Read Rongmei Naga 1 SAMUEL 17 Bible Online

1 SAMUEL 17 - Rongmei Naga bible

1 SAMUEL 17

¹Philistinmei nunc rih sw khang Juda tuang kaidai akhat, Soko twna kawmei bamv khou guang kaduai bam the. Soko khatni Azeka kak khou Ephes Dammim twna kawmei bamv khou kaniw zypui sw bam the.

²Saul khatni Isaraelmei nunc Ela nzaengc khou guang kaduaina mi khou tei zypui kasiamh the, kumna Philistinmei ta adow khang mi khou tei chamdaanv the.

³Philistinmei nunc luangh paengc akhat thangc khatni Isaraelmei rui luangh paengc akhat thangc kanei kak khou nzaengc baek naina ding bam the.

⁴Gat kaidaimeipu, kazanc Goliat twna kawmeipu Isaraelmei ta khaengh khang Philistinmei zypui khou rui pat the. Kamei chowbuk charuk duak kauh e.

⁵Kamei kilogram 57 dou nritmei tanzinc tuang ricpwan piu e khatni tanzinc pyrun run e.

⁶Katan ni tanzinc rui duam e, khatni kamei tanzinc tuang bui kabou khou taap mphaihlou e.

⁷Katuang buyswn tei tambanghbungc di e khatni kapan rui kilogram chanei dou nrit re. Rihmei gaanv khat rui katuang nggih sin lana kahu khou tat re.

⁸Goliat ding lana Isaraelmei nunc ta kumna kauc the, “Nangniw rih adow khang ding kaliangna mi khou hei tabui sw bam tu cho? Ai hei Philistinmei e, nangniw Saul bangc nunc e! Ata athwng khang nangniw meic gaanv khat kadah pat ro.

⁹Kamei rui ngamna ata swluai e thei aniw hei nangniw bangc sw puni; ai rui ngamna kata swluai e thei, nangniw aniw bangc sw puni.

¹⁰Ntaw mi khou hei ai Isaraelmei rihmei ta khaengc bam e, ata adow khang gaanv khat kadah pat khang khaengc bam the!”

¹¹Hei tei Saul khatni kamei nunc chu pwkhou nungngai mak khe khatni mpeyna ping the.

¹²David hei Juda tuang Bethlehem khou bammei Ephrat puinacmei Jessi nac mpouh e. Jessi tei kanac mpouh gaanv tachat nai e, kumna Saul guangh sw bammei ganv khou, kamei gaanvthaih sih the.

¹³Kanac gaanvthaihmei gaanv thumh thu Saul thei rihbamv khou tat kan the. Gaanvthaih liangmei rui Eliab, kaneimei rui Abinadab, khatni kathumhmei rui Shamma e.

¹⁴David tei nkhiwliangmei mpouh the. Kachaic gaanv thumh tei Saul daeng khou bam tanh tan bam the,

¹⁵tiki David thu kapu lauziu gaengh khang kaluan luan Bethlehem thangc tat dat raph rap bam khwan e.

¹⁶Goliat rui hei tei kumcna lauthwan tingzyn zaeng 40 khaengc guang the.

¹⁷Zaeng neih khat Jessi rui David khou sa the, “Mi ntyan kang hei kilogram ruh khatni mi ntyan dwm ruh hei zypui thangc bammei nang chaic nunc khang katumcna phungc tat tho.

¹⁸Mi guaihnoudui thav dwm ruh hei rihpy khang phungc tho. Nang chaic nunc tei akumhna bam cho tatna zauc o, kumna nang kaniw ta ariw tho kumna kaniw gayna bam de twmei lyan khang ramh akhat phungc guang dat ro.

¹⁹Guangh Saul, nang chaic nunc, khatni Isaraelmei baihmei guay tei Ela nzaengc khou Philistinmei lev adowna bam the.”

²⁰David tei nthuanh thwanzingh thauna, lauziu tei zauc bam khang meic baihmei khou nsinlouna, Jessi rui samei kumcna puktaek tei phungcna tat the. Isaraelmei tei rihkhwmna rih adow khang pat ding bam rap khou kamei zypui khou key tangh the.

