Read Rongmei Naga 1 SAMUEL 14 Bible Online

1 SAMUEL 14 - Rongmei Naga bible

1 SAMUEL 14

¹Zaeng neih khat Saul nac mpouh Jonathan rui katuang buy-baeng phunghmei nggaanvpu khou tei “Anei Philistinmei zypui thangc pat zauc kho,” twna sa the. Tiki kamei kapu khou thu tithaylou mak khwan e.

²Saul tei Gibea daeng khou Migron khou puc-heithai bang bangc khou zypui swna bam khwan e. Saul tei kadaeng khou meic 600 bam khwan e.

³Mi pang khou tei amuh tuang ephod piumei Ahija kazauh bam khwan e. Ahija hei Ikabod chana Ahitub rui puanhmei e. Kapu Ahitub hei Phinehas nac khatni Shilo khou RINGHPOUC tuang amuh swna bam khwanmei Eli tou e. Jonathan tei tat kan e twmei kaniw meic gaanv khat na rui sini thay mak khwan e.

⁴Philistinmei rihmei nunc zypuikai gut khang Jonathan rui tat gut nimei chaeng khou tei ntukmei ntauh chei kanei baanzat baandau nai bam khwan e akhat tei Bozez twna khatni baihmei akhat ta tei rui Sene twna kaw khwan e.

⁵Dihpy biak thangc naimei akhat tei rui Mikmas biak souc karih khwan e, khatni dihba biakmei tei rui Geba biak souc karih khwan e.

⁶Jonathan rui nggaanv nacpu khou tei sa the, “Anei mi gihruamh makmei Philistinmei zypui thangc tei pat zauc kho. RINGHPOUC rui anei ta nkhavlou e thei, anei rana khwan sini kamei rui anei khou rihngammei tiilou nuh de.” RINGHPOUC khou meicraumei khatni meicgeihmei kasuan mak ge.

⁷Nggaanvpu tei rui “Nang rui kahawmei tei ai ni kiuc rap di the,” twna daw the.

⁸“Gay the,” twna Jonathan rui sa the. “Anei kaan pat puni, Philistinmei nunc how kan di tho.

⁹Kaniw pat puni nkhwan o twna sa pw e thei, anei ding kalaih makna nkhwan kho.

¹⁰Kaniw daeng thangc guang khang kaw pw e thei, anei guang puni the, kalam thu RINGHPOUC rui anei ta kaniw ta ngam khang tiilou the twmei lyanmei tuang e.”

¹¹Kumna kaney tei Philistinmei khou lyanlou the, kumna Philistinmei rui sa the, “Zauc lo! Ibrimei nunc tei kaniw nkamh bammei khunc khou rui pat pu the!”

¹²Khoutei kaniw rui Jonathan khatni nggaanvpu khou tei kumna kaw pat the, “Hei khou hei ngangh o. Nangney khou lat salou khang nai e!” Jonathan rui nggaanvpu khou tei sa the, “Athei lay tho; Isaraelmei rui kaniw ta ngam khang RINGHPOUC rui tiilou the.”

¹³Jonathan tei mi chaeng khou tei tangkhunghna guangc ku the, kumna nggaanvpu tei kathei lay ku the. Jonathan rui Philistinmei nunc ta tei adow the. Jonathan rui diangc bowlou pwkhou nggaanvpu tei rui kaniw ta swluai the.

¹⁴adow reymei khou tei Jonathan khatni nggaanvpu tei rui lauphung paek akhat doumei ramv lungc khou gaanv 20 dou swluai the.

¹⁵Namv khou bammei Philistinmei nunc tei ping the; zypui khou bammei kuak tatmei nunc khatni rihmei nunc tei ping kadunh the; kandih kadunh the, khatni ping nraammei rui padik the.

¹⁶Saul tuang mei nunc Benjamin ramv Gibea khou rigaanv bammei nunc tei Philistinmei nunc saengzin saengzana bammei ta how the.

¹⁷Kumna Saul rui kamei nunc khou sa the, “Rihmei nunc sing tei pac o, thow ntangh mak cho twmei phu o.” Kaniw kumna zauc pwki Jonathan khatni katuang buy-baeng phunghmeipu tei bam mak khwan the.

¹⁸“Amuh tuang ephod laaguang o,” twna Saul rui amuh Ahija khou sa the. Kalam thu Ahija tei hei tei phungcna Isaraelmei pang khou bam khwan e.

