Read Rongmei Naga 1 SAMUEL 15 Bible Online

1 SAMUEL 15 - Rongmei Naga bible

1 SAMUEL 15

¹Samuel rui Saul khou sa the, “Nang ta Isaraelmei guangc khang thauh teylou khang RINGHPOUC rui thoucloumei tei ai hei the. Ntaw hei, Ngamparymei RINGHPOUC rui samei hei nking o.

²Kamei rui Amalekmei ta dandi tii puni the, kalam thu kaniw pupouc nunc rui Isaraelmei ta kaniw Izip thangc rui guang khou tei akhangvmei zaeng rui e.

³Amalekmei ta kuak tat tho, kumna kaniw tuang naimei kaguayna swmaan ngam tho. Ramh akhat na sini nsaekclou nuh mak ge; nggaanvmei, ntumei, alauc, ngasatna, guaih, lauziu, guaikuan, khatni kuanniam kaguayna swluai ngam o.”

⁴Saul rui karicmei guay ta kaw kaduaina Telem khou zauc the: Isarael khou rui tan ricphyan 2,00,000 khatni Juda khou rui 10,000 the.

⁵Kamei rui kamei nunc ta nduanghna Amalekmei kaidai khou guangna phuimei duithuak akhat khou dup bam the.

⁶Kamei rui Kenmei, kaniw pupouc nunc rui Isaraelmei ta Izip thangc rui guang khou sw chuyloumei nunc khou kumna lat tii the, “Amalekmei nunc ta ganclouna nangniw tat la tho, kum mak ge thei nangniw ta ni kaniw pang khou swluai kazauh puni the.” Kumna Kenmei tei tat pat kan the.

⁷Saul rui Amalekmei ta Havila ramv khou rui Izip neihpat Shur nganv kuak key the.

⁸Kamei rui Amalekmei guangc Agag ta nringh nym the, kamei nunc ta thu dowluai ngam the.

⁹Tiki Saul lev kamei nunc rui Agag ta khatni gay liangmei lauziu, guaichic, gay liangmei guaituamnac nunc, khatni lauziunac nunc khatni baihmei gaymei guay tei thu swluai mak khe; gaeng makmei guay ta na swmaan the.

¹⁰RINGHPOUC rui Samuel khou sa the,

¹¹“Ai rui Saul ta guangh tiswloumei hei ai neihla mak khe; kalam thu kamei akhou rui tat pat kan the khatni alatdanv piu mak khe.” Samuel kalungpuamc the, kumna RINGHPOUC khou huayney thangc the.

¹²Nthuanh lauthwan thwanzingh kamei Saul ta phu pat the. Saul tei Karmel kaidai khou guangna Saul kakhang tausuam akhat mi khou tei suamclou ducna Gilgal thangc tat kan the twmei kamei chu the.

¹³Samuel Saul daeng khou ngangh the. Khoutei Saul rui Samuel khou sa the, “RINGHPOUC rui nang ta suaihiamlou diu! Ai RINGHPOUC tuang latdanv piuna taanc the.”

¹⁴Samuel rui thanv the, “Kum e thei guaih khatni ziuh rah bammei hei thu tabui tuang cho?”

¹⁵Saul rui daw the, “Hei tei amei nunc rui Amalekmei khou rui laaguangmei tuang e. Kaniw rui gay liangmei ziuh khatni guaih nunc RINGHPOUC nang Racguangc khang kat khang lou bam tina the. Baihmei guay tei thu aniw swmaan ngam kan the.”

¹⁶Samuel rui sa the, “Nthaekc tho, douclanungc zingbangc RINGHPOUC rui akhou samei ai sa puni.” “Salou o” twna Saul rui sa the.

¹⁷Samuel rui sa the, “Nang rui nang ta nthukmei swna kakhanh mak sini, nang hei Isaraelmei khwang guay tuang kapy di the. RINGHPOUC rui nang ta Isaraelmei guangc khang thauh teyloumei tuang di the,

¹⁸Kumna mi meicsimei Amalekmei nunc ta swmaan ngam o twna kamei rui nang khou latdanv tiina thouhmei tuang e. Nang kaniw kaguayna ta swluai ngam mak saanv adow o twna kamei rui nang khou samei tuang the.

