Read Rongmei Naga 1 SAMUEL 1 Bible Online

1 SAMUEL 1 - Rongmei Naga bible

1 SAMUEL 1

¹Kazanc Elkana twna kawmei Ephraim kaikhwangmei Ephraim tuang chyngramv khou Rama kaidai khou lungc bammei gaanv khat nai khwan e. Kamei hei Jeroham nac e, kapouc rui Elihu e, khatni Zup kaikhwang khou Tohu puinacmei khwan e.

²Elkana kanow kaney— Hanna khatni Peninna nai khwan e. Peninna thu kanac nai geic khwan e, tiki Hanna thu kanac maek khwan e.

³Elkana tei Eli nac mpouh Hophni lev Phinehas rui RINGHPOUC tuang amuh swna bammei bamv Shilo khou Ngamparymei RINGHPOUC khou khaeng khang tingkwm pum Rama khou rui guang bam khwan e.

⁴Elkana tei kamei ravkhaengmei kathuic, khaengmei zanc tei Peninna lev kanac mpouh aluh guay khang tei kadam damc tanh tan khwan e.

⁵Kamei rui Hanna ta nzian sih khwan sini kakhang tei kadam akhat na damclou the, kalam thu RINGHPOUC rui kakhou ngana tiilou mak khwan e.

⁶Peninn rui kata raina tizak bam khwan e, kalam thu RINGHPOUC rui kakhou ngana tiilou mak khwan e.

⁷Hei tei kumcna tingkwm geic sih tat key bam khwan the. Kaniw RINGHPOUC kai thangc tatmei kathuic Peninna rui Hanna lung tikabiulou tina kapna tu zangv makna lungc bam khwan e.

⁸Kagaanv Elkana rui Hanna khou thanv the, “Hannale, tabui swna nang kap bam tu cho? Tabui swna nang tu mak zangv makna bam tu cho? Tabui swna nang heidikamv lungh ryanra bam tu cho? Ai hei nang nac mpouh ruh suangc sini gay mbumei hamhna cho?”

⁹Zaeng neih khat Shilo khou RINGHPOUC kai khou kaniw tu zangv tangna Hanna ding thau the khatni kapumc kahak RINGHPOUC mav khou guang the. Mi ganv khou tei amuh Eli tei kabamv khou kaimun daeng khou bam khwan e.

¹⁰Kamei tei kalung kabiuna RINGHPOUC khou huayneyna kapranv sih kap the.

¹¹Hanna rui kumna latdyng tanhmei sw bam khwan e, “He Ngamparymei RINGHPOUC nang bangc atuang ryanra kalanghmei zauclou o! Ata amuclou rio! Nang rui akhang nah mpouh akhat tiilou pw e thei ai rui nang khang kapanty kapwm tiipat dat ni khatni kasam guat zat lak ge twna nang khou latdyng sw the.”

¹²Hanna tei kaganv tingsaengc sihna huayney bam khwan the, kumna kamwang kalap bammei ta Eli zauc bam khwan e.

¹³Kamei reih reina, kakhwan pat makna kamwang kalungna huayney bam khwan e. Mipui tei zouh zangv mba lana khwang the twna Eli rui kakhanhna

¹⁴kamei rui kumna sa the, “Nang asaanh kumna zouh zangv mbana bam ni hena cho? Mba taan tho, mphaengv pat tho.”

¹⁵Kamei rui daw the, “Kaipouc, ai zouh zangv mba mak ge. Ai zouh zangv mak ge! Ai hei ningmei guang tangh makna ryanra kalangh bammei ntumei akhat re aram ryanra RINGHPOUC khou bun patna huayney bammei tuang e.

¹⁶Ai hei kachangh pat lakmeipui e twna ninglou rio. Ai ningmei tangh makmei zaeng rui heikumna huayney guangmei tuang the.”

¹⁷Khoutei Eli rui sa the, “Zuh zuna tat tho, nang rui neymei tei Isaraelmei Racguangc rui tiilou pudiu tho.”

¹⁸“Nang bangcpui ta zauc nzian tanh tanlou o” twna kamei rui sa the. Khoutei rui kamei pat lana, kagaanv lev tu zangv the, kumna lungh ryanra dat mak khe.

¹⁹Nthuanh lauthwan Elkana khatni kakai kaikhuncmei tei zipthau zaicna thauna, RINGHPOUC ta kalum tang lana, kaniw Rama thangc hanc guang dat the. Elkana rui kanow Hanna khou tatlou the kumna RINGHPOUC rui karavsuai dawlou the.

²⁰Kumna kamei kapumc nritna nah mpouh gaanv khat puanc the. “Ai rui neymei tiiloumei tuang the” twna kamei rui kazanc Samuel twna phuaklou the.

²¹Elkana khatni kakai kaikhunc tei Shilo thangc tat lana tingkwm tuang khaengmei khatni kamei rui latdyng swloumei tuang nkunmei puatkat khang khaeng tat nipui ganv guang dat the.

²²Tiki mi lwan khou hei Hanna thu tat mak khe. Kamei rui kagaanv khou, “Ngana hei nouc taanpui lev, ai rui kata RINGHPOUC kai thangc nduangh guanglou ni the, mi khou tei kapanty saanvsaengh bam kan di tho” twna sa the.

²³Elkana rui daw the, “Gay the, nang rui gay pwng e twmei kiu sw tho; kata kiuc nouc taan mak saanv kai khou kiu bam tho. RINGHPOUC rui kalatryan tiguang tangclou pu di tho.” Kumna Hanna kai khou bam ducna kanac ta makuat bam khwan the.

²⁴Ngana tei nouc taan pwkhou, kamei rui kata nduanghna, tingkwm kathumhmei guaichiclauna, ntyan buay handwang ruh, drakhadui guaihgic muanc padikmei akhat lev phungcna Shilo thangc tat the. Kamei rui Samuel ta alauc sihna Shilo khou RINGHPOUC kai khou nduangh guang the.

²⁵Guaih tei dowluaina, ngana ta tei Eli daeng khou nduangh guang the.

²⁶Hanna rui kakhou sa the, “Poubauhmei, ai hei mi bamv khou hei dingna RINGHPOUC khou huayney bammei ta nang how kanmeipui tei the.

²⁷Ai rui kakhou mi nac khang ney bam khwan e, kumna ai neymei tei kamei rui tiilou the.

²⁸Kumhpui zaeng rui ai rui kata RINGHPOUC khou katgutlou datmei tuang the. Kamei ringh saanv RINGHPOUC tuang sw kan di tho.” Khoutei kaniw RINGHPOUC ta kalum the.