²¹Philistinmei khatni Isaraelmei tei adow thau khang khat khat ta ding adana kadingh bam the.

²²David tei kamei phungc guangmei puktaek tei tu zangvmei sinmeipu khou tei nsinlou duc lana, rihbamv khou tei pak guangna, kachaic nunc daeng khou guangna kaniw akumh bam cho twna thanv the.

²³Kamei kaniw ta kachuc bam khou, Philistinmei Goliat patna kahu nungc sw bammei kumcna Isaraelmei ta khaengc the. Hei tei David chu the.

²⁴Isaraelmei tei Goliat ta how pwkhou pinglangvna pak the.

²⁵Kaniw khat khat khou kumna sa the, “Kata tei zauclo! kamei rui khaengc bammei kiu nking zauc o! Kata swluaimeipu khang swan daicna tii puni twna Guangh Saul rui latdyng swlou the; guangh rui kanacpui ta ni kanow khang tii puni khatni kapu kai khou ni dihkhav laa lak ge twna sa e.”

²⁶David rui kadaeng khou bammei nunc khou tei thanv the, “Mi Philistinmei ti hei swluaina Isaraelmei ta tizak bammei khou rui kanloumeipu khang kiu tabui tii puni twna cho? Ringhmei Racguangc tuang ricmei nunc ta khaengc bammei mi gihruamh makmei Philistinmeipu hei thow e na cho?”

²⁷Goliat ta swluaimeipu khang swlou pw nimei tei kaniw rui kakhou raclou the.

²⁸David rui kumna meic nunc tei lev kachuc bammei tei kachaic gaanvthaih liangmeipu Eliab rui chu the. Kamei David ta kalungpuamcna sa the, “Nang mi khou hei tabui sw bam tu cho? Nwmbangc thangc bammei nang tuang lauziu nunc tei thow rui zauc bam kanna cho? Nang lungning simei tei ai thay e. Rih adowmei ta zauc niina key tu cho?”

²⁹David rui sa the, “Ai rui tabui swlou thena cho? Ai lat akhat na sini thanvlou nuh makna cho?”

³⁰Kamei meic baihmei gaanv khat khou karih patna mi lat tei thanv dat muay the, kamei rui thanvmei kathuic rui hei tei kumcna daw muay the.

³¹David rui samei tei meic gaanvsaekc rui chu lana kaniw rui hei tei Saul khou salou the. Kata kaw khang meic thouc guang the.

³²David rui Saul khou sa the, “Guanghle, mi Philistinmeipu ti hei meic gaanv khat na sini ping bam khang maek ge! Ai patna adow puni.”

³³Saul rui sa the, “Kiuc hamh e, nang akumhna kata adow ngam nina cho? Nang thu alaucna di he, kamei thu kapanty guay rihmei swna guangmeipu di the.”

³⁴David rui sa the, “Guanghle, ai apu lauziu gaengc e. Kamangliangpui hamh e thei chagamh rui lauziu ta nym kan pwkhou,

³⁵ai rui alayna, akhangvna lauziu ta tei kan dat re khatni kamang chagamh tei rui akhangv pwkhou ai rui kaguang chakit lana dapluai e.

³⁶Ai kamang ta ni chagamh ta ni swluai geic sih the, ringhmei Racguangc tuang ricmei nunc ta khaengc bammei mi ravbaihmei ta kalummei Philistinmeipu ti hei ni hei tei kumcna swlou muay puni de.

³⁷RINGHPOUC rui ata kamangliangpui khatni chagamh khou rui kanlou the; kamei rui ata mi Philistinmeipu khou rui ni kanlou puni de.” Saul rui daw the, “Gay the, tat tho, RINGHPOUC rui nkhavlou diu tho.”

³⁸Kamei rui katuang ricpwan tei David khang tii the: tanzinc pyrun kamei rui David khou runlou the khatni rih thiula nulou the.

³⁹David rui mi ricpwan ruc khou tei Saul tuang baengsaeng kamclouna tat zauc the, tiki kamei tat thay mak khe, kalam thu kamei hei tei piu kacha sw mak khe. Kamei rui Saul khou sa the, “Mi hei piuna ai adow ngam lak ge, ai mi hei piu thay mak ge.” Kumna kamei hei tei luak pat dat ngam the.

