Read Rongmei Naga NDAUHLOUMEI 12 Bible Online

NDAUHLOUMEI 12 - Rongmei Naga bible

NDAUHLOUMEI 12

¹Mi tangv kadath datmei sw-nchinmei tuang akhat tingpuk khou pat re. Mi khou kiu meicpui gaanv khat neihmik rui kapwan swna, bw ni binna, gaanchuangcna ruhna kanei naimei pykhim runna bam e.

²Kamei nah puanc nina sucna ryanra akhaengvna kauc bam e.

³Kadath datmei sw-nchinmei tuang akhat ni tingpuk khou pat dat re. Tadi rapmei thaanngangc haenghmei how e. Mi kiu kapy chanei khatni kachei ruh e. Kumna kapy guay tei guanghpyrun run e.

⁴Mi daihmei thaanngangc tuang mai tei rui tingpuk tuang gaanchuangcna kadam kathumh khou akhat ta giak keyna kandih khou phaic key the. Angana ta tei puanc key rappui lev tu ni the twna kamei mi pui hu khou tei ding bam e.

⁵Khoutei ntanh builwang rui zaatc guay ta sin nimeipu tei puanclou the. Tiki kata tei kaguangc bamvpaeng khou dungc bammei Ravguangc daeng thangc laa ku kan the.

⁶Khoutei kata zaeng ching khat phay nei riakcharuk makuatlou khang chamdaanvloumei bamv tazikramv thangc mi pui tei pak tat kan the.

⁷Khoutei tingkauh thangc rih adow the. Mikhael khatni katuang baanchara guay rui thaanngangc ta tei adow the, kumna hei tei rui ni katuang baanchara guay kazauhna adow akhangv the.

⁸Thaanngangc tei ngam mak khe, kumna kata katuang baanchara guay ta kazauhna tingkauh khou rui nthau pat the.

⁹Reydouc tuang nrui, kazanc ravsic hamh e thei Seitaan twna kawmei, mbaanv kapwm ta guatmeipu, mi daihmei thaanngangc ta tei nthau pat the. Kata katuang baanchara guay ta kazauhna kandih khou nthau key kan the.

¹⁰Khoutei khwan ranvmei akhat rui mi kumna tingkauh thangc rui samei ai chu e: “Ntaw thu Ravguangc rui rihngam nimei kiu guang tangc the! Ravguangc kamei guangh swmei tuang pumtan tei ndauhlou the! Ntaw thu katuang Messia tei kangamv ndauhlou the! Kalam thu Ravguangc hu khou dingna zingbangc kalaanv aniu chana punav guay ruc khou khuay nkham bammeipu ta tei tingkauh khou rui nthau pat kan the.

¹¹Lauziu Nac tuang zei khatni kaniw rui dinc ndauhmei nchumhmei lat paan tei rui aniu chana punav guay rui kata ngam the. Kalam thu theiclou khang kaniw panty nzav mak khe.

¹²Hei zaeng rui, tingkauh khou bammei nangniw neihla tho! Tiki kandih khatni duipui khou bammei nangniw khang thu ryanra zaengsimei e dav! Kalam thu ravsic tei kalungpuamcna nang khou key kan the. Tabui cho tiki, kakhang kaganv maek khe twmei kamei thay e.”

¹³Thaanngangc tei kata kandih khou nthau keylou the twmei thay la khou, mi nac mpouh ta puancloumei pui ta tei nthau thau the.

¹⁴Tiki mi pui tei kata tingkwm kathumh kapaek makuatlou khang chamdaanvloumei tazikramv thangc tei samc tat khang eagal mou daihmei swkaeng kakhou tiilou khwan e.

¹⁵Khoutei mi pui ta tei nzuan tat khang thaanngangc tei rui kamwang khou rui duidai tiluangc pat khwan e.

¹⁶Khoutei kandih rui mi pui ta tei nkhavlou the. Kandih rui kamwang hah patna thaanngangc mwang khou rui patmei dui guay tei mi khou tei luangc gut kan the.

¹⁷Khoutei, mi thaanngangc tei mi pui ta tei kalung puamc the, kumna mi pui nac baihmei guay, Ravguangc tuang latdanv piumei guay khatni Jisu rui dincloumei nchumhmei lat tei ntipna sin bammei guay ta adow khang pat the.

¹⁸Kumna mi thaanngangc tei[5] duipui paengc sypung khou ding bam e.