Read Rongmei Naga NDAUHLOUMEI 1 Bible Online

NDAUHLOUMEI 1 - Rongmei Naga bible

NDAUHLOUMEI 1

¹Mi hei Ravguangc rui dincloumei, Jisu Khrista rui ndauhloumei guay lyanloumei tuang buk ge. Ravguangc rui kabangc nunc khou ndauhlou khang Jisu Khrista khou tiilou tina, kamei rui kabaanchara ndiu guangna, mi asaanh mak khou pat punimei guay hei kabangc Jahon khou ndauhlou khwan e.

²Kumna Jahon rui kamei how kanmei guay tei raclou the. Ravguangc rui sa guangmei lat khatni Jisu Khrista rui ndauhloumei kamei rui dincloumei kiu mi hei e.

³Mi hylou bammei lat guay hei meic nunc khou pacloumei kamei tei, khatni mi dinc kasuakcloumei lat hei nking lana mi khou hyloumei lat guay hei piumei kamei tei sangaymei e! Kalam thu mi guay hei asaanh mak khou pat puni the.

⁴Jahon khou rui Asia kandic tuang phwamling chanei khou hymei: Nai bammei, nai bam khwanmei khatni nai bam punimei Racguangc; katuang guangc bamvpaeng mav khou bammei bumaengc chanei khou rui;

⁵khatni kalat suai makmeipu, theihmei khou rui ringcthau dat reymei, khatni kandih guangc guay tuang kaipouc Jisu Khrista khou rui zauzian khatni chuzaenghmei nangniw khou tiilou pw diu. Aniu ta nzianna kazei rui aniu paap khou rui aniu ta tiduakloumeipu,

⁶aniu ta guanghdic, kapu Ravguangc siamruai swmei amuc nunc tiswloumeipu Jisu Khrista khang hymdaihmei khatni pumtan tisaengzaeng sw diu! Amen

⁷Zauclo, kamei muangh khou guang pw the! Meic katana kata how puni, kata buybiwmei nunc nganvna how puni. Kandihmei zaatc kapwmna kazaeng rui kap puni. Ngguay, Amen!

⁸Nai bammei, nai bam khwanmei, khatni nai bam punimei Ngamparimei Poubauhmei Ravguangc rui, “Ai hei Alpha khatni Omega, reymei khatni nkhamhmei e,” twna sa e.

⁹Nangniw chana khatni Jisu thei laymei swpui zaeng rui guanghdic nac nunc khou guangloumei ryanramei tei nangniw lev khaengv nchamcmei Jahon ata, Ravguangc lat khatni Jisu rui dincloumei nchumhmei lat tei dinc tipui zaeng rui Patmos duipuidic khou lou bam khwan e.

¹⁰Poubauhmei tuang Tingmik nungc ai Bumaengh khou bam khwan e. Khoutei bianggun khwan kumcna ranvmei khwan akhat rui athei thangc rui sa guang khwan e.

¹¹“Nang howmei guay tei hyna Ephisia, Smirna, Pargama, Thuatira, Sardis, Philadelphia, khatni Laodikia kaidai guay khou naimei phwamling chanei khou tei tii o,” twna sa the.

¹²Akhou sa bammei kiu thow cho twna ai thei ziangrih patna zauc pw ki, kachaekc tuang thaucmai hyang chanei how khwan e.

¹³Mi thauhmai hyang ding khou kiu kaphaypav key tanghmei pheychuanh piumei maansei kumhmei gaanv khat ta how e. Kangaengv khou kachaekc paek duap be;

¹⁴kasam ramhhiw kumc khatni gunh kumc mphwan e; kamik mai bwang kumc e;

¹⁵kaphay tei ntei nthanna thut palikloumei kuanzinc kumc karang e; khatni kakhwan khowduang khwan kumc e.

¹⁶Kabaanzat khou gaanchuangcna chanei sin e, kumna kamwang khou rui ntukmei kamun kaneimei baengsaeng pat re. Kazawpaanv tei neih ndyng neic kumc kachan e.

¹⁷Ai kata how pwkhou, theihmei kumcna kahu khou pun key the. Khoutei kabaanzat baanc aruc khou bouclouna, sa the, “Ping rio! Ai hei reymei khatni nkhamhmei e.

¹⁸Theic dat makmeipu kiu ai hei e! Ai theiclou kan the, tiki ntaw thu ai tingsaeng ringc bam e. Theihmei khatni taruaihram khamvtaan abaanc khou nai e.

¹⁹“Hei zaeng rui, ntaw pat bammei khatni pat punimei nang howmei guay hei hy tho.

²⁰Nang howmei abaan zat khou sin bammei gaanchuangcna chanei hei phwamling chanei tuang kauh baanchara nunc e, khatni thauhmai hyang chanei hei mi phwamling chanei tei e.