Read Rongmei Naga LATZANPOUC NUNC 9 Bible Online

LATZANPOUC NUNC 9 - Rongmei Naga bible

LATZANPOUC NUNC 9

¹Gideon nac mpouh Abimelek tei Sekem thangc kapui puningc nunc daeng thangc tatna

²Sekemmei nunc khou kumna thanv o twna kaniw khou kumna sa the, “Nangniw ta Gideon nac mpouh gaanv 70 tei rui sinmei rui gay ny meic gaanv khat na rui sinmei gay cho? Abimelek hei nangniw zeibangv, zancbangv e twmei ningtowlou o.”

³Kapui puningc nunc rui mi lam tei Sekemmei nunc khou sa pwkhou kaniw rui Abimelek thei lay ni the twna ding the kalam thu kaniw rui kumna sa khwan e, “Kamei hei aniu chana di the.”

⁴Sekemmei nunc rui Baal Isaraelmei khou rui daandi paek 70 laapatna kakhang tii the, kumna mi syan tei rui kheiliak simei nunc ta niak the kumna kathei lay the.

⁵Kamei Ophra khou kapu kai khou guang datna, ntauh akhat na ruc khou Gideon rui puanhmei kachana gaanv 70 ta tei dowluai the. Tiki Gideon nac alauc liangmei Jotham ta tei thu nkamh kan tina dowluai mak khe.

⁶Mi tangv tei Sekem khatni Bethmillo kaidaimei guay tei guang kariuna Sekem tuang nthanmei Mphauhbang bangc khou tei tatna, mi khou tei Abimelek ta guangh suanglou the.

⁷Jotham tei mi chamv tei chu pwkhou Gerizim Chyng ruc khou ku lana kaniw khou kumna kauc the, “He Sekemmei nunc, ai rui samei hei nking o, nangniw rui samei tei Ravguangc rui nkinglou diu!

⁸Kaganv akhat khou thingbang guay kaniw khang guangh kadah khang guang kaduai the. Olive bang ta ‘Nang aniw guangc sw tho’ twna sa the.

⁹‘Ai hei nangniw tuang guangc sw e thei thu maansei khatni rav ta chakhwang champouhmei taanv khou sinsw bammei Olive thauc tei ai rui tiipat nthaekc puni the’ twna Olive bang rui daw the.

¹⁰Khoutei kaniw rui tadut bang ta ‘Nang aniw tuang guangc guang sw tho’ twna sa the.

¹¹Tadut bang tei rui ni ‘Ai nangniw tuang guangc sw e thei atuang ndeihmei thai tei nthai taan puni the’ twna daw the.

¹²Khoutei drakhaluai khou ‘Nang guangna aniw tuang guangc sw tho’ twna sa the.

¹³Tiki drakhaluai rui ‘Ai nangniw tuang guangc sw e thei rav ta ni maansei ta ni tineihlalou bammei drakha thai hei nthai taan puni the,’ twna sa the.

¹⁴Kum tina thingbang guay tei rui sauh bang khou ‘Nang guangna aniw tuang guangc sw tho’ twna sa the.

¹⁵Sauh bang tei rui daw the, ‘nangniw ata nangniw tuang guangc khang kahaw changh e thei thu nangniw alym bangc khou guang duplou tho. Kum mak ge thei atuang saucraengc chy khou rui mai patna Lebanon tuang sidar bang guay tei raw mutlou puni the.’

¹⁶“Kum e tw e thei nangniw rui Abimelek ta guangh tiswloumei hei lungning nthan changhna tiswlou dai cho? Nangniw rui Gideon ta ningtowna chakhwang sw bam dai cho khatni kataanv khang tei biuhmei taanv kakai kaikhunc khang taanclou bam dai cho?

¹⁷Apu rui katuang panty amaanmei khang ping makna nangniw khang rui Midianmei ta adow kanmei tei ningtow o.

¹⁸Tiki aseic hei nangniw apu kai kaikhunc ta zauczihmei tuang taanv taanc dat the. Gideon bangcpui nac Abimelek ta nangniw riangluaic e twmei zaeng rui, nangniw rui kanac mpouh gaanv 70 ta ntauh akhat na ruc khou swluai ngamparyna nangniw rui kata Sekemmei guangc tiswlou the.

