Read Rongmei Naga 1 SAMUEL 12 Bible Online

1 SAMUEL 12 - Rongmei Naga bible

1 SAMUEL 12

¹Khoutei Samuel rui Isaraelmei nunc khou sa the, “Nangniw rui taanclou o twna samei tei ai taanclou kan the. Nangniw ta sin khang ai rui nangniw khang guangh tiilou kan the.

²Ntaw thu nangniw ta zaylou khang kamei nai the. Ai thu gaanvsw gaanvthaih pypuangh nziuh di the, kumna anac mpouh nunc ni nangniw ta bam nchamc bam e. Ai chabwan khou rui thauna ntaw nganv nangniw tuang kapy sw guang the.

³Ai hei ringcna bam khou, ai rui taanc nkhuailoumei tuang nai khwan e thei ntaw RINGHPOUC khatni kamei rui kadahloumei guangc hu khou hei sa tho. Ai meic gaanv khat na tuang syan guaih khatni kuanniam khat na sini laalou tuang nai bu cho? Thowkumhmei ta guatloumei tuang hamh e thei rairiuloumei tuang nai bu cho? Thowkumhmei khou rui lanvbiwmei laaloumei tuang nai bu cho? Mi kumhmei hei ai rui taancloumei tuang nai khwan e thei, ai laaloumei tei khangc dat ni.”

⁴Meic nunc tei rui kumna daw the, “Nang rui aniw ta guatloumei tuang ni rairiuloumei tuang ni maek ge; meic gaanv khat na khou rui sini ramh akhat na sini laaloumei tuang maek ge.”

⁵Samuel rui daw the, “Nangniw akhuay phu pat thuai khang maek khe twmei RINGHPOUC khatni kamei rui kadahloumei guangc rui aseic sakhi di the.” “Ngguay, RINGHPOUC rui aniu tuang sakhi the,” twna kaniw daw the.

⁶Samuel rui sa dat re, RINGHPOUC hei Mousi khatni Aron ta kadahloumei khatni nangniw pupouc nunc ta Izip khou rui nduangh patloumeipu e.

⁷Ntaw nangniw kabamv kabamv khou dingna bam o. Nangniw khatni nangniw pupouc nunc ta kanlou khang RINGHPOUC rui taanvdaih taanclou kanmei guay tei tiningtowna ai nangniw khuay dinc puni the.

⁸Jakob khatni kakai kaikhunc Izip kandic thangc key pwkhou Izipmei nunc rui kaniw ta rai the. Nangniw pupouc nunc rui nkhavlou khang RINGHPOUC khou kauc pwkhou kamei rui Mousi lev Aron ta thouc guangna kaney rui kaniw ta Izip khou rui nduangh patna mi kandic khou hei tilungclou the.

⁹Tiki meic nunc tei rui RINGHPOUC kaniw Racguangc ta amuc tina, Philistinmei nunc khatni Moab khatni Siseramei guangc, Hazor namvdai tuang ricpy ta nangniw pupouc nunc ruc khou rih tikeyna kaniw ta laa kan the.

¹⁰“Mi khou tei kaniw rui nkhavlou khang kumna huay the, ‘Aniw paapc sw dyng the, kalam thu aniw RINGHPOUC, nang khou rui karih nthei tat lana Baal khatni Astarte maengc kalum dyng the. Aniw ta zauczihmei nunc baanc khou rui kanlou o, kum e thei aniw nang ta kalum dat ni.’

¹¹“Kumna RINGHPOUC rui Gideon ta, mi tangv Barak ta, mi tangv Jephtha ta, khatni nkhamh khou ata thouc guang the. Aniw hei rui nangniw ta zauczihmei nunc khou rui kanlou the, kumna nangniw ping kadan tuang maekna lungc bam tuang the.

¹²Tiki Ammonmei guangc Nahas rui nangniw ta adow nimei ta nangniw how lana nangniw tuang RINGHPOUC Ravguangc ta nangniw guangc sw taan lana, ‘Aniw guangh kahaw e’ twna nangniw akhou sa the.

¹³“Nangniw kahawmei guangc kiu mi hei the; nangniw rui ney tina RINGHPOUC rui kati hei nangniw khang tiiloumei tuang the.

¹⁴Nangniw rui RINGHPOUC Ravguangc ta chakhwang champouhna lungc e thei, kasiamruai sw e thei, kalat chu e thei, khatni kalatdanv guay piu e thei, khatni nangniw khatni nangniw tuang guangc rui kathei lay e thei nangniw khang gay tu rana guang puni e.

¹⁵Tiki nangniw RINGHPOUC lat chulou makna kalat liamna lungc e thei, kamei rui nangniw ta khatni nangniw tuang guangc ta lwanlou ni tuang hamh e.

¹⁶Kumna nangniw khou tei ding bam o, kabamv kabamv khou tei ding bam o, kum e thei RINGHPOUC rui taanclou pw nimei taanvdaih ta nangniw how puni the.

¹⁷Ntaw hei chakaanv chara ramh riangmei ganv hamhna cho? Ai huayney puni the, kumna RINGHPOUC rui ganh khatni ting tii key puni the. Mi hei pat pwkhou kiu, nangniw rui Ravguangc khou guangh neymei tei kakhou paapc daihmei taanhmei tuang di the twmei nangniw thay puni the.”

¹⁸Kumna Samuel rui huayney the, kumna mi nungc kahak tei RINGHPOUC rui ganh khatni ting tii key the. Khoutei meic guayna tei RINGHPOUC khatni Samuel ta ping the,

¹⁹kumna kaniw rui Samuel khou sa the, “RINGHPOUC nang Racguangc khou aniw khang huayneylou dat tho, aniw theih mak khang. Baih baihmei paap na hamhna guangh neymei tuang paap hei ni aniw taanc dyng the twmei aniw thay the.”

²⁰“Ping nangh e,” twna Samuel rui daw the. “Nangniw heidikamv simei taanc bam sini, RINGHPOUC khou rui tat pat riu, tiki nangniw lung kapwm rui kasiamruai sw o.

²¹Nchumh makmei rav nunc thei lay riu; kaniw rui nangniw ta nkhavlou ngam lak ge khatni kanlou ngam lak ge, kalam thu mi nunc tei kaling hamh e.

²²RINGHPOUC rui nthukmei latdyng sw kan the, kumna kamei rui nangniw ta ganclou lak ge, kalam thu nangniw ta kamei tisw khang kalung ding kan the.

²³Akhang swna thu ai rui nangniw khang huayneylou taanmei paap RINGHPOUC khou taanh makmei sw diu. Nangniw tabui tei taanhmei rui gay cho khatni taanc nimei tuang cho twmei nangniw khou nchamlou puni.

²⁴RINGHPOUC lat piu o khatni nangniw lung kapwm rui lwmnuhmei swna kasiamruai sw o. Kamei rui nangniw khang taanclou kanmei taanv daihmei tei ningtow o.

²⁵Tiki nangniw paapc taancna bam e thei nangniw khatni nangniw guangc ta swmaanlou puni.”