Read Rongmei Naga NDAUHLOUMEI 14 Bible Online

NDAUHLOUMEI 14 - Rongmei Naga bible

NDAUHLOUMEI 14

¹Mi tangv ai zauc pw ki, Lauziu Nac tei Zaion chyng khou ding bammei ta how e. Kaniw sanpiang khou kazanc khatni kapu zanc hyloumei gaanv 144,000 kadaeng khou ding bam e.

²Khoutei duipui duidai khwan kumhmei, ganhkeymei khwan kumhmei khwan akhat tingkauh thangc rui sakeymei ta ai chu e. Hei tei nrah zay thaymei nunc rui zay patmei nrac khwan kumc e.

³Mi gaanv 144,000 tei khouringh padeih khatni gaanvthaih nunc kadaeng khou bammei guangc bamvpaeng hu khou tei dingna luthanh suan bam e. Kaniw na hamhna mi lu tei meic thay mak ge. Kaniw hei mbaanv kapwm khou rui guangmei thuakloumei nunc e.

⁴Kaniw hei ntumei rui sw mphuam makmei nunc, ntumei ta kahi makmei nunc e. Kaniw hei Lauziu Nac thei tei kamei tat tat thangc lay tat bammei nunc e. Kaniw hei meic guay pang khou rui thuakpatloumei nunc khatni Ravguangc khatni Lauziu Nac khang katloumei nthai reymei thai kumhmei e.

⁵Kaniw latsaraamc zat mak ge; kaniw hei kakhuay maekmei nunc e.

⁶Mi tangv, kauh baanchara akhat tingpuk laan khou samc bammei ta how e. Kandih khou lungc bammei zaatc kathuic, khwang kathuic, lat kathuic, khatni guanghdic kathuic khou dinclou khang tingsaeng gaychamv kakhou nai e.

⁷Kamei rui kauc ranvna sa e, “Ravguangc ta ping o khatni kata chakhwang champouh o! Kalam thu kamei rui latzan sw nimei ganv guang the! Tingpuk, kandih, duipui khatni duipuakkai guay damcloumeipu ta kalum o!”

⁸Baihmei kaneimei kauh baanchara kathei lay patna sa e, “Daihmei Babilon tei bow kan the! Zaatc guayna ta katuang nthah boulahmei zouc, lungpuam tithaumei zouc tizangvloumeipui tei bow kan the.!”

⁹Reymei khatni kaneimei tangv, kathumhmei kauh baanchara pat datna kauc ranvna sa e, “Khouringh khatni kamaengc ta tei kalummei guay ruc khou khatni kasanpiang khou hamh e thei kabaanc khou mi tuang madanhmei tei naimei guay ruc khou,

¹⁰Ravguangc lungpuamdai, kasut tuang nai dat makmei lungpuam keylou puni. Kaniw ta tei maipu rui chuangc bammei mai khou nthanmei kauh baanchara nunc khatni Lauziu Nac hu khou rai puni.

¹¹Kaniw ta rai bammei mai tei amit dat lak khe. Mi khouringc khatni kamaengc ta kalummei nunc, kazanc tuang madanhmei tei phunghmei nunc tei zingbangc kalaanv ryanramei nthaekc dat lak khe.”

¹²Mi khou hei, Ravguangc latdanv guay piu bammei khatni Jisu khou lwmnuhmei sw bammei nthanmei guay khaengvthay khang kage nai e.

¹³Mi tangv, “Mi hei hy o: Ntaw rui thauna Poubauhmei khou theicloumei nunc tei sangaymei e!” twna tingkauh thangc rui sakeymei ai chu e. “Ngguay, kachangc e! Kaniw ryanra ryanriumei khou rui nthaekc puni the. Kalam thu kaniw tuang taanvthai kaniw thei lay guang e,” twna Bumaengh rui daw e.

¹⁴Mi tangv ai zauc dat pw ki, meic nac mpouh kumhmei gaanv khat kachaekc tuang guanghpyrun runna kabaanc khou ntukmei baengkhuai sinna muangh mphwanmei ruc khou dungc bammei ta how e.

¹⁵Khoutei kauh baanchara baihmei akhat khwan ranvna, “Nang baengkhuai sinna lau tei tay tho. Kalam thu taypui ganv tangc the; mbaanv laupuk hei minc the!” twna muangh khou dungc bammeipu khou tei sa the.

¹⁶Khoutei muangh khou dungc bammeipu tei rui kabaengkhuai tei rui mbaanv laupuk tei tay the.

¹⁷Mi tangv kauh baanchara baihmei akhat tingkauh thangc ravkai khou rui patmei ta ai how e. Kamei ni baengkhuai ntukmei sin e.

¹⁸Mi tangv mai ruc khou kangamv naimei kauh baanchara baihmei akhat ravchapaeng khou rui pat the. Ntukmei baengkhuai sinmei kauh baanchara khou tei kamei rui kauc ranvna, “Nang tuang baengkhuai tei sinthau tho, mbaanv tuang drakha lau khou rui kathai guay tei tay tho. Kalam thu drakha thai guay tei minc the,” twna sa the.

¹⁹Kumna mi baanchara tei kabaengkhuai tei kandih nam ruc khou zay patna drakha thai chuam guay tei tayna, Ravguangc lungpuam tuang daihmei drakha thai niakpui bamv khou phaiclou kan the.

²⁰Mi drakha thai guay tei nipui bamv kaidai paengc khou ni the, kumna mi khou tei rui zei takuanh mwangkhap kauhmei saan nthukna mail phaynei dou luangc pat the.