¹⁹Kum e thei, tabui swna, nang kalat piu mak tu cho? Tabui swna nang kaniw tuang puat tei laa tu cho? Tabui swna RINGHPOUC rui pian lakmei taanv tei taanc bam tu cho?”

²⁰Saul rui daw the, “Ai RINGHPOUC lat piu de, kamei rui samei theilayna ai taanc the, Guangh Agag ta nym guang the, kumna Amalekmei guay ta swluai the.

²¹Tiki amei nunc rui kaniw rui nymloumei gay liangmei lauziu khatni guaituam nunc tei thu swluai mak khe; hei tei RINGHPOUC nang Racguangc khang kat khang kaniw rui Gilgal khou hei phungc guanglou the.”

²²Samuel rui sa the, “RINGHPOUC rui latpiumei ta kahaw ny, hamh e thei puatkat khatni khaengmei ta kahawna cho? Latpiumei rui khaengmei suangc gay e, lauziu thav kakhang khaengmei suangc thu kalat piumei rui gay e.

²³Latliammei hei rav baihmei ta kalummei ramsi kumc si e, khatni daihlung phunghmei hei ravmaengc kalummei paap lev nchamc e. Nang rui RINGHPOUC tuang latdanv tei ganhpui zaeng rui kamei rui nang ta ni guangh khou rui ganc pat the.”

²⁴Saul rui daw the, “Ngguay, ai nkhuai dyng the. Ai hei RINGHPOUC tuang latdanv khatni nang rui dincloumei tei piu mak dyng the. Ai amei nunc ta pingpui zaeng rui kaniw rui kahawmei tei taanc dyng the.

²⁵Kumhpui zaeng rui ai nang khou huay e, apaap hei kuaklou o kumna ai RINGHPOUC ta kalum dat nuh khang rui nang rui ata Gilgal thangc nduangh guanglou dat ro.”

²⁶Samuel rui daw the, “Ai nang ta nduangh guang dat lak khe. Nang rui RINGHPOUC tuang latdanv tei ganhpui zaeng rui, kamei rui nang ta Isaraelmei guangc khou rui ganc pat the.”

²⁷Samuel tei tat kan nina karih pat pwkhou Saul rui katuang thiula saenghmei tei pinc tina thaek kaek pat the.

²⁸Samuel rui kakhou sa the, “Aseic hei RINGHPOUC rui Isarael guanghdic tei nang khou rui siat patna nang khang suangc gaymei gaanv khat khou tiilou dat kan the.

²⁹Isarael tuang hymdaihmei Racguangc thu saraamh mak ge khatni kalung kalaih mak ge. Kamei thu maansei hamh e— kalung kalaih mak ge.”

³⁰Saul rui sa the, “Ai paapc taanc dyng the, kum sini amei nunc tuang kapy nunc khatni Isaraelmei guay hu khou ata chakhwang swmei thu lyanlou o. RINGHPOUC nang Racguangc ta ai kalum nuh khang ata nduangh guanglou o.”

³¹Kum bam tina Samuel rui Saul ta Gilgal thangc nduangh guang the, kumna Saul rui RINGHPOUC ta kalum the.

³²“Guangh Agag ta adaeng khou nduangh guang o” twna Samuel rui sa the. “Theic nimei hei adih si cho ni!” twna kakhanhna Agag tei ping kadunhna kakhou guang the.

³³Samuel rui sa the, “Nang tuang baengsaeng rui meicpui mpeyna ta kanac maekmeipui nunc tiswlou kanmei kumcna, ntaw nang pui hei kanac maekmeipui sw puni the.” Kumna kamei rui Agag ta Gilgal tuang ravchabamv hu khou dan puat paruatlou the.

³⁴Mi tangv tei Samuel Rama thangc tat kan the, khatni Guangh Saul kakai Gibea thangc tat kan the.

³⁵Samuel kamei ringh saanv guangh ta tei how dat zat kan mak khe; tiki kamei rui kakhang kazaengsina bam khwan e. Saul ta Isaraelmei guangc tiswloumei khang RINGHPOUC kalung amanv mak khe.