Read Rongmei Naga RUT 2 Bible Online

RUT 2 - Rongmei Naga bible

RUT 2

¹Naomi gaanv kaikhwangmei, kazanc Boaz kawmei, lungcgaymeipu gaanv khat nai khwan e.

²Zaeng neih khat Rut rui Naomi khou sa the, “Lautay kathowloumei khuaih khang ai lau thangc tat ni he. Ata zauc nzianlou pw nimei meic ariw pw khang lwmgay e.” “Alule, tat zauc tho,” twna Naomi rui daw the.

³Rut rui laupuk thangc pat lana lau taymei nunc rui tay kathowloumei lautaymei nunc thei khou khuaic ngangh the kamei tat bammei lau tei Boaz tuang laupuk bam khwan e. Boaz hei Elimelek tuang kaikhwangmei nunc khwan e.

⁴Kanakc khat twmei tangv Boaz Bethlehem thangc rui guangna lau taymei nunc khou tei “RINGHPOUC ruina nangniw ta nduanghlou diu o” twna chaengriw lat sa riwlou the. “RINGHPOUC rui nang ta suaihiamlou diu o,” twna kaniw ni mundaw the.

⁵“Mi puiliauh tei thow cho?” twna Boaz rui taanv pypu khou tei thanv the.

⁶Mipu tei rui daw the, “Kamei ginluc e, Moab thangc rui Naomi theilay guangmeipui e.

⁷Lau taymei nunc theilayna tay kathowloumei khuaic nii e twna akhou ney the. Kamei lauthwan zaihmei ganv khou rui thauna khuaic guangna ntaw na nthaekc khang ramhswng bangc khou dungc key bammei tuang e.”

⁸Khoutei Boaz rui Rut khou sa the, “Alule ai nang khou lat akhat sa nii e. Mi laupuk khou hamhna baih thangc nang khuaic tat nangh e. Mi khou lau taymeipui nunc thei hei layna khuaic tho;

⁹kaniw rui tay bammei bamv tei zaucna kaniw thei tei layna laa tat tho. Nang ta swzinza mak khang amei nunc khou kadylou kan the. Nang tari ri khou kaniw tuang duilai khou rui guang zangv o.”

¹⁰Rut tei kazaw kandih nkhum key tangcna kumna Boaz khou sa the, “Tabui swna nang akhang heidi lungh sucna kaphianhlou bam nina cho? Tabui swna nang rui ginluc ata heidi zauc nzianlou bam nina cho?”

¹¹Boaz rui daw the, “Nang gaanv theihmei tangv nang rui nangneic khang swlou kanmei guay tei ai chu the. Nang rui nang pui nang pu khatni nang kandih ganclouna nang thay zat makmei pang khou lungh khang guangmei hei ai thay the.

¹²Nang rui taanclou kanmei khang tei RINGHPOUC rui swan tiilou diu o. RINGHPOUC Isaraelmei Racguangc kakhou nang rui guang duploumeipu rui swan geicna tiilou diu o!”

¹³Rut rui daw the, “Akaipoucle, nang rui ata heidikamv zauc nzianlou the. Ai hei nang bangc akhat kumhmei sini hamh e, tiki nang rui akhou nzianna kachucloumei rui ata tineihlalou the.”

¹⁴Tu zangvmei ganv guang pwkhou Boaz rui Rut khou sa the, “Guangna ntyan katit na sini mbap zauc o, mi tingthai huai khou hei ntinna tu tho.” Kumna kamei lau taymei nunc tei lev dungc key nchamc the kumna Boaz rui nap saaloumei asaekc kakhang tii the. Kamei tu ngguna tu the, kumna tu ngam lakna nsaekclou the.

¹⁵Kamei napguy khuaih khang tat dat kan pwkhou Boaz rui lau taymei nunc khou tei sa the, “Napchu naimei bamv khou nganvna khuaic kan diu kata mphutlou riu.

¹⁶Hei na hamhna napchu khou rui sini sat patna ganclou tio.”

¹⁷Kumna Rut tei tingzyn nganv khuaic the, kumna kamei hei tei dy pat ki kilogram ruh dou tangc the.

¹⁸Kamei rui hei tei kaidai thangc phungc guangna azuh laaguang cho twmei kaneic khou lyanlou the. Kamei tu-nsaekc guangmei napdwam tei ni kaneic khang tii the.

¹⁹Naomi rui kakhou kumna thanv the, “Mi zuzumei hei nang tabui thangc rui khuaic lana cho? Thow lau nang tat lana cho? Nang khang zaucloumeipu khou kiu Ravguangc rui suaihiamlou diu o!” “Boaz twna kawmeipu lau khou tat lana the,” twna Rut rui Naomi khou sa the.

²⁰Naomi rui sa the, “Boaz ta Ravguangc rui suaihiamlou diu. RINGHPOUC thu theihmei khou ni ringhmei khou ni kalatdyng ngaekna bam e. Mipu tei akai lev ana dianghmei the, anei ta zauclou nimei akhat the.”

²¹Khoutei Rut rui sa the, “Lau tay luai mak saanv kabangc nunc thei khuaicna bam o twna kamei rui akhou sa e.”

²²Naomi rui Rut khou sa the, “Ngguay, alule, Boaz laupuk khou tei meicpui nunc tei lev tat bammei rui gay the. Nang meic ramcmei laupuk thangc tat bam ti thei nang ta swzin swzalouna sini bam pwng e.”

²³Kumna Rut tei sipian lev gehu tayluai mak saanv kaniw pang khou tatna nap tei khuaic the. Heikumna kamei kaneic lev lungc bam khwan e.