Read Rongmei Naga 1 SAMUEL 16 Bible Online

1 SAMUEL 16 - Rongmei Naga bible

1 SAMUEL 16

¹RINGHPOUC rui Samuel khou sa the, “Nang asaanh Saul khang nang zaengsina bam nina cho? Ai rui kata Isaraelmei guangc khou rui ganc pat the. Ntaw thu nang guaihchei buangc khou thauh liatclouna Bethlehem thangc Jessi kawmeipu daeng thangc tat tho, kalam thu ai rui kanac pang khou gaanv khat ta guangh khang kadahlou kan the.”

²“Akumhna ai hei tei sw ngam nina cho? Saul rui hei tei chu e thei, kamei ata swluai puni de,” twna Samuel rui sa the. RINGHPOUC rui daw the, “Nang guaihnaylauna akhat zay tat tho, kumna nang RINGHPOUC khang khaeng khang tat nina de twna sa tho.

³Khaengmei bamv khou tei Jessi ta kaw guang tho, kum e thei nang tabui sw nina cho twmei ai rui dinclou dat puni. Ai rui nang khou dincloumeipu ta tei guangh khang thauh teylou nina the.”

⁴RINGHPOUC rui samei kumcna Samuel taanc the kumna kamei Bethlehem thangc tat the. Mi kaidai tuang gaanvthaic nunc kata ariw khang ping kadunhna pat the. Kumna “Nchu-nzaenghmei chaengkaamv dai cho muhzwngle?” twna sa the.

⁵Kamei rui daw the, “Ngguay, RINGHPOUC khou khaeng khang guangmei tuang de. Nangniw pumc nthan lana athei lay o.” Kamei rui Jessi ta kanac nunc lev kaniw pumc nthan lana khaengmei khou tei guang khang kaw the.

⁶Kaniw guang pwkhou, Samuel rui Jessi nac mpouh Eliab ta how lana “Mi RINGHPOUC hu khou ding bammeipu hei kamei rui kadahloumeipu kiu kan di the” twna kakhanh the.

⁷Tiki RINGHPOUC rui Samuel khou sa the, “Kasaeng kadai khatni kalwn kachav gaymei khou tei nang kakhanh riu. Ai kata laa mak ge, kalam thu maansei rui kadahmei kumcna ai thu kadah mak ge. Maansei rui kapaengc tuang lwn ta zauc e, tiki ai thu maansei lung ta zauhpui tuang de.”

⁸Hei tangv Jessi rui kanac mpouh Abinadab ta kawna Samuel khou nduangh guang the. Tiki “RINGHPOUC rui kata ni kadahlou mak ge” twna Samuel rui sa the.

⁹Mi tangv Jessi rui Shamma ta nduangh guang the. “RINGHPOUC rui kata ni kadahlou mak ge” twna Samuel rui sa the.

¹⁰Heikumna Jessi rui kanac mpouh gaanv chanei ta Samuel khou nduangh guang the. Samuel rui kakhou sa the, “RINGHPOUC rui mi nunc gaanv khat na ta sini kadahlou mak ge.”

¹¹“Nang nac mpouh baihmei ni nai di he cho” twna kamei rui Jessi khou thanv the. Jessi rui daw the, “Alauc liangmeipu gaanv khat thu nai e, tiki kamei lauziu gaengc tat kan de.” Samuel rui sa the, “Kata kiu kaw guang o.” “Kamei guang mak saanv khaeng ni tuang hamh e.”

¹²Kata kaw khang Jessi rui meic thouclou kan the. Kamei tei kalwn kachav gaymei, kapumc gaymei chabwan, khatni kamik rak gaanc kah kameipu e. RINGHPOUC rui Samuel khou sa the, “Mi pu hei the, kakhou teylou tho!”

¹³Samuel rui Olive thauc tei laana kachaic nunc hu khou David khou tei thauh teylou the, kadyngna khou RINGHPOUC tuang bumaengc David khou gutlouna mi nungc tei rui thauna kakhou bam kan the. Mi tangv tei Samuel Rama khou hanc guang dat the.

¹⁴Ntaw thu RINGHPOUC tuang bumaengc tei Saul ta mpatlou kan the, kumna RINGHPOUC rui tii guangmei simei bumaengc rui kata rai the.

¹⁵Kabangh nunc rui kakhou sa the, “Ravguangc rui thouc guangmei simei bumaengc rui nang ta rai bam tuang the twmei thay the.

¹⁶Kumna nang tuang latdanv aniw khou pat ro kum e thei nrahdow thaymeipu ta aniw nduangh guang puni. Kum e thei simei bumaengc tei nang khou guang pwkhou, mipu tei rui katuang nrah dow ti thei nang mphaengv dat puni.”

¹⁷“Nrah dow heihmei gaanv khat akhang kaw guang tho,” twna Saul rui kaniw khou latdanv tii the.

¹⁸Katuang latdiumei gaanv khat rui sa the, “Bethlehemmei Jessi nac nrah dow heihmei gaanv khat nai e. Kamei hei tancbauhmei khatni kalwn kachav gaymei, rihmei gaymei, khatni lat sa ngammei akhat re. RINGHPOUC rui nduanghlou bammeipu e.”

¹⁹Saul rui Jessi khou latdiumei nunc thouclouna sa the, “Nang nac David, lauziu gaenghmeipu ta tei akhou thouc guang o.”

²⁰Jessi rui David ta ziuhnac akhat, ntyan kuanniam puat akhat, khatni drakhadui guaihgic khau akhat lev twna Saul khou thouc guang the.

²¹David tei Saul daeng khou guangna kataanv tei taanc kan the. Saul rui kata nzian the kumna kata katuang buy-baeng phunghmei khang kadah kan the.

²²Khoutei Saul rui Jessi khou kumna chamv tiguang the: “Ai David ta kahaw the. Kamei mi khou hei ataanv taancna bam kan di tho.”

²³Mi khou tei rui thauna, Ravguangc rui thouc guangmei simei bumaengc rui Saul khou guangloumei kathuic David rui katuang nrac laana dowlou the. Simei bumaengc tat pat kan e thei Saul tei gay maih datna mphaengv dat raph rap the.