¹⁹Saul rui amuh khou tei kumna sa bammei dyng khou rui sini Philistinmei zypui khou katuakc katitmei mbu hay hay thau the, kum tina Saul rui kakhou kumna sa the, “RINGHPOUC khou thanv bam khang kaganv maek khe!”

²⁰Khoutei Saul khatni kamei nunc tei kaguakc kasuakcna khat khat ta adowna bammei Philistinmei pang khou tei adow khang gut the.

²¹Ibrimei gaanvsaekc Philistinmei biak thangc bammei nunc khatni Philistinmei tuang zypui khou guang bammei nunc tei Saul lev Jonathan thei lay liangc dat the.

²²Baihmei, Ephraim tuang chyngbut guay khou nkamh bammei nunc tei Philistinmei pak the twmei chu lana kaniw ni kazauhna Philistinmei ta adow the.

²³Bethaven paengc thangc nganvna adow pat the. Mi nungc tei RINGHPOUC rui Isaraelmei ta kanlou the.

²⁴Mi nungc tei Isaraelmei nunc tei ndaapcna kaniw zaeng maek khe, kalam thu Saul tei nthukmei latdyng swna “Aseic ai rui ata zauczihmei nunc ta khwm khangclou mak saanv munthiangh makpui mei khou tei syang keylou di tho,” twna latdanv pat the. Kumna mi nungc tei meic gaanv khat na sini ramhkhat na sini tu kan mak khe.

²⁵Kaniw meic guayna nwmbangc khou gut the kumna kabamv kathuicna khou nkhuaihdui ariw the.

²⁶Mi nwmbangc tei nkhuaihdui rui padik the, tiki meic gaanv khat na sini hei tei tu kan mak khe, kalam thu kaniw guayna Saul tuang syang ta ping the.

²⁷Kapu rui syang nai puni twna kauc patmei lat tei Jonathan thu thay mak khwan e, kumna kamei sin bammei builwang kari patna nkhuaih phic khou kathouh gutna nkhuaihdui katit na tulou the. Kadyng mak khou kamik raan tanc laph lap pat the.

²⁸Khoutei gaanv khat pu rui sa the, “Aniu ndaapcna meic zaeng maek khe, tiki ‘Aseic tu zangvpui mei thu syang phungc puni,’ twna nang pu rui sana the.”

²⁹Jonathan rui daw the, “Apu rui aniu mei nunc khou heikumna sw bammei hei tabui cho! Ai nkhuaihdui katit na tulou tina adih achaengc ringc tha!

³⁰Aniu rui zauczihmei nunc khou rui asut patmei tei tu bam khwan e thei adih gay bam puni tuang cho! kaniw Philistinmei azuh ta hei suangc geicna swluai kan nimei tei kakhanh zauc o!”

³¹Mi nungc tei Philistinmei ta Isaraelmei rui Mikmas khou rui Aijalon nganv dow key tangc the. Mi ganv khou tei Isaraelmei nunc tei ndaapcna kaniw zaeng maek khe.

³²Khoutei chadi chada pak guangna zauczihmei nunc khou rui asutloumei lauziu khatni guaih nunc tei nym lana, mi bamv khou tei dow mbam key the, kumna zanh khou tei zei haengh haengna tu the.

³³“Zauclo, meic nunc tei zei haengh haengmei zanc tuna RINGHPOUC hu khou paapc taanc bam the,” twna Saul khou poulou the. “Nangniw hei twanlyammei the, mi khou hei ntauh daihmei kalat guang o” twna Saul rui kauc the.

³⁴Hei tangv tei kamei rui latdanv akhat dan pat the: “Meic nunc khou tei tatna kaniw tuang guaituam khatni lauziu mi bamv khou hei laaguang khang sa tho. Hei tei mi khou hei swluai lana tu nina e; zei naimei zanc tuna RINGHPOUC khou paapc taanc lak nina e.” Mi nungc zingbangc tei kaniw tuang khouringc nunc tei laaguangna mi bamv khou tei dowluai the.

³⁵Saul rui mi khou tei RINGHPOUC tuang ravchabamv kasiamh thau the; hei tei kamei rui kasiamhmei rey liangmei ravchabamv e.

