Read Rongmei Naga NDAUHLOUMEI 8 Bible Online

NDAUHLOUMEI 8 - Rongmei Naga bible

NDAUHLOUMEI 8

¹Lauziu Nac tei rui chaneimei seal tei swbakna laanc pat pwkhou, tingkauh thangc ganvdak paekri dou rimh rim bam khwan e.

²Khoutei, Ravguangc hu khou ding bammei baanchara chanei ta ai how the, kumna kaniw khou bianggun chanei tiilou kan the.

³Baihmei kauh baanchara gaanv khat, kachaekc tuang agawkuak sinna ravchabamv daeng khou guang ding the. Nthanmei nunc tuang ravsuai mi khou tei louna, guangh bamvpaeng hu khou naimei kachaekc ravchapaeng khou tei katlou khang, kakhou agaw mpeyna tiilou kan the.

⁴Agaw maikhou tei, Ravguangc hu khou ding bammei kauhbaanchara baanc khou tei rui nthanmei nunc tuang ravsuai thei lay khou ku the.

⁵Mi tangv kauh baanchara tei agawkuak akhat laana, mi khou tei ravchabamv tuang maithyn lou padikna, hei tei kandih ramc khou bun key the. Khoutei ganhkeymei khwan rui kachin karo the. Ting palik the khatni baengla zay the.

⁶Khoutei kauh baanchara gaanv chanei bianggun chanei muan khang chamdaanv bam the.

⁷Reymei kauh baanchara tei rui katuang bianggun muan the. Khoutei nrihthai khatni mai, zei kazauhna kandih ramc khou bun key the. Kandih kadam kathumh patna akhat thu, thing- bang khatni nuy ndiakcmei guay raw ngam the.

⁸Kaneimei kauh baanchara tei rui katuang bianggun muan the. Mai chuangc bammei chyngbut tadirapmei kumhmei akhat duipui khou phaic key kan the. Khoutei duipui kadam kathumh khou akhat zei guanh the.

⁹Khoutei duipui khou naimei khouringc kadam kathumh khou akhat theic the, rungh kadam kathumh khou akhat swmaan the.

¹⁰Kathumhmei kauh baanchara rui katuang bianggun muan pwkhou, gaanchuangcna daihmei, mairam bwang kumcna tingpuk thangc rui taek keyna duiriang guay kadam kathumh khou akhat, khatni duipuakkai guay kadam kathumh khou akhat khou keylou the.

¹¹(Mi gaanchuangcna zanc tei “Nkhucmei” twna kaw e.) Dui guay kadam kathumh khou akhat thu nkhuc the. Dui tei nkhuc tipui zaeng rui, mi dui tei zangvmei meic mpeyna theic the.

¹²Padeihmei kauh baanchara tei rui katuang bianggun muan the. Neihmik kadam kathumh khou akhat, bw kadam kathumh khou akhat, khatni gaanchuangcna kadam kathumh khou akhat kabiu the. Kumna kalaanv ni, zingbangc ni kadam kathumh khou akhat thu gaanh mak khe.

¹³Mi tangv, tingpuk kauh khou eagal mou akhat samc bammei ta ai how e. Hei tei rui kaucna sa the, “He meicpingpui tuang e! Meic pingpui tuang e! Baihmei bianggun kathumh hei muan pwkhou mbaanv ramc khou lungc bammei guay khou patlou punimei hei meicpingpui tuang e!”