¹⁹Kumhpui zaeng rui aseic hei nangniw rui Gideon khatni kakai kaikhunc khou swloumei hei nchumhmei tuang swlou nimei thouc de tw e thei nangniw Abimelek lev neihlana bam tho, kamei ni nangniw lev neihlana bam kan di tho.

²⁰Hei kumh mak ge thei thu, Abimelek khou rui mai thau lana Sekem khatni Bethmillo kaidaimei nunc ta raw mut kan diu tho. Sekem khatni Bethmillomei nunc khou rui mai thauna Abimelek ta raw mut kan di tho.”

²¹Kumlou lana, Jotham tei Abimelek ta pingna Beer kaidai thangc pak tat kan the.

²²Abimelek tei Isaraelmei ruc khou tingkwm kathumh guangh tulou khwan e.

²³Mi tangv tei Abimelek lev Sekemmei kak khou Ravguangc rui tizauczihlouna Sekemmei nunc rui kata laa zih thau the.

²⁴Abimelek khatni Gideon nac mpouh gaanv 70 ta swluai khang katiuloumei Sekemmei ta mi tuang khwm tei khangh khang mi hei guangmei tuang e.

²⁵Abimelek ta sw khang Sekemmei rui chyng twan thangc meic thouclou the, mi chaeng khou tei tat ruanpatmei guay tuang puat guay chaeng khou nchwanmei nunc tei rui asut the. Hei tei Abimelek khou poulou the.

²⁶Mi ganv khou tei Ebed nac mpouh Gaal twna kawmeipu kachana nunc lev twna Sekem khou guang the, kumna Sekemmei nunc rui kata lwmmei nai khwan e.

²⁷Kaniw meic guayna kaniw tuang drakhalau thangc tatna drakha thai rei lana, zouh kasiamhna ngay the. Kaniw tei kaniw tuang Ravkai thangc tatna tuna zangvna Abimelek ta sa kasicna sa the.

²⁸Gaal rui sa the, “Sekemmei aniu hei tabui kumhmei maansei nunc cho? Tabui swna aniu Abimelek bangc khou bam nina cho? Kamei hei Gideon nac hamhna cho? Zebul hei katuang mei hamhna cho? Kum e thei tabui swna aniu kabangc khou bam nina cho? Nangniw hei Sekemmei pupouc Hamor ta nzian nimei tuang de. Tabui swna Abimelek bangc khou bam tu cho?

²⁹Nangniw hei ai rui kapy swmei bangc khou bam pw e thei ai rui nangniw ta Abimelek khou rui tiduaklou ti nii e! ‘Nang tuang ricmei khuam haapna pat adow tho’ twna sa ti nii e!”

³⁰Mi kaidai tei sinmeipu Zebul rui, Gaal rui samei tei chu pwkhou kalungpuamc the.

³¹Kamei rui Aruma thangc meic thoucna Abimelek khou sa o twna kumna sa the, “Ebed nac mpouh Gaal tei kachana nunc ta nduanghna Sekem khou guangna nang bangc khou bam mak khang mi kaidaimei nunc ta tei karaeng hakcna bam the.

³²Kumhpui zaeng rui nang rui nang mei nunc ta nduanghna zingbangc patna ramv puk khou nkamh tho.

³³Nthuanh thau zaicna neih patpui ganv khou kaidai khou tei guangna adow tho Gaal rui kamei nunc ta nduanghna nang ta akhangv khang pat pwkhou kaniw ruc khou taanctina kazimei guay taanclou ti tho.”

³⁴Kumna Abimelek rui kamei nunc ta nduanghna zingbangc thangc guangna kakang padeih patna Sekem paengc khou dup the.

³⁵Gaal tei kamei nunc lev twna kaidai raengcmun khou pat ding bammei ta Abimelek khatni kamei nunc tei rui how pwkhou, kaniw dup bammei bamv bamv khou tei rui thau the.

³⁶Gaal rui kaniw ta how lana Zabul khou sa the, “Zauc lo! Chyng twan thangc tei meic key geih pw the!” “Hei tei maansei hamh e, chyngbut swng ta maansei kumcna howlou tina de,” twna Zebul rui daw the.

