Read Rongmei Naga NDAUHLOUMEI 13 Bible Online

NDAUHLOUMEI 13 - Rongmei Naga bible

NDAUHLOUMEI 13

¹Khoutei khouringh akhat duipui khou tei rui thaumei ta ai how e. Hei tei kachei ruh khatni kapy chanei nai e. Kapy guay khou tei guanghpyrun runlou e, khatni kapy guay tei Ravguangc hym swkachanhpui zanc phungc e.

²Mi khouringc tei kamang kumc e, katan tei chagamh tan kumc e, khatni kamwang tei kamangliangpui mwang kumc e. Kumna thaanngangc tei rui kapumtan, kaguangc bamvpaeng, khatni daihmei kangamv mi khouringc khang tei tii kan the.

³Mi khouringc py akhat khou tei theic biuhmei zamvdai kumhmei akhat how e; tiki hei tei gay dat kan the. Mbaanv kapwm ngakna mi khouringc thei tei lay the.

⁴Meic nunc tei mi thaanngangc ta tei kalum the, kalam thu hei tei rui khouringh khang tei ngamv tiilou kan the. “Mi khouringc hei kumhmei thow naina cho? Mi ti hei adow ngam nimei thow naina cho?” twna sana kaniw mi khouringc ta tei ni kalum the.

⁵Kagaengh swna Ravguangc hym sw kachanhpui lat sa khang kakhou tiilou the, kumna bw riakdeina kanei ngamv sin khang ni kakhou tiilou the.

⁶Hei tei Ravguangc ta, kazanc ta, kamei bammei bamv ta khatni tingkauh khou bammei guay ta sakasic thau the.

⁷Nthanmei guay ta adowna ngam khang kakhou tiilou the, kumna zaatc guay, guanghdic guay khatni, lat guay ta sin khang kakhou ngamv tiilou the.

⁸Swluai kanmei Lauziu Nac tuang ringhmei latrik khou mbaanv damh mak khou rui kaniw zanc hylou kanmei nunc na hamhna, mbaanv khou lungc bammei meic katana rui kata kalum puni.

⁹Nukuanc naimei kathuic chu la tho!

¹⁰Nym nipui mei ta tei nym puni the; baengsaeng hu khou theic nipui mei ta tei baengsaeng rui dowluai puni the. Mi khou hei nthanmei guay khaengthay khang khatni lwm ntip khang kage nai e.

¹¹Mi tangv, kandih khou rui khouringh akhat kumei ta ai how e. Hei tei lauziunac chei kumhmei kachei kanei nai e, khatni hei tei thaanngangc kumcna lat sa e.

¹²Hei tei rui reymei khouringc tuang ngamv guay tei mi khouringc hu khou tei sinsw the. Hei tei rui kandih khatni mi khou lungc bammei guay ta kazam gay dat kanmei reymei khouringc ta tei tikalum the.

¹³Kaneimei khouringc tei rui charynmei taanvdaih mpeyna taanc the. Kamei rui meic guay hu khou tingkauh thangc rui kandih khou mai tikey the.

¹⁴Reymei khouringc hu khou swlyanlou khang nuhlou tina swloumei charynmei taanv guay tei rui mbaanv khou lungc bammei meic guay ta guat the. Baengsaeng zam phungc laki ringc bammei khouringc maengc tei mi khouringc tei rui tikasiamh the.

¹⁵Kumna mi maengc khou tei kaneimei khouringc tei rui ringhmei thiula laalou khang nuhlou the. Hei tei mi maengc tei lat sa thay khang khatni kata kalum makmei guay ta swluai khang e.

¹⁶Meicdaihmei, nthyammei, lungcsimei lungcgaymei, bangh khatni nyngswmei—meic katana ta kabaanzat khou hamh e thei kasanpiang khou timadanclou the.

¹⁷Mi khouringc zanc tei hamh e thei mi zanc tuang sing tei madanclou makmei meic gaanv khat na sini ramh zuanc nuh mak ge; liu ni liu nuh mak ge.

¹⁸Mi hei thay khang ningting kage nai e. Mi khouringc zanc tuang sing kabac tei ningtyngpui mei rui chak pat ngam puni. Kalam thu mi sing hei meic zanc phaan e. Mi sing kiu thu 666 ge.