Read Rongmei Naga NDAUHLOUMEI 21 Bible Online

NDAUHLOUMEI 21 - Rongmei Naga bible

NDAUHLOUMEI 21

¹Mi tangv tingkauh kathanc khatni kandih kathanc ai how e. Reymei tingkauc khatni reymei kandic tei maek khe; duipui nai dat mak khe.

²Kumna Nthanmei Kaidai, Jerusalem kathanc, kagaanv khang karuhloumei nowpeic kumcna Ravguangc khou rui tingkauh thangc rui keymei ta ai how e.

³Khoutei guangh bamvpaeng khou rui kauc ranvna mi kumna samei ai chu e: “Zauclo, ntaw khou rui maansei pang khou Ravguangc kai sw puni the. Kamei kaniw pang khou lungc bam puni the, kumna kaniw kamei nunc sw bam puni the. Ravguangc kamei kahak kaniw lev bam nchamc puni the, kumna kamei kaniw Racguangc sw puni the.

⁴Ravguangc rui kaniw mikdui roulou puni. Theihmei, zaengsimei, kapmei, suhmei nai dat lak khe. Reynungc tuang guay tei maan ngam kan the.”

⁵Khoutei guangh bamvpaeng khou dungc bammeipu tei rui sa e, “Zauclo, ai rui ramh guayna kathanc kasiamhlou the!” “Mi hei hylou o, kalam thu mi hei nchumhmei lwmnuhpui lat re,” twna akhou sa e.

⁶Khoutei kamei rui sa e, “Mi guay hei luai the! Ai hei Alpha khatni Omega e—reymei khatni nkhamhmei e. Tarimei guay ta katy kamanv maekna ringhmei duipuakckai khou tizangv puni.

⁷Rihngam guangmei guay, mi guay hei laa puni; kumna ai kaniw Pu sw puni, kaniw anac nunc sw puni.

⁸Tiki zammei nunc, lwm makmei nunc, mphuam tanacmei nunc, meicdowmei nunc, lungcmaanv lungcmowmei nunc, duaih raengh sinmei nunc, ravmaengc kalummei nunc, khatni saraamhmei guay khang thu, maipu rui chuangc bammei maizeic tei the. Mi hei theic kaneimei kiu the.”

⁹Nkhamhmei ntaamhmei chanei lou padikmei kamkuak chanei sinmei kauh baanchara chanei pang khou gaanv khat adaeng khou guangna, “Guang o, Lauziu Nac tuang Nowpeicpui ta nang khou lyanlou puni,” twna sa the.

¹⁰Bumaengh rui ata zynna, mi kauh baanchara tei rui ata kauhmei chyngbut akhat twan khou phungc kulou the. Kumna Nthanmei Kaidai, Jerusalem tei Ravguangc khou rui tingkauh thangc rui keymei ta akhou lyanlou the.

¹¹Hei tei Ravguangc tuang hym rui titah ta e; hei tei kamanv kunghmei tauc kumc e, jaspar tauc kumc e, gunh bangv kumc nthan panglingh ling e.

¹²Mi kaidai raengc tei daic e, kauh e, raenghmun ruhna kanei nai e kumna kauh baanchara ruhna kaney rui gaek bam e. Raenghmun guay khou tei Isaraelmei kaikhwang ruhna kanei zanc hylou e.

¹³Neihpat thangc raenghmun kathumh, dihpy thangc raenghmun kathumh, dihba thangc raenghmun kathumh, neihkey thangc raenghmun kathumh nai e.

¹⁴Mi kaidai raengc tei kabam tauc ruhna kanei nai e. Mi guay khou tei Lauziu Nac tuang latdiutatmei nunc zanc hylou e.

¹⁵Mi kaidai, karaengcmun guay khatni karaengc tei ndat khang, akhou lat sa bammei kauh baanchara tei ramh saanv guanpui tuang kachaekc builwang sin bam e.

¹⁶Mi kaidai tei kasaeng kadai nchamc e. Kamei rui mi katuang ndatpui builwang tei rui mi kaidai tei ndat the: hei tei mail ching khat phay panguh saengc e, mi zu tei daic e khatni kakau ni hei tei lev nchamc muay e.

¹⁷Kamei rui raengh tei ni ndat re, kumna kauh baanchara tuang dath tei maansei tuang dath khou chowbuk phay khat riakdeina padeih kauh e.[7]

¹⁸Mi raengc tei jaspar tauc rui sw e, mi kaidai kahak tei nthanmei kachaekc rui sw e, maengzau kumc karang e.

¹⁹Mi kaidai raengc tuang kabam tauc guay tei kamanv kunghmei tauc zaatc guayna rui karuh e: reymei rui jaspar, kaneimei rui saphir, kathumhmei rui kalkidoni, padeihmei rui emeral,

²⁰panguhmei rui sardonik, charukmei rui sardi, chaneimei rui krisolai, tachatmei rui beril, chakiumei rui topaz, ruhmei rui krisoprasu, ruhna akhatmei rui jasin, ruhna kaneimei rui amethist, mi guay hei e.

²¹Raenghmun ruhna kanei tei mukta ruhna kanei e; raenghmun kathuic tei mukta akhat khat rui sw e. Mi kaidai tuang chaengdai tei nthanmei kachaekc rui sw e, hei tei mingsian kumcna how alamv e.

²²Mi kaidai khou tei ravkai how mak ge; kalam thu Poubauhmei Ngamparimei Racguangc khatni Lauziu Nac hei mi tuang ravkai kiu rap di the.

²³Mi kaidai tei tigaanclou khang bw neih kage nai dat mak khe; kalam thu Ravguangc riw rui mi khou tei gaanc e, khatni thauhmai kiu Lauziu Nac hei di the.

²⁴Kandihmei zaatc guay kariw khou tei lungc bam puni, kumna mbaanv tuang guangc guay kaniw tuang lanv mi khou tei phungc guang puni.

²⁵Mi kaidai tuang raengcmun guay tei neihmaryn mbangh zat mak ge; mi khou tei zingbangc maek ge.

²⁶Zaatc guay tuang tikgunc khatni lanv mi kaidai khou tei phungc guang puni.

²⁷Tiki mi khou tei nthan makmei, khatni meic chanypui taanv taanhpui mei khatni saraamhpui mei gaanv khat na sini gut lak ge. Lauziu Nac tuang ringhmei latrik khou kazanc naipui mei nunc na tei gut puni.