Read Rongmei Naga NDAUHLOUMEI 10 Bible Online

NDAUHLOUMEI 10 - Rongmei Naga bible

NDAUHLOUMEI 10

¹Pumtan daihmei kauh baanchara gaanv khat tingkauh thangc rui keymei ta ai how e. Kamei tei muangh rui duam e khatni kapy khou muangsingc souc e. Kazaw neihmik kumc e, khatni kaphay maitiangc kumc e.

²Ricpatloumei latrikzy launa kabaanc khou sin bam e. Kaphay nzat duipui khou khatni mbai phay ramkiang khou dingna,

³kauc ranvna kamangliangpui ra kumcna kauc e. Kamei rui kauc ti khou ganh key luan chaneina mundaw e.

⁴Ganh key luan chanei tang rappui lev, ai hy khang sw the. Tiki, “Ganh chanei rui samei tei ndauh pat rio; hei tei hylou rio!” twna tingkauh thangc rui sa keymei ai chu the.

⁵Khoutei kaphay duipui khatni ramkiang khou ding bammei baanchara tei kabaanc tingkauh biak thangc zay thauna,

⁶tingpuk, kandih, duipui khatni mi khou nai bammei katana damcloumeipu, theih makmeipu Racguangc zanc khou syangdyng swna sa the, “Nzaeng dat bam ni tu hamh the!

⁷Chaneimei baanchara rui katuang bianggun muan pwkhou, kamei rui kabangc muhzwng guay khou dincloumei, meic thay makmei katuang raeng tei tiguang tangc puni the.”

⁸Ai chu kanmei tingkauh thangc rui sakeymei khwan tei rui, “Duipui khatni kandih khou ding bammei kauh baanchara tei rui sin bammei ricpatloumei latrikzy tei nang guang laa tho,” twna samei ai chu dat re.

⁹Ai kauh baanchara daeng khou kiu guangna mi latrikzy launa tei ney the. Khoutei, “Laana tu tho; mi hei nang mwang khou thu nkhuaihdui kumcna ndeih puni, tiki nang bung khou thu nkhuc puni,” twna sa the.

¹⁰Ai mi latrikzy launa tei kabaanc khou rui laana tu the. Hei tei amwang khou thu nkhuaihdui kumcna ndeih e, tiki kaduk key tang pw khou thu abung khou nkhuc the.

¹¹Mi tangv, “Zaatc guay, guanghdic guay, lat guay, khatni guangh guay lam khou Ravguangc rui samei lat hei, nang dinc dat nina e,” twna akhou sa the.