. RINGHPOUC rui nangniw tuang kaipouc sw puni.

²⁴Tiki ai rui nangniw khou ramh akhat ney nii e. Mi kiu thu nangniw rui laa kanmei tadip guay tei akhang tiio.” (Midianmei tei baihmei sypungramv khou lunghmei nunc kumcna kachaekc tuang tadip mwn khwan e.)

²⁵Meic nunc tei rui daw the, “Aniw rui hei tei neihla neihlana tii puni.” Kaniw rui phey bamc keylouna kaniw meic kathuicna kamei kamei rui laaloumei tadip tei mi khou tei lou key the.

²⁶Kaniw rui tii guangmei tadip guay tei kilogram 20 dou nrit re, hei tei ntuh-ntah, Midianmei guangc nunc tuang haengc nrymmei phey guay khatni kaniw tuang guaikuan nunc guang khou nleiloumei tuang guay tei thu kazauh mak ge.

²⁷Gideon rui mi kachaekc tei rui Ephod kasiamh lana katuang kaidai Ophra khou lou the. Isaraelmei guay rui Ravguangc ta mpatlouna mi khou tei guangna ravmaengc kalum the. Hei tei Gideon khatni kakai kaikhunc khang phaysuypui bamv sw the.

²⁸Heikumna Isaraelmei rui Midianmei ta ngam the, kumna kaniw py khuang thau dat mak khe. Gideon theih mak saanv mi kandic khou tei tingkwm 40 nchu nrina lungc bam khwan e.

²⁹Gideon kakai thangc hanc guang datna lungc dat the.

³⁰Kamei kanow geic lana kanac mpouh 70 nai e.

³¹Sekem khou ni laamvnow akhat nai e; mipui tei rui ni mpouh gaanv khat puanclouna kazanc Abimelek twna phuaklou the.

³²Joas nac mpouh Gideon tei gaanvsuh gaanvthaih lungc tangcna theic the. Kumna Abiezer puinacmei tuang kaidai Ophra khou kapu Joas tuang tarou khou mbeihlou kan the.

³³Gideon theic kanmei tangv Isaraelmei nunc tei Ravguangc ta mpatlouna Baal rav ta kalum tat dat kan the. Kaniw rui latdyng tuang Baal ta kaniw tuang rav tiswlouna

³⁴kaniw daeng khou lungc nkuay bammei zauczihmei nunc khou rui kaniw ta kanloumeipu RINGHPOUC kaniw Racguangc ta kalum taan the.

³⁵Isaraelmei nunc khang heizu taancloumei guay khang tei Isaraelmei rui Gideon kai kaikhunc huath chaklou mak ge.