Read Rongmei Naga NDAUHLOUMEI 17 Bible Online

NDAUHLOUMEI 17 - Rongmei Naga bible

NDAUHLOUMEI 17

¹Mi tangv kamkuak chanei sin bammei kauh baanchara chanei pang khou tei rui akhat adaeng khou guangna, akhou sa e, “Guang o, dui mpeyna ruc khou dungc bammeipui, daihmei mangcsangmeiluc ruc khou keylou nimei latzan nang khou lyanlou puni.

²Kandih tuang guangc nunc hei kamei lev lungcmaanv lungcmowpui taanv taanc the, kumna katuang lungcmaanv lungcmowpui zouc rui kandihmei guay mba ngam the.”

³Bumaengh Nthanmei rui ata sinna, kauh baanchara tei rui ata tazikramv thangc phungclou the. Mi khou tei haenghmei khouringc akhat ruc khou ntumei gaanv khat dungc bammei ta how e. Mi khouringc khou tei Ravguangc hym sw kachanhpui zanc rana hylou e, kumna hei tei kapy chanei kachei ruh nai e.

⁴Kumna mi pui tei haengc nrymmei lev haengc ringhmei pwan piu e, khatni kachaekc, kamanv kunghmei tauc khatni mukta rui karuh padiklou e. Katuang lungcmaanv lungcmowmei tuang mphuam tanacmei khatni chanymei tuang rui lou padikmei kachaekc kamkuak akhat kabaanc khou sin e.

⁵“Mangcsangmeiluc guay khatni kandih khou chanymei taanv guay pui, daihmei Babilon,” twna ntheihmei zanc hei kasanpiang khou hylou e.

⁶Nthanmei nunc zei, twmei thu Jisu khou lwmpui zaeng rui swluai kanmei nunc zei zangv mbameipui ta tei ai how e. Ai hei tei how pwkhou, akhang ngak the.

⁷Khoutei kauh baanchara tei rui akhou sa the, “Tabui swna nang ngak bam tu cho? Mi pui khatni kapy chanei khatni kachei ruh naimei pui ta phungc bammei khouringc tuang kabac hei ai dinclou puni.

⁸Nang how kanmei khouringc tei nai bam khwanmei, tiki ntaw thu nai dat makmei khouringc e. Mi hei kanganv maekmei khunc khou tei rui pat zaic puni the kumna kata swmaan khang tat kan puni. Mbaanv damh mak khou rui kaniw zanc ringhmei latrik khou hylou makmei kandih nam ruc khou lungc bammei guay kata zaucna ngak puni. Mi hei ringc bam khwan e; ntaw thu ringc bam dat mak khe. Tiki mi hei guang dat puni.

⁹Mi khou hei ningting khatni kabahthaymei kage nai e. Kapy chanei hei, mi ntumeipui hei rui dungc bammei chyngbut chanei hei the. Mi hei guangh chanei tei ni e.

¹⁰Panguh thu bow kan the, akhat guanghtu bam di he; tiki baihmei akhat thu guang puni he. Kamei guangna matak khat na guanghtulou puni.

¹¹Kaganv akhat khou nai bam khwanmei, tiki ntaw thu nai dat makmei khouringc kiu tachatmei guangc e; tiki kamei guangh chanei pang khou kazauhmei e. Kumna kamei maan nimei chaeng kaamc pat kan the.

¹²“Nang how kanmei kachei ruh tei guang punimei guangh ruh e. Kaniw hei khouringh tei lev ganvdak akhat na guanghtu nchamclou puni.

¹³Kaniw hei lungh chamc e, kumna kaniw pumtan khatni ngamv khouringh khang tei tii puni.

¹⁴Kaniw guay rui Lauziu Nac ta adow puni; tiki Lauziu Nac khatni kamei rui kawloumei, kapahloumei khatni lwmnuhmei nunc rui kaniw ta ngam puni. Kalam thu kamei hei kaipouc guay Kaipouc e khatni guangh guay Guangc e.”

¹⁵Kauh baanchara tei rui akhou mi kumna sa dat re, “Nang how kanmei mangcsangmeiluc rui dungc bin bammei dui guay tei guanghdic guay, meic guay, zaatc guay khatni lat guay e.

¹⁶Nang how kanmei chei ruh khatni khouringh tei rui mi mangcsangmeiluc ta tei karaeng puni. Kaniw rui katuang naimei guay asut laana pumtang ganclou puni. Kaniw rui kazanc tu puni kumna kata mai ntei mutsutlou puni.

¹⁷Ravguangc tuang lat guang tangh mak saanv khouringh tei rui guanghtu khang kaniw lungh chamcna kaniw tuang guangh ngamv guay mi kumna khouringh khang tei tiiloumei hei, Ravguangc rui katuang raeng guang tangh khang kaniw lung khou tiilou tina e.

¹⁸“Nang how kanmeipui tei kandih guangc guay ruc khou guanghtumei daihmei kaidai tei e.”