Read Rongmei Naga NDAUHLOUMEI 18 Bible Online

NDAUHLOUMEI 18 - Rongmei Naga bible

NDAUHLOUMEI 18

¹Mi tangv hei ngamv daihmei phunghmei kauh baanchara baihmei akhat tingkauh thangc rui keymei ta ai how e. Kariw rui kandih kapwm gaanc e.

²Khwan ranvna kamei rui sa e: “Bow kan the, daihmei Babilon bow kan the! Hei tei ravsic nunc bamv sw kan the, tanacmei bumaengc guay bamv sw kan the, nthan makmei khatni karaeng kadangmei nruay nunc bamv sw kan the.

³Kalam thu zaatc guayna katuang nthah boulahmei zouc zangv mba the. Kandih guangc guay kamei lev lungcmaanv lungcmowmei taanv taanc the. Katuang kasut dat makmei nthahmei rui, kandih khou lanvguanh lanvdaenghmei nunc ta tilungcgaylou the.”

⁴Mi tangv khwan akhat rui tingkauh thangc rui mi kumna samei ai chu e: “Tat pat tho, amei guay lev, kakhou rui tat pat tho! Katuang paap khou tei nangniw lay kazauh lamc e; katuang ntaamhmei khou tei lay kazauh lamc e!

⁵Kalam thu kapaap tingkauh khuan tangc the, katuang simei taanv guay tei Ravguangc amuc mak ge.

⁶Kamei rui nangniw khou swloumei kahak tei kakhou ni swlou tio; kamei rui taancloumei kahak tei kadam kanei khangclou tio. Kamei rui nangniw ta tizangvmei zouc tei kadam kanei titanclouna tii tio.

⁷Karana kagaengh swna khatni nungngai amanvna lungc kanmei chuath tei, kakhang ryanramei khatni zaengsimei tii tio. Kalam thu ‘Ai lyammav swna dungc bam e! Ai maypui hamh e; ai zaengsina lungc ni tu hamh e!’ twna karana sa bam e.

⁸Hei zaeng rui, neih khat na khou ravpyan, zaengsimei, khatni nkow ndaapcmei kakhou guanglou puni. Kata mai rui ntei puni, kalam thu Poubauhmei Ravguangc, kata latzanswmeipu hei ngammeipu e.”

⁹Kata nteimei maikhou tei how pwkhou, kamei lev nthah boulahna lungcmaanv lungcmowmei taanv taanhmei kandih guangc nunc tei kakhang rui puihuayna kap puni.

¹⁰Kaniw ni mi khou tei lay kazauh pw khang ping lana, duh thangc dingna mi kumna sa e, “Apuai! apuai! Ganvdak akhat lungc khou nang ruc khou latzan keylou the!”

¹¹Kumna lanvguanh lanvdaenghmei kandihmei guay kakhang huayna kap the; kalam thu kaniw tuang puat meic liulou dat mak khe.

¹²Kaniw tuang kachaekc, daandi, kamanv kunghmei tauc, mukta, meic liulou dat mak khe. Kaniw tuang linen phey, haengcnrymmei phey, nkupuilangc phey, haengcringhmei phey; kunghmei thing zaatc kapwmna; guipwang nei khatni kunghmei thing rui kasiamhmei puat guayna khatni kuanzinc, ntanh, ntauhhuc tuang puatc guay;

¹³maansuc, gumh, agaw, maruai, agaw; zouh khatni thauh, gehu khatni ntyan buay, guaih khatni lauziu, takuanh khatni takuanh gari, bangh khatni maansei—mi guay hei liulou dat mak khe.

¹⁴“Nangniw tuang kasyan kahawmei puat guay maan ngam kan the, khatni nangniw khiu khingc khatni gunc gac guay maan ngam kan the. Mi guay tei nangniw laatow dat ni tu hamh the!” twna sa the.

¹⁵Mi puat guay hei kakhou lanvguanhna lungcgay bammei lanvguanhmei nunc tei, kaniw rianra tei kaniw khou guanglou pw khang pingna duh thangc dingna kapna huayna,

¹⁶sa e, “Apuai! apuai! Linen, haengcnrymmei khatni haengcringhmei pheybaan rana piuna, kachaekc, mukta khatni kunghmei tauc rui karuh bammeipui tei!

¹⁷Ganvdak akhat na lungc khou rui mi kumhmei katuang lanv guay tei maan ngam kan dyng the dav ni!” Rungh kaipouc guay, rungh khou tat bammei guay, rungh chaumei guay khatni lanvguanh lanvdaenghna duipui khou tat bammei guay tei duh thangc dingna,

¹⁸kata ntei bammei maikhou tei zaucna, “Mi kaidai kumcna daihmei baihmei kaidai nai khwan lak dyng the ni!” twna kauc the.

¹⁹Kaniw py khou mbut nroulouna, latluna kaucna sa the, “Apuai! apuai! Duipui khou kaniw tuang rungc tat bammei nunc kaniw tuang lunggai ntaanv bammei kaidai tei! Ganvdak akhat khou rui kata swmutsutlou dyng the ni!”

²⁰He tingkauh, neihla tho. Nthanmei nunc, latdiutatmei nunc khatni muhzwng nunc, nangniw neihla tho! Nangniw ruc khou taancloumei khang tei Ravguangc rui kaniw ruc khou mi latzan hei keylou the!

²¹Mi tangv tanhmei kauh baanchara akhat rui daihmei napriaktauc dimei tauc khat laa thauna hei tei duipui khou phaic keyna sa the, “Mi hei kumcna daihmei Babilon kaidai ta ndat key puni. Kumna mi ti hei how dat lak khe.

²²Lusuanmei khwan khatni nrah khwan, alim khatni bianggun muanmei khwan nang khou chu dat lak khe! Thyamthay baanhthaymei nai dat lak khe; nap riakmei khwan ni chu dat lak khe!

²³Nang khou thauhmai riw how bam dat lak khe. Nang tuang lanvguanh lanvdaenghmei nunc tei kandih khou meicdaihmei nunc sw bam khwan e; kumna nang tuang duaic raengc rui kandihmei maansei guay ta guat the!”

²⁴Muhzwng nunc khatni nthanmei nunc tuang zei mi kaidai khou tei nai the. Ngguay, kandih khou swluai kanmei zei guay mi khou tei nai the. Hei zaeng rui Babilon ruc khou mi latzan hei keylou tuang e.