³⁶Saul rui kamei nunc khou sa the, “Aniu key lana zingbangc Philistinmei ta kuak di kho, kumna tinggaanc mak saanv akwamna dowluai ngam di kho.” “Nang rui gay pwng e twna ningmei kiu sw tho,” twna kaniw daw the. Tiki amuh tei rui thu “Aniu Ravguangc khou thanv rey kho” twna sa the.

³⁷Kumna Saul rui Ravguangc khou thanv the, “Ai Philistinmei ta adow di kho cho? Nang rui aniw ta tingamlou puni dai cho?” Tiki mi nungc tei Ravguangc rui dawlou mak khe.

³⁸Khoutei Saul rui kapy swmei nunc khou tei sa the, “Guangna zauc tho, aseic tabui tuang paap taancloumei tuang nai thena cho?

³⁹Isarael khang rihngammei tiiloumeipu ringc bammei RINGHPOUC zanc khou rui latdyng sw the, twmei thu nkhuaimeipu tei thu, anac Jonathan bam pwsini swluai puni the.” Khoutei meic guayna rimh rim the.

⁴⁰Khoutei Saul rui kaniw khou sa the, “Nangniw guayna hei biak thangc tei ding tho, Jonathan aney hei thangc hei ding puni the.” “Nang rui gay pwng e twmei kiu sw tho,” twna kaniw daw the.

⁴¹Saul rui RINGHPOUC, Isarael Racguangc khou sa the, “RINGHPOUC, tabui swna nang aseic hei akhou dawlou mak tu cho? He RINGHPOUC, Isaraelmei Racguangc, mi nthanmei ntauh khou hei rui dawlou o. Mi hei Jonathan hamh e thei atuang khuay khwan e thei, Urim pat di tho, tiki mi hei nang mei Isaraelmei nunc khuay khwan e thei Thummim pat di tho.” Khoutei Jonathan kaney rui nkhuai the, meic nunc tei thu nthan de twmei dawlou the.

⁴²Khoutei Saul rui sa the, “Anac Jonathan lev aney kak khou hei dinclou dat tho.” Kumna Jonathan the twmei dinclou the.

⁴³Khoutei Saul rui Jonathan khou “Nang tabui taanclou tina cho?” twna thanv the. “Ai nkhuaihdui katit na tulou tina the, Ai theic nuh the,” twna Jonathan rui daw the.

⁴⁴Saul rui kakhou sa the, “Nang ta swluai mak ge thei Ravguangc rui ata bai luai di tho!”

⁴⁵Meic nunc rui Saul khou sa the, “Isaraelmei khang heidikamv daic kanmei ric ta ngamloumeipu Jonathan ta swluai nina cho? Kiuc hamh e! kapy sam akhat na sini swmaan lak ge twmei hei Ringhmei Racguangc hu khou aniw tuang latdyng e. Kamei rui aseic swloumei hei Ravguangc rui nkhavlouna swloumei tuang e.” Kumna Jonathan ta theic nimei khou rui meic nunc rui kanlou the.

⁴⁶Mi tangv tei, Saul tei Philistinmei nunc ta suic taan the, kumna kaniw tei kaniw kandic thangc hanc dat the.

⁴⁷Saul kamei guanghtumei tangv, kamei rui katuang zauczihmei guay ta kabamv kathuicna khou adow the: Moabmei ta, Ammonmei ta, Edommei ta, Zabamei guangc nunc ta, khatni Philistinmei ta adow the. Adowmei kathuic kamei rui rihngam the.

⁴⁸Kamei rui baucna adowna Amalekmei ta nganvna ngam the. Adowna bammei zauczihmei nunc khou tei rui kamei rui Isaraelmei ta tiduaklou the.

⁴⁹Saul nac mpouh nunc hei Jonathan, Isvi, khatni Malkishua the. Kanac aluh gaanvthaihmei zanc rui Merab khatni alaucmei zanc rui Mikal twna kaw e.

⁵⁰Kanow rui Ahimaz nacpui Ahinoam e. Katuang ricpy rui kapulauc Ner nac Abner khwan e.

⁵¹Saul pu Kis khatni Abner pu Ner hei Abiel nac e.

⁵²Saul tei kamei ringh saanv, Philistinmei lev rih adow ranv sihna adow bam khwan e, kumlana kamei thaymei tancbauhmei kathuic ta thu katuang ricmei khang laa the.