Read Rongmei Naga NDAUHLOUMEI 2 Bible Online

NDAUHLOUMEI 2 - Rongmei Naga bible

NDAUHLOUMEI 2

¹“Ephisiamei phwamling tuang baanchara khou tei mi hei hy o: “Mi hei kabaanzat khou gaanchuangcna chanei sinna kachaekc tuang thauhmai hyang chanei pang khou tat bammeipu rui sapui lat re.

²Nang taanv guay tei ai thay e; nang taanc ranvna taanc kanmei khatni khaengv tancna khaengv kanmei tei thay e. Meicgay makmei nunc ta nang khaengv bam ngam mak ge khatni kaniw rana kaniw ta latdiutatmei nunc e twna sa laki kiuc thu kiuc hamhmei nunc ta tei nchanv lana kaniw saraamhmei nunc e twmei nang thay kanmei tei ai thay e.

³Nang khaengv thay e, nang akhang rui ryanramei khaengv the, kumna liat lak khe twna mpat mak ge.

⁴“Kum e tiki nang ruc khou ai nuh makmei kiu mi hei e: thaurey khou nang ata nzianmei ramzian tei ntaw nang khou maek khe.

⁵Nang asaanh ducna tangkhyn key the cho twmei makumh o! lungh laic datna nang thaurey khou sw bammei kumcna sw dat ro. Nang lungh laih mak ge thei, ai guangna nang tuang thaucmai hyang tei laa pat kan puni.

⁶Tiki ai karaengmei Nikolaitimei nunc tuang taanv ta tei nang ni karaengmei khang tei thu nang ruc khou neihlalou khang nai e.

⁷“Bumaengh rui phwamling guay khou smei hei nukuanc naimei kathuic chu la tho! “Rihngamna guangmei kathuic Ravguangc tuang paradais pikwan khou naimei ringhmei thingbang thai tei tu puni.

⁸“Smirna phwamling tuang baanchara khou mi hei hy o: “Mi hei reymei khatni nkhamhmeipu, theiclouna ringc datmeipu kamei rui sapui lat re.

⁹Nang ramrianra tei ai thay e; nang ramlungsi ai thay e; tiki kaling thu nang lungcgay de! Kaniw rana kaniw ta Jihudimei e twna sa laki kiuc thu kiuc hamhmei, Seitaan tuang sinagogmei nunc rui nang ta sakasicna sa bammei guay tei ai thay e.

¹⁰Nang ariw punimei ryanramei khang tei ping rio. Zauclo, nangniw gaanvsaekc ta ravsic rui kangkai khou louna nang ta nchanv puni, kumna nang zaeng ruh ryanra khaengv puni. Theihmei nganvna lwmnuhmei sw o, kumna nang khang ringhmei swanpyrun tii puni.

¹¹“Bumaengh rui phwamling khou samei hei nukuanc naimei kathuic chu la tho! “Rihngampui mei ta tei theic kaneimei tei rui kabiu dat lak khe.

¹²“Pargama phwamling tuang baanchara khou mi hei hy o: “Mi hei kalat ntukmei kamun kaneimei baengsaeng kumhmeipu tei rui sapui lat re.

¹³Nang bammei bamv tei Seitaan tuang guangc bamvpaeng naipui bamv e twmei ai thay e. Nang ata mpat mak ge, kumna atuang lwmnuhmei sakhi— Antipas ta mi Seitaan bampui bamv khou tei swluaipui ganv khou tei nganvna nangniw akhou lwmmei mpat mak ge.

¹⁴“Tiki ai rui nang ruc khou nuh makmei tuang asaekc naimei kiu thu: Isaraelmei ta ravkhaengmei zanc tu khang nthiam patna nthah boulahpui taanv titaanclouna paapc khou tikeylou khang Balak ta nchamloumei Balaam tuang latdyn laamei gaanvsaekc nang khou nai e.

¹⁵Hei tei kumcna Nikolaitimei nunc tuang latdyn laamei nunc nang khou nai e.

¹⁶Hei zaeng rui, nang lungh laic o! Lungh laih mak ge thei, ai asaanh mak khou, nang khou guangna amwang tuang baengsaeng rui kaniw ta adow puni.

¹⁷“Bumaengh rui phwamling guay khou samei hei nukuanc naimei kathuic chu la tho! “Rihngammei nunc khang tei ryloumei manna tii puni. Ai rui kaniw khang zanh thanh hyloumei ntauh mphwanmei tii puni. Hei tei laatowmei kamei na hamhna, mi zanc tei meic baihmei gaanv khatna sini thay mak ge.

¹⁸“Thuatiramei phwamling tuang baanchara khou mi hei hy o: “Mi hei kamik maibwang kumhmei, kaphay thaamc karangloumei kuanzinc kumhmei, Ravguangc Nac Mpouh rui sapui lat re.

¹⁹Nang taanv guay tei ai thay e. Nang ramzian, nang ramlum, nang taanv, khatni nang ramkhaengthai tei ai thay e. Thaurey khou khang tei suangc ntaw thu nang taanc mbu the twmei ai thay e.

²⁰Tiki ai nang ruc khou nuh makmei kiu mi hei e: Jezebel tei rui Ravguangc lat re twna dincna amei nunc ta nthah boulahmei paap khou zaylou bammei khatni ravmaengc khang katloumei taektw titu bammei ta tei nangniw nuhlou bammei tei ai nuh mak ge.

²¹Kamei lungh laih khang ai kaganv tii kan the, tiki kamei nthah boulahmei khou tei rui lungh laih mak khe.

²²Hei zaeng rui, mi pui ta tei nnaumei laeng khou ganckeylou puni the, kumna kamei khatni kamei lev lungcmaanv lungcmowmei taanv taanhmei guay tei taraina makmei ramrianra ariw puni. Kaniw kamei lev taanc bammei simei taanv khou tei rui lungh laih mak ge thei, mi hei ai taanc puni the.

²³Kanac guay ta tei ni swluai puni. Mi khou kiu, ai hei maansei guay ta kalungc kapaengc thay ngammeipu e twmei phwamling guay thay puni. Ai rui meic kathuicna khang kataanv kataanv thai tii puni.

²⁴“Tiki Thuatiramei, mi simei latdyn khou hei tat makmei; ‘Seitaan tuang ningting’ twna meic nunc rui kawmei tei thay makmei nangniw khou thu ramh baihmei sahaaplou lak khe;

²⁵nangniw khou naimei tei ai guang mak saanv ntipna sin bam o.

²⁶Rihngamna guangmei nunc, ai rui nsinloumei taanv nkhamhmei tingmik nganvna taanc suakmei nunc khang, apu rui akhou tiiloumei ngamv tei ai rui tiilou puni: zaatc guay ta kaniw baanc khou tiilou puni; ntanh builwang rui kaniw ta sian khang, kumna nianglai ta kumc bai puat paruatlou khang tiilou puni.

²⁸Ai rui kaniw khang laukhwan gaanphiu ni tiilou puni.

²⁹“Bumaengh rui phwamling guay khou samei hei nukuanc naimei guay chu la tho!