³⁷Gaal rui sa dat re, “Zauc lo! Chyng twan thangc tei maansei pang key pw the. Kakang akhat rui daanhsaanh muc nunc tuang mphauh bang chaeng tei rui guang pw the!”

³⁸Khoutei Zebul rui kakhou sa the, “Nang latsa daicna sa bammei tei ntaw thu tabui sa kan tha? Tabui swna Abimelek bangc khou bam nina cho twna sa bammei tei nang hamh dai? Mi hei nang rui sinnuina bammei nunc tei hamh dai? Nang kiu patna kaniw ta adow tho.”

³⁹Gaal rui Sekemmei ta nduanghna Abimelek ta pat adow the.

⁴⁰Gaal tei pak kan the kumna Abimelek rui alay the. Kaidai raengcmun khou tei sini meic mpeyna kabiu the.

⁴¹Abimelek tei Aruma khou bam the, kumna Zebul rui Gaal lev kachana nunc ta tei Sekem khou rui alay ganc the.

⁴²Nthuanh thauna Sekemmei nunc tei ramvpuk thangc pat puni the twmei Abimelek rui chu the.

⁴³Kumna kamei rui kamei nunc ta kakang kathumh khang tipatna ramvpuk khou tei ti-nchwan the. Meic nunc tei kaidai khou tei rui patmei ta how pwkhou, kaniw ta adow khang nkamh bammei khou tei rui pat the.

⁴⁴Abimelek tei kamei rui nduanghmei kang tei lev twna katumcna pak guangna kaidai raengckat tei dingbin the, kumna baihmei kang kanei tei rui kaniw ta ramvpuk khou tei dowluai ngam lou the.

⁴⁵Neihmaryn adow zingc the. Abimelek rui mi kaidai tei laa the. Meic nunc ta tei swluai ngamna kaidai tei swkamut kamai lana hei tei ntey rui zinliamlou kan the.

⁴⁶Sekem tuang rihgaekkai khou bammei nunc tei mi chamv tei chu pwkhou Elberit tuang rihgaekkai khou tei guang dup the.

⁴⁷Hei khou tei kaniw guang kaduai bam the twmei Abimelek khou poulou the.

⁴⁸Kum tina Abimelek tei kamei nunc ta nduanghna Zalmon Chyng khou ku the. Kamei rui nrih rui thingchy dow lana kabou khuak khou puanc the. Kamei nunc tei ni hei tei kumcna katumcna sw khang sa the.

⁴⁹Kaniw kathuicna rui Abimelek rui swmei tei layluaihna thingchy downa puanc guangna mi rihgaekkai khou tei khuanlou the. Kumna mi lungc khou bammei nunc ta tei mai thoubinlou the. Kumna ntumei nggaanvmei kaguayna meic 1000 dou theic the.

⁵⁰Mi tangv tei Abimelek rui Thebez dingbin datna mi kaidai tei ni laa the.

⁵¹Mi khou tei tanhmei rihgaekkai akhat nai khwan e. Mi kaidai khou tei bammei ntumei nggaanvmei, kapy nunc lev kazauhna mi khou tei paklou the. Kaniw rui kaikhamv taanlouna kainam thangc ku ngam the.

⁵²Abimelek rui mi kai tei mai thow khang chaengmun daeng khou guangna ding bampui ganv khou

⁵³meicpui gaanv khat rui napriaktauc phaic keyna kapy siauc bak the.

⁵⁴Khoutei katuang buy-baeng phunghmeipu ta tei kawna “Nang tuang baengsaeng tei sat patna ata dowluai tho. Ntumei rui ata swluai e twna sa bammei ta ai laa nii mak ge,” twna latdanv pat the. Kumna mi pu tei rui kata tei baengsaeng rui ruat luai kan the.

⁵⁵Isaraelmei nunc tei Abimelek theic the twmei how pwkhou, kaniw kai hanc dat kan the.

⁵⁶Abimelek rui kachana gaanv 70 ta swluaina kapu ruc khou nkhuaimei taanv taanc kanmei khwm tei Ravguangc rui heikumna khangclou kan the.

⁵⁷Gideon nac mpouh Jotham rui Sekem ta siangna saloumei theilayna kaniw ruc khou ni mi ryanramei tei keylou kan the.