Read Rongmei Naga NDAUHLOUMEI 6 Bible Online

NDAUHLOUMEI 6 - Rongmei Naga bible

NDAUHLOUMEI 6

¹Lauziu Nac tei rui seal chanei khou tei reymei tei swbak patmei ta ai how the. Khoutei khouringh padeih pang khou tei rui akhat rui ganhkeymei khwan kumcna “Pat tho!” twna samei ai chu the.

²Khoutei ai zauc the, kumna takuanh mphwanmei akhat pat the. Mi khou tei tuanghmeipu tei sauhpai sin e khatni kakhou guanghpyrun tiilou kan e. Kamei ngammeipu swna ngam khang tat pat kan the.

³Lauziu Nac tei rui kaneimei seal tei swbak pat pwkhou, kaneimei khouringc tei rui “Pat tho!” twna samei ai chu the.

⁴Khoutei takuanh haenghmei akhat pat the. Mi khou tei tuanghmeipu khou tei kandih khou rui chuzaenghmei laa pat khang tiilou kan the. Mi kiu maansei guay khat rui khat ta swluai khang e. Kakhou baengsaeng daihmei tiilou kan the.

⁵Mi tangv Lauziu Nac tei rui kathumhmei seal tei swbak pat pwkhou, kathumhmei khouringc tei rui “Pat tho!” twna samei ai chu the. Ai zauc the, khoutei takuanh miwmei pat the. Mi khou tei tuanghmeipu tei duh sin e.

⁶Khouringh padeih pang khou tei rui meic khwan kumcna, “Zaeng neih khat phy gehu haandwang akhat, khatni neih khat phy siupian haandwang kathumh. Tiki Olive bang lev drakha bang guay tei thu sw kasih rio!” twna samei ai chu e.

⁷Lauziu Nac tei rui padeihmei seal tei swbak pat pwkhou, padeihmei khouringc tei rui, “Pat tho!” twna samei ai chu the.

⁸Ai zauc pw ki takuanh nzinh ndavmei akhat pat the. Mi khou tei tuanghmeipu zanc tei Theihmei kaw e, kumna kathei khou Taruaih[3] lay guang e. Suc rih rui, nap nkowmei rui, ravpyan rui, khatni nwmbangc khouringc rui, kandih kadam padeih khou akhat ta swluai khang kaney khou ngamv tiilou kan the.

⁹Lauziu Nac tei rui panguhmei seal tei swbak pat pwkhou, Ravguangc lat piupui zaeng rui khatni dinhpui zaeng rui swluai kanmei bumaengc nunc tei ravchabamv bangc khou bammei ta how e.

¹⁰“Ngamparimei Poubauhmei, nthanmei khatni nchumhmeipu! Kandih khou lungc bammei nunc ti hei latzan sw makna khatni aniu zei tuang khwm laa makna asaanh lou bam ni hena cho?” twna kaniw kauc bam e.

¹¹Kaniw kathuic khang tei pheychuanh mphwanmei tiilou the, kumna siamruaimei khatni chana nunc ta tei kaniw ta kumcna swluai nimei sing tei swluai ntangh mak saanv nkhwan kanaklou khang kaniw khou kadylou kan the.

¹²Lauziu Nac tei rui charukmei seal tei swbak pat pwkhou, baengla dai zaymei ta ai how e. Neihmik pheymiw kumc miw kan the khatni bw zei kumc haengc kan the.

¹³Puanzingh rui tadutthai kanuk key kumc gaanchuangcna guay kandih khou taekkey the.

¹⁴Latrikzy kazih kumc tingpuk kazih gut kan the, chyngbut khatni duipui kandic guay maan ngam the.

¹⁵Kandih tuang guangc guay, dihsinpouc guay khatni rihpy guay, lungcgaymei khatni ngammei guay, bangh khatni nyngswmei guay, meic katana chyng tuang khowlang tauhlang khou dup the.

¹⁶Kaniw rui chyngbut khatni khowlang khou, mi kumna kauc the, “Aniu ta pangv binlouna guangh bamvpaeng khou dungc bammeipu hu khou rui khatni Lauziu Nac lungpuam khou tei rui nkamhlou o!

¹⁷Kaney tuang lungpuamdai keylou nimei tingmik kiu guang pw the, meic gaanv khat na sini dingchaek ngam ni tu hamh the.”