Read Rongmei Naga 1 SAMUEL 13 Bible Online

1 SAMUEL 13 - Rongmei Naga bible

1 SAMUEL 13

¹Saul tingkwm 30 tanghmei ganv khou guanghtu khwan e kumna Isarael khou tingkwm 40 guangh tulou khwan e.[1]

²Saul rui meic 3,000 kadah pat the; 2,000 rui kadaeng khou Bethel chyngramv Mikmas khou lou the, khatni 1,000 rui kanac Jonathan thei Gibea, Benjamin ramv thangc thouclou the. Baihmei guay ta tei Saul rui kaniw kai thangc thouc hanc dat kan the.

³Jonathan rui Philistinmei rihgaekkai ta adowna ngamlou the, kumna mi chamv tei Philistinmei guay rui chu the, Saul rui kandih kapwm khou tei bianggun amuanna “Ibrimei guay rui chu diu tho” twna sa the.

⁴Saul rui Philistinmei rihgaekkai ta adowna ngamlou the kum tina Philistinmei nunc rui kaniw ta zauczih the twna Isaraelmei guay khou tithaylou the. Kumna Gilgal khou Saul daeng khou guang khang kawmei khou tei meic nunc rui dawlou the.

⁵Isaraelmei nunc ta adow khang Philistinmei nunc guang kaduai the. Kaniw tei rih gari 30,000, takuanh ricmei 6,000, khatni rihmei rui duipui paengc khou naimei syniang zu guang the. Kaniw Mikmas, Bethaven tuang neihpat khou, zypui swna bam the.

⁶Isaraelmei guay rui, hei tei how pwkhou kaniw tuang ricmei lwnlung tei kungcsih the khatni ranvna tak gut pwkhou kaniw rui khowlang khou, ramhkai phoumei bamv khou, ntauh daihmei lang khou, khunh khou khatni duikhunc khou dup the.

⁷Gaanvsaekc rui Jordan kaan patna Gad khatni Gilead ramv thangc tat kan the. Saul tei Gilgal khou bam di he, kumna kadaeng khou bammei nunc tei ping kadunh the.

⁸Samuel rui nkhwan o twna samei theilayna, kamei Samuel ta zaeng chanei nkhwan the, tiki Samuel tei Gilgal khou guang mak khe. Meic nunc tei Saul khou rui tat ngam thau the.

⁹Kum tina Saul rui sa the, “Rawna khaengmei khatni alamvpuatkat kat nimei tuang akhou laaguang tho.” Rawna khaengmei tei kamei rui taanc the.

¹⁰Hei tei kamei khaeng rappui lev Samuel guang the. Saul rui patna kata ariw the kumna kalum the.

¹¹“Nang tabui taanh tu cho?” twna Samuel rui thanv the. Saul rui daw the, “Meic nunc hei ata ganclouna tat ngam kan puni the, nang guang ni twna saloumei ganv khou tei nang ni guang mak khe; hei na hamhna Philistinmei nunc Mikmas khou guang kaduai bam the.

¹²Kum thena Philistinmei rui ata mi Gilgal khou hei adow puni the, kumna ai Ravguangc khiuzaeng laa mak dyng he twna ai kakhanh the. Kumhpui zaeng rui ai khaeng nina di the twna ningna the.”

¹³Samuel rui daw the, “Hei tei mpangmei taanv the, RINGHPOUC nang Racguangc rui tiimei latdanv tei nang piu mak khe. Nang rui piu bam khwan e thei nang khatni nang kikta ta Isaraelmei ruc khou tingsaeng guangh tiswlou bam ni tuang khwan e.

¹⁴Tiki nang guangh swmei hei tingsuang lak khe. Kalam thu nang kalat liam the. RINGHPOUC kalung rui kahawmei phu dat lana kata Isaraelmei guangc tisw dat kan puni the.”

¹⁵Samuel Gilgal mpatlouna kamei tat nimei chaeng tat dat kan the. Meic baihmei guay tei rui rihmei sw khang Saul thei lay the. Kaniw tei Gilgal khou rui Benjamin ramv Gibea biak thangc ngangh the. Saul rui kathei lay tat bammei nunc ta kasing phuc pwkhou 600 dou phupat the.

¹⁶Saul khatni kanac Jonathan lev khatni kaney thei lay bammei nunc tei Benjamin ramv Gibea khou bam the kumna Philistinmei nunc rui Mikmas khou bam the.

¹⁷Philistinmei nunc tei kaniw tuang zypui khou rui kakang kathumh damclouna pat the: kakang akhat rui Shual ramv khou naimei Ophra biak thangc tat kan the,

¹⁸kakang akhat rui Beth Horon biak tat kan the, kumna baihmei kang akhat rui Zeboiim nzaengc khatni tazikramv phaengc achowmei ramvrei biak tat kan the.

¹⁹Isaraelmei pang khou ntanh dymei maek khwan e, kalam thu Philistinmei rui sa the, Ibrimei ta buy-baeng tikasiamh nuh mak ge. e.

²⁰(Isaraelmei nunc tei kaniw tuang lausuakphu, phuc nrih, khatni baengkhuaimun sw khang Philistinmei khou tat bam khwan e,

²¹nrih mun sw khang khatni guaihphu katamv khang daandi paek akhat khatni lausuak phu hamh e thei phucmun sw khang daandi paek kanei laa bam khwan e.)

²²Kumna rihbamv khou tei Saul lev kanac Jonathan na hamhna meic baihmei thu buy-baeng sin mak khwan e.

²³Philistinmei nunc tei Mikmas chaeng gaek khang rihmei kang khat thouclou the.