Read Rongmei Naga 1 SAMUEL 11 Bible Online

1 SAMUEL 11 - Rongmei Naga bible

1 SAMUEL 11

¹Bw akhat dou tangv, Ammonmeipu Nahas rui nganghna Jabes Gilead ta dingbin the. Jabesmei nunc “Aniu lat gay dikho, nang ta aniw guangc swna laa ni the” twna Nahas khou sa the.

²Nahas rui sa the, “Nangniw meic kathuicna tuang nzat biak mikthw tei lat ganc lana Isaraelmei ta tizaklou tangv pwkhou rui ai nangniw lev lat gay puni.”

³Jabesmei kapy nunc rui sa the, “Isarael kandic kapwm khou chamv titat nuh khang zaeng chanei tiilou o. Aniw ta meic gaanv khat na rui sini nkhavlou mak ge thei, aniw nangniw khou gutlou puni the.”

⁴Chamv tei Saul bammei bamv Gibea khou guang tangc the, kumna kaniw rui mi chamv tei dinclou pwkhou meic nunc tei kauc ranvna kap the.

⁵Saul tei katuang guaituamchic nei nduanghna laupuk thangc rui guang rap lana “Meic nunc rui kap bammei hei tabui sw thena cho?” twna thanv the. Jabes thangc rui chamv phunghmei nunc rui phungc guangmei lat tei kaniw rui kakhou raclou the.

⁶Hei tei Saul chu pwkhou Ravguangc bumaengc karuc khou keylouna kareic dinh din the.

⁷Kamei rui guaituamchic kanei nym lana hei tei dan puat paruat louna “Thow pwni Saul lev Samuel thei rihbamv khou lay tat makpui mei tuang guaituamchic nunc ta tei hei kumcna swlou puni,” twna Isaraelmei kandic kapwm khou nzanh lik kan the. Meic nunc tei Ravguangc ta ping the, kumna kaniw kaguayna gaanv khat na sini nsaekclou makna pat the.

⁸Saul rui kaniw ta Bezek khou kaw guang kariu the: hei tei Isarael khou rui meic 3,00,000 khatni Juda khou rui 30,000 khwan e.

⁹Jabes thangc rui chamv phungc guangmei nunc khou tei kaniw rui sa the, “Nthuanh hei kumhmei neih suhmei ganv khou nangniw ta kanpatlou puni the twna meic nunc khou tei sa ti tho.” Chamv phunghmei nunc rui Jabesmei nunc khou guang pouloumei ganv khou kaniw peyna neihla the.

¹⁰Kumna Nahas khou sa the, Jabesmei nunc rui chamv tei chu pwkhou kaniw neihlamei rui padik the. “Nthuanh kiu aniw nang khou gutlou puni the, kumna nang rui aniw ta sw nii niimei thak sw nuh the.”

¹¹Nthuanh thauna thwanzingh Saul rui kamei nunc ta kakang kathumh khang damcpatlou the, kumna tinggaanc patpui lev zauczihmei nunc zypui khou tei kaniw pak gutna Ammonmei nunc ta adow the. Kalaanv nganv kaniw rui Ammonmei ta dow the; theic nsaekcloumei nunc kakhang khang pak phak ngam tat kan the.

¹²Khoutei Isaraelmei nunc rui Samuel khou sa the, “Saul aniw guangc sw nuh mak ge twna sa bammei nunc tei tabui thangc tatlou ngam kan thena cho? Kaniw ta aniw khou tiipat ro, kaniw ta swluai puni!”

¹³Tiki Saul rui daw the, “Aseic hei meic gaanv khat na ta sini swluai nuh mak ge, kalam thu aseic hei RINGHPOUC rui Isaraelmei ta kanloumei tingmik ge.”

¹⁴Kumna Samuel rui kaniw khou “Aniu Gilgal thangc tatna Saul ta aniu guangc swna kauc pat dat di kho,” twna sa the.

¹⁵Kumna kaniw kapwmna Gilgal thangc tatna, mi khou tei naimei nthanmei bamv khou Saul ta guangh swna kauc pat the. Kumna kaniw alamvpuatkat kat the. Kumna Saul khatni Isaraelmei nunc tei peyna neihla the.