Read Rongmei Naga RUT 3 Bible Online

RUT 3 - Rongmei Naga bible

RUT 3

¹Hei tangv tei Naomi rui Rut khou sa the, “Nang ni nang tampy naina lungc dat khang ai nang gaanv khang kasuihlou dat ni the.

²Kabangcpui nunc lev nang taanvtaanc nchamcmeipu Boaz tei aney riangluaic the. Aseic zingbangc hei kamei sipian dy bam puni e.

³Kumna duilow nthan thiakh thiakna, mwnduithauc teyna nang tuang pheybaan gaymei tei piu tho. Kumna kamei lau dy bammei bamv khou tei tat tho, tiki kamei tu tang zangv tang kan mak saanv nang bam e twmei tithay riu.

⁴Kamei zipmei bamv tei thaylou tho, kumna kamei zipri kan e thei guangna pheysap tei laanc thauna kaphay daeng khou zip key tho. Nang tabui sw nina cho twmei kamei rui salou puni.”

⁵“Nang rui sa samei tei ai taanc ni the” twna Rut rui daw the.

⁶Kumna Rut tei laudy bamv thangc tei tatna kaneic rui nchamloumei kahak tei taanc the.

⁷Boaz tei tuzangv tang pwkhou kamei neihla liauh liauna bam the. Kamei napthai napkhuan thangc tatna mi khou tei zip kan the. Kumna Rut tei asuaicna lap gutna pheysap tei laanc patna kaphay daeng khou zip key the.

⁸Zingbangc thay mak daekna zipchiang thau pwki mi khou tei ntumeipui akhat zip bammei ta ruph rupna ariw the.

⁹“Nang thow cho?” twna kamei rui thanv thau the. “Ai hei nang bangcpui Rut de, nang bangcpui aruc khou ni nang phey baanv key tangc lou o. Ata zaythau zaybam lou nimei kiu nang hei di the.”

¹⁰Kamei rui sa the, “RINGHPOUC rui nang ta suaihiamlou diu.” “Nang rui nangneic khou swloumei tei suangc sini ntaw nang rui sw bammei hei rui kaikhunh ta nzian daic ranvna lyanlou e, lungcgaymei ta bu ny lungcsimei ta bu ny chabwan chanaw nunc ta zauc tat nuhmei tuang dyng e tiki nang hei tei sw mak khe.

¹¹Rutle, ntaw thu lungh geic dat ri tho. Nang rui samei guay tei ai taanclou puni the, kalam thu nang hei kachangc thaymeipui e twmei mi namvdai khou bammei meic naina rui ni thay the.

¹²Ai hei nang khang dianghmei riangluaic changh the kumna nang ta kakhauh rap nimei thouc ni di the, tiki akhang suangc diangc ranvmei ni nai di he cho.

¹³Aseic zingbangc thu mi khou hei bam tho, kumna nthuanh tinggaanc pwkhou rui kamei kiu rui kakhauh ni ny kakhauh lak ny thay nthan di kho. Kamei rui kakhauh nii e thei ni gay the; kum mak ge thei ni ai rui kakhauh puni the twmei hei ringc bammei Racguangc zanc khou latdyng swmei tuang the. Ntaw thu tinggaanh mak saanv mi khou hei zip bam tho.”

¹⁴Kumna kamei kaphay daeng khou zip gaanc the, kamei maansei lwn how pat nthan mak khou rui zip thau the. Boaz rui sa the, “Mi lau dy bamv khou hei ntumei guang lou e twmei meic nunc rui thay mak kan diu.”

¹⁵Boaz rui kakhou sa the, “Nang tuang thiula daihmei tei luak patna khou hei bamc keylou o.” Kumna kamei bamc keylou pwkhou kamei rui sipian kilogram 20 dou bunkeylouna Rut bou khou puanc thaulou the. Khoutei kamei hei tei phungcna kaidai thangc hanc guang dat the.

¹⁶Kamei kai guang dat pwkhou, “Alule, akumh the cho?” twna kaneic rui thanv the. Boaz rui kakhang swloumei guay tei Rut rui kaneic khou raclou the.

¹⁷“Ai pumtang guang dat nuh mak ge twna, kamei rui mi puat hei swloumei tuang the” twna kamei rui raclou the.

¹⁸Naomi rui kakhou sa the, “Rutle, mi guay hei guang tangh mak saanv nkhwanna bam o. Boaz tei reih rei bam ngam ni tu hamh the, kamei aseic mi latbamv hei luailou khang sw puni e.”