Read Rongmei Naga NDAUHLOUMEI 4 Bible Online

NDAUHLOUMEI 4 - Rongmei Naga bible

NDAUHLOUMEI 4

¹Mi tangv ndawman akhat khou, tingkauh thangc kaikhamv laanclou bammei ta ai how e. Bianggun khwan kumhmei, akhou sa guang reymei khwan tei rui, “Mi khou hei ku o; guang punimei tei ai nang khou lyanlou puni,” twna samei ai chu khwan e.

²Mi dyng khou tei ata Bumaengh rui zyn the. Khoutei tingkauh thangc guangh bamvpaeng akhat how e; mi khou tei gaanv khat dungc bam e.

³Kazawpaanv tei jaspar khatni karnelia tauc kumc karang e, kumna guangh bamvpaeng tei emeral tauc kumhmei muangsingc souc ngguic bam e.

⁴Guanghbamvpaeng nchuihna padeih mi guangc bamvpaeng daeng khou tei lou nkuay bam e. Kumna mi guangc bamvpaeng guay khou tei phey mphwanmei piuna kachaekc tuang guanghpyrun runmei gaanvthaih nchuihna padeih dungc bam e.

⁵Guanghbamvpaeng khou tei rui tingpalik pat re khatni mi khou tei ganhkeymei khwan mpeyna chu e. Guanghbamvpaeng hu khou tei mairam chanei daanclou bam e. Hei tei Ravguangc tuang bumaengc chanei e.

⁶Guanghbamvpaeng hu khou tei kangranh ranmei maengzau tuang duipui kumhmei nai e. Kathei kahu kamik ranamei khouringh padeih rui mi guangc bamvpaeng tei bam haengv bam e.

⁷Reymei tei kamangliangpui kumc e; kaneimei tei guaichic launa kumc e; kathumhmei tei kazaw maansei zaw kumc e; padeihmei tei samc bammei mou kumc e.

⁸Mi khouringc padeih tei kaswkaeng charuk charuk nai e, khatni kalungc kapaengc kamik rui padik ge. “Nthanmei, nthanmei, nthanmei, nai bam khwanmei, nai bammei, nai bam punimei, Ngamparimei Poubauhmei Ravguangc,” twna kaniw zingbangc kalaanv taek makna suan bam e.

⁹Mi khouringh padeih tei rui, guangh bamvpaeng khou dungc bammeipu, tingsaeng ringc bammeipu ta hymthuancna, chakhwang champouhna khatni thuanckuna suan bam khou,

¹⁰gaanvthaih nchuihna padeih tei guangh bamvpaeng khou dungc bammeipu hu khou tei nkhum laamv keyna tingsaeng ringc bammeipu ta tei kalum e. Kaniw tuang pyrun kahu khou loukeyna,

¹¹“Aniw Kaipouc khatni aniw Racguangc, Nai bammei katana damcloumeipu, kachwnphuakh rui ramh katana damclouna tinai bammeipu, Hymdaihmei, chakhwang champouhmei, khatni pumtan hei nang khang e,” twna suan bam e.