Read Rongmei Naga 1 SAMUEL 10 Bible Online

1 SAMUEL 10 - Rongmei Naga bible

1 SAMUEL 10

¹Samuel rui Olive thauc haan laa patna Saul py khou bunlouna kata kaputna sa the, “RINGHPOUC rui nang ta kamei Isaraelmei nunc tuang guangc swna thauh teylou the. Nang rui kamei nunc ta sin puni the khatni kaniw ta zauczihmei nunc khou rui nang rui kaniw ta gaek puni the. RINGHPOUC rui nang ta kamei nunc ta sin khang kadahlou the twmei nang thay nimei thu:

²Aseic hei nang akhou rui tat pat pwkhou Benjamin ramv lungc khou Zelza khou Rachel tuang tarou daeng khou nang meicpu gaanv nei ta ariw puni. Nang rui phu bammei kuanniam nunc tei ariw dat the kumna nang pu tei mi khang tei rui lungh geih dat mak khe, tiki nang khang rui lungh geicna di the, ‘Anacpu ta tei ai tabui sw nina cho?’ twna sa bam rapna di the twna kamei rui nang khou salou puni.

³Mi khou tei rui nang tat thau datna Tabor khou nthanmei thingbang tei guang tangc pwkhou Ravguangc khang khaeng nina Bethel thangc tat bammei meic gaanv thumh ta ariw puni. Gaanv khat rui ziuhnac kathumh gaengc bam puni, gaanv khat rui ntyan dwm kathumh phungc bam puni, kumna gaanv thumhmeipu tei guaihgic khau khou drakhadui lou padikna phungc bam puni.

⁴Kaniw rui nang ta chaengriw lat salouna ntyan dwm kanei nang khang tii puni, hei tei nang laa puni.

⁵Mi tangv tei Gibea khou naimei Ravguangc tuang chyng, Philistinmei nunc rihgaekkai naimei bamv khou tei nang tat puni. Muhzwng kang akhat nrah, alim, nkhuangh baza chinh chinna chyngbut tuang ravchabamv khou tei rui keymei ta namvdai tei gut nimei mun khou nang ariw puni. Kaniw tei kaucna alaamhna bam puni.

⁶Thay mak daekna RINGHPOUC tuang bumaengc rui nang ta sinna, nang ni kaniw lev twna ravmun dinc puni, kumna nang hei meic baihmei sw puni the.

⁷Mi guay hei guang tangc pwkhou, nang taanh khang kazimei Ravguangc rui zayloumei kathuic tei taanc o.

⁸Ai rui rawna khaeng nimei khatni alamvpuatkat tii nimei bamv Gilgal khou tei ai nang ta ariw puni, kumna nang mi khou tei tat rey puni the. Ai mi khou tei guangna nang tabui sw nina cho twmei salou mak saanv nang mi khou tei zaeng chanei nkhwan bam o.”

⁹Saul tei Samuel khou rui tat dat khang karih pat rap pwkhou Ravguangc rui Saul khou lungning kathanc akhat tiilou the. Samuel rui kakhou saloumei kaguayna tei mi tingmik nungc tei pat the.

¹⁰Saul tei kabangcpu lev Gibea khou guang tangc pwkhou muhzwng kang akhat kata ariw the. Dyng mak khou Ravguangc bumaengc kakhou guanglouna, ravmun dincna alaamhna tat bammei khou tei kamei ni lay kazauh the.

¹¹Kamei kumna sw bammei tei kata thaymei nunc rui how lana khat khat khou kumna sa the, “Kis nac mpouh khou hei tabui sw ti thena cho? Saul hei muhzwng sw thena cho?”

¹²Mi khou tei bammei gaanv khatpu rui sa daw the, “Mi baihmei muhzwng nunc pu thu thow dina cho?” Mi khou tei rui “Saul muhzwng sw thena cho?” twmei latchap hei pat kanmei tuang e.

¹³Saul tei ravmun dinc tang lana kamei chyng khou ravchabamv khou tat the.

¹⁴Saul pulauc rui Saul khatni banghpu ta tei how lana, “Nangney tabui thangc tat lana cho?” twna thanv the. “Kuanniam nunc ta tei phu tat lana e; hei tei phutow mak khena anei Samuel ta ariw tat lana the” twna Saul rui daw the.

¹⁵“Kamei rui nangney khou tabui lat salou bu cho?” twna Saul pulauc rui thanv the.

¹⁶“Khouringh nunc tei thu phutow dat kan the twna kamei rui sa the,” twna Saul rui daw the. Kum e tiki guangh sw nimei lam khou Samuel rui samei tei thu kamei rui kapulauc khou salou mak khe.

¹⁷Samuel rui meic nunc ta Mizpa khou RINGHPOUC khou kaw guang kariuna

¹⁸kaniw khou sa the, “RINGHPOUC Isaraelmei Racguangc rui kumna sa the, Ai rui nangniw ta Izip khou rui nduangh patlou the. Kumna Izipmei nunc khatni nangniw ta rai bammei baihmei guay khou rui ai rui nangniw ta kan patlou the.

¹⁹Ai hei nangniw Racguangc, nangniw ryanra ryanriuna lungc thuy lakna bammei khou rui nangniw ta kanloumeipu e, tiki aseic nangniw ata ganc lana nangniw khang guangh tiilou o twna ney bam e. Gay the, ntaw thu nangniw kaikhwang kaikhwang, puinac puinac langv langv swna RINGHPOUC mav khou guang kaduai tho.”

²⁰Samuel rui kaikhwang kathuicna ta tei tiguang the, kumna RINGHPOUC rui Benjamin kaikhwang ta san zaucna kadah pat the.

²¹Mi tangv tei Samuel rui Benjamin kaikhwangmei kaikhunc guay ta tiguang the, kumna Matri kai kaikhunc ta san zaucna kadah pat kan the. Nkhamh khou Matri kai kaikhuncmei nggaanvmei nunc pat the, kumna Kis rui puanhmei mpouh Saul ta san zaucna kadah pat the. Kaniw kata phu the, tiki mipu tei bam mak khe.

²²“Kamei mi khou hei guang mak hena cho?” twna kaniw rui RINGHPOUC khou thanv the. “Saul hei thangc tei puatc khuanloumei thei khou dup bam e,” twna RINGHPOUC rui daw the.

²³Kumna kaniw pak tat lana Saul ta tei meic pang khou nduangh guang the, kumna kamei tei meic pang khou rui ding kauh taph tap the.

²⁴Samuel rui meic nunc khou sa the, “Mi hei RINGHPOUC rui kadah patloumeipu kiu the. Aniu pang khou kamei kumhmei meic baihmei maek khe.” “Guangh ringcsaengc o,” twna meic nunc rui kauc the.

²⁵Samuel rui meic nunc khou tei guangh tuang ngamv khatni kathouc guay dinclou the, kumna hei tei buk khou hy keylouna nthanmei bamv khou lou kan the. Mi tangv tei kamei rui meic kathuicna ta kakai kai thangc thouclou dat kan the.

²⁶Saul ni kakai Gibea thangc tat dat kan the. Tancbauhmei Ravguangc rui kaniw lung kahilou kanmei meic gaanvsaekc kamei lev tat nchamc kan the.

²⁷Tiki “Mipu hei rui aniu khang tabui swlou pw nina cho?” twna sinsw nuh makmei meic gaanvsaekc rui khanc the. Kaniw Saul ta thouh sw mak khe, kumna kakhang kaipat akhat na sini phungc guang mak khe. Tiki Saul thu reih reina bam khwan e.