Read Rongmei Naga NDAUHLOUMEI 19 Bible Online

NDAUHLOUMEI 19 - Rongmei Naga bible

NDAUHLOUMEI 19

¹Mi tangv tei meic kangdai rui kauc bammei khwan kumhmei tingkauh thangc mi kumna ai chu e, “Halleluija! Guloumei, hymdaihmei khatni pumtan hei aniu Racguangc tuang e!

²Katuang latzan hei nchumh e khatni nzih e! katuang lungcmaanv lungcmowmei taan rui, mbaanv ta sw mphuam bammeipui ruc khou katuang latzan keylou kan the, kabangc nunc tuang zei khwm khangclou kan the.”

³“Halleluija! Kata nteimei maikhou hei khou taek dat mak khe!” twna kaniw rui kauc e.

⁴Mi tangv gaanvthaih nchuihna padeih khatni khouringh padeih tei, guangh bamvpaeng khou dungc bammeipu ta nkhum laamv keyna kalum the. “Amen! Halleluija!” twna sa the.

⁵Khoutei khwan akhat rui guangh bamvpaeng khou tei rui sa the, “He kabangc guay khatni nthyammei daihmei kata pingmei guayna, Ravguangc ta thuanc o!”

⁶Mi tangv meic kangdai khwan kumhmei, duidai khwan kumc, tingthinc ganhkeymei khwan kumhmei chu e. Kaniw rui sa the, “Halleluija! Poubauhmei, Ngamparimeipu aniu Racguangc hei Guangh e!

⁷Aniu neihla zaenggay di kho; aniu kahym thuanc di kho! Kalam thu Lauziu Nac now suanc nimei ganv tangc the, kumna nowpeic tei chamdaanv bam the.

⁸Nthanmei mphwan kachanmei phey kakhang tii kan the.” (Mi mphwanmei phey hei nthanmei nunc tuang ravchaptatmei taanv tei e.)

⁹Khoutei, “Mi hei hy o: Lauziu Nac tuang nowsuanh ngai taektw khang kawloumei nunc tei sangaymei nunc e. Mi hei Ravguangc lat re,” twna kauh baanchara tei rui sa the.

¹⁰Khoutei kata kalum khang ai kahu khou nkhum laamv key ti khou, “Ata kalum rio! Ai thu nang kumhme khatni nchumhmei laatow kanmei chana punav guay kumhmei siamruaimei makaamv de. Ravguangc ta kalum o!” twna sa the. Kalam thu Jisu rui dincloumei nchumhmei lat hei muhzwng nunc khou tiiloumei lat tei e.

¹¹Mi tangv tingkauh laanc patmei ta ai how e, kumna takuanh mphwanmei akhat how e. Mi ruc khou dungc bammeipu ta tei Lwmnuhmei khatni Nchumhmei twna kaw e. Kamei nchumhna latzan sw e khatni nchumhmei khang adow e.

¹²Kamik tei maibwang kumc e, khatni kapy khou guanghpyrun mpeyna run e. Kakhou kazanc hylou bammei tei kamei na hamhna meic gaanv khat na sini thay mak ge.

¹³Zei luploumei pheychuanh kamei piu e. Kazanc “Ravguangc Lat” twna kaw e.

¹⁴Tingkauh ricmei nunc nthanmei mphwanmei pwan piuna takuanh mphwanmei pang tuangcna kathei lay e.

¹⁵Zaatc guay ta rihngamlou nimei tuang ntukmei baengsaeng kamwang khou rui pat re. Kamei rui zaatc guay ta ntanh builwang rui sin puni. Kumna Ngamparimei Racguangc tuang lungpuam tuang drakha thai nipui bamv khou kamei rui ni puni.

¹⁶Katuang pheychuanh khou khatni kanaeng khou, “Guangh guay Guangc khatni kaipouc guay Kaipouc,” twmei zanc hei hylou e.

¹⁷Mi tangv kauh baanchara akhat neih khou ding bammei ta ai how e. Kumna kamei rui, “Ravguangc tuang khwmkih taektw tu khang guang kaduai tho!” twna tingpuk khou samc bammei nruay guay ta kauc the.

¹⁸“Guangh guay zanc, rihpy guay zanc, rihmei guay zanc, takuanh guay khatni takuanh tuanghmei guay zanc, meicdaihmei nthyammei, bangh khatni nyngswmei—meic guay zanc guang tu tho!” twna kauc the.

¹⁹Mi tangv khouringh tei khatni kandih tuang guangc nunc tei kaniw tuang ricmei nunc kazauhna takuanh khou tuangc bammeipu khatni katuang ricmei nunc ta adow khang guang kaduai bammei ta ai how e.

²⁰Khouringh ta tei khatni kahu khou charynmei taanv mpeyna taanc kanmei guatmei muczwng ta tei nym kan the. (Katuang charynmei taanv guay tei rui khouringh tuang madanhmei maengc tei phunghmei nunc khatni mi khouringc maengc ta kalummei nunc ta tei guat kan the.) Mi khouringc khatni guatmei muczwng ta tei, maipu rui chuangc bammei mai zeiclat khou tei nringh phaiclou kan the.

²¹Kaniw tuang ricmei guay ta tei takuanh khou dungc bammeipu mwang khou rui patmei baengsaeng tei rui dowluai ngam kan the; kumna kaniw tuang zanc tei nruay guay rui tu kan the.