Read Rongmei Naga NDAUHLOUMEI 3 Bible Online

NDAUHLOUMEI 3 - Rongmei Naga bible

NDAUHLOUMEI 3

¹“Sardismei phwamling tuang baanchara khou mi hei hy o: “Mi hei, Ravguangc tuang bumaengc chanei khatni gaanchuangcna chanei sinmeipu tei rui samei lat re. Nang taanv guay tei ai thay e; nang hei ringhmei zanc thu phungc e, tiki theihmei de twmei ai thay e!

²Hei zaeng rui thau tho, theic changh mak khou nang khou naimei tei titanc thau tho. Nang taanv tei Ravguangc hu khou pian mak khe twmei ai how the.

³Nang khou dinclou kanmei khatni nang chu kanmei guay tei ningtow o; hei tei piu o, kumna lungh laic o. Nang zipthau makna bam e thei, ai kaihouhmei guang kumc guang puni, ai guang nimei ganv nang thay ni tu hamh e.

⁴Tiki kaniw tuang pheybaan sw mphuam makmei Sardismei nangniw pang khou meic gaanvsaekc nai e. Kaniw mphwanmei pwan piuna ai lev tat nchamc puni. Kalam thu kaniw mi khang hei biuhmei nunc e.

⁵Rihngammei nunc tei, mi hei kumcna mphwanmei pwan piu puni, kumna kaniw zanc ringhmei latrik khou rui thut maan dat lak khe. Ai rui, kaniw hei amei e twna aPu hu khou khatni katuang baanchara guay hu khou kauc ndauh puni.

⁶“Bumaengh rui phwamling guay khou samei hei nukuanc naimei guay chu la tho!

⁷“Philadelphiamei phwamling tuang baanchara khou mi hei hy o: “Mi hei nthanmei khatni nchumhmeipu rui sapui lat re. Kakhou David tuang khamvtaan nai e; kamei rui laanclou kan e thei meic gaanv khat na sini mbangh dat ngam mak khe, kamei rui mbangh kan e thei meic gaanv khat na sini laanc dat ngam mak khe.

⁸“Nang taanv guay tei ai thay e. Nang khou pumtan katitna nai e twmei ai thay e. Nang alatdyn piu the kumna atuang lwmnuhmei mei sw the. Ai rui nang khang kaikhamv laanclou kan the. Hei tei meic gaanv khat na rui sini mbangh dat ngam lak khe.

⁹Zauclo! Kaniw rana kaniw ta Jihudimei e twna samei kiuc thu kiuc hamhmei, saraamhmei, Seitaan tuang mei nunc ta tei kaw guangna nang hu khou ti-nkhum key puni. Ai nang ta nzian e twmei kaniw thay puni.

¹⁰Khaengvthay o twna ai rui nang khou samei tei nang piupui zaeng rui, kandihmei guay ta nchanv khang mbaanv kapwm khou ryanramei tiguangmei ganv khou kiu, ai rui nang ta kanlou puni.

¹¹Ai guang zaic puni the. Nang tuang swanpyrun tei meic gaanv khat na rui sini swmaan mak khang, nang khou naimei tei sin ntipna sin bam o.

¹²Rihngampui mei ta tei ai rui aRacguangc tuang ravkai tiangc akhat tiswlou puni, kumna kamei mi khou tei rui tat pat dat lak khe. Ai rui kakhou aRacguangc zanc, Ravguangc khou rui tingkauh thangc rui keymei, aRacguangc tuang kaidai, Jerusalem thanh zanc, khatni azanc thanh hylou puni.

¹³“Bumaengh rui phwamling guay khou samei hei nukuanc naimei kathuic chu la tho!

¹⁴“Laodikiamei phwamling tuang baanchara khou mi hei hy o: “Mi hei Amen twna kawmeipu, kalat suai makmei nchumhmeipu, Ravguangc baansyam kaguayna tuang bangbi[1] kamei rui sapui lat re.

¹⁵Nang taanv guay ai thay e; nang hei nchu ni nchu mak ge, chaengc ni chaengh mak ge twmei ai thay e. Nang nchu ni thei nchu kham, chaengc ni thei chaengc kham tw e thei gay ni tuang e!

¹⁶Nang hei chaenghmei ni hamh, nchumei ni hamhna manuankuanpui zaeng rui, nang ta amwang khou rui mphiu pat puni the!

¹⁷‘Ai lungcgay de, akhang ramh gaat tuang maek ge’ twna nang sa e. Tiki nang lwnlung ta nang thay mak ge! Nang hei lungcsimei e, pheybaan maekmei e, khatni mik tiatmei e twmei nang thay mak ge.

¹⁸Nang lungcgay khang akhou rui kachaekc nthanmei liu o; nang paliucna zakna bammei tei duamliam khang mphwanmei phey akhou rui liu o, khatni nang mik how khang nang mik khou lou khang puc akhou rui laa o.

¹⁹Ai nzianmei guay ta luh e khatni riaplou e. Hei zaeng rui nangniw lungh gut ro, kumna lungh laic o.

²⁰Zauclo! ai chaengmun khou dingna kaikhamv nchow bam e. Thow pw ni akhwan chuna kaikhamv laanclou e thei, ai kakhou gutna kamei lev tu nchamc zangv nchamcna bam puni.

²¹Ai rihngamna aPu lev kaguangc bamvpaeng khou dungc nchamcmei kumcna, rihngammei nunc ta tei aguangc bamvpaeng khou adaeng khou tidungclou puni.

²²“Bumaengh rui phwamling guay khou samei hei nukuanc naimei kathuic chu la tho!”