⁴⁰Kamei katuang lauziu gaenghmei builwang sin the khatni duithuak khou rui tauthingc panguh khuaic thauna hei tei kakhau khou phungc the. Katuang tauziuru tei chamdaanvna, kamei Goliat ta ariw khang pat the.

⁴¹Philistinmeipu tei katuang nggih sinmeipu ta kahu khou titat lana David daeng thangc tat pat the. Kamei tat ana guangna,

⁴²kamei rui David ta zauc mincna zauc lana, kata malakhav the, kalam thu kamei mbuaih nuay nuaymei, kalwn kachav gay hakmei nggaanvlauna khwan e.

⁴³Kamei rui David khou sa the, “Nang builwang sinna guangmei kiu ai si e na cho?” Mi builwang tei tabui khang cho? Kamei rui katuang rav zanc khou rui David ta siang the.

⁴⁴Kamei rui sa the, “Guang tho,” “Nang pumc tei nthaw-nruay, khouringh khounah taek khang tii puni the.”

⁴⁵David rui daw the, “Nang buy-baeng sinna ata adow khang guang the, tiki ai thu nang rui sa kasicna bammei Ngamparymei RINGHPOUC, Isarael ricmei nunc tuang Racguangc zanc khou rui nang ta athwng khang guang e.

⁴⁶Aseic tingmik kahak hei RINGHPOUC rui nang ta abaanc khou tiilou puni the; ai rui nang ta ngamna nang py dangv puni the. Ai rui Philistinmei ricmei nunc phouh tei nthaw-nruay, khouringh khounah taek khang tii puni the. Khou kiu Isarael khang Ravguangc nai changh e twmei kandih kapwm rui thay puni the,

⁴⁷khatni buy-baeng maek sini RINGHPOUC thu kamei nunc ta kanlou ngam de twmei mi khou hei bammei meic kathuicna rui thay puni the. Kamei hei rihngammeipu e, kumna kamei rui nangniw guayna ta abaanc khou tiilou puni.”

⁴⁸Goliat tei David daeng thangc tat ana guang the, kumna kata athwng khang David tei Philistinmei ding kaliang bammei biak thangc tei pak riu guang the.

⁴⁹David rui kakhau khou numkeyna tauthingc thw akhat laa patna tauziuru khou louna Goliat ta tamcna kazit pat the. Hei tei Goliat sanpiang khou tow kaphumh gut the kumna kapy bak the. Goliat tei kandih khou bow nkhum khuakh key kan the.

⁵⁰Heikumna, baengsaeng kazauh makna, tauziuru lev ntauh na rui David rui Goliat ta ngam lou the!

⁵¹Kamei pak guangna kata niibin the, Goliat tuang baengsaeng kathuap khou rui sat patna kapy dangv the. Philistinmei nunc tei kaniw tuang kapypu tei theic the twmei how lana pak thau the.

⁵²Isaraelmei khatni Judamei nunc tei kaucna kaniw ta nthauna Gat khatni Ekron raengckat nganv alay key tangh the. Sharaim chaeng tei Gat khatni Ekron nganv Philistinmei nunc tei kabiu kabaengmei rui chaeng bow suak the.

⁵³Isaraelmei nunc tei Philistinmei ta nthau tatna hanc guang datna kaniw tuang zypui khou naimei guay tei laa the.

⁵⁴David rui Goliat py tei khuaic thauna Jerusalem thangc phungc guang the, tiki Goliat tuang buy-baeng thu katuang pheykai khou lou the.

⁵⁵David rui Goliat ta adow khang tat kanmei ta Saul rui how lana, “Abner, kamei tei thow nah cho?” twna katuang ricpy Abner khou thanv the. “Guanghle, ai thay mak ge” twna Abner rui daw the.

⁵⁶“Thow cho, tatna zauc o” twna Saul rui sa the.

⁵⁷Kumna Goliat ta swluai tangna David tei zypui khou guang dat pwkhou, Abner rui kata Saul daeng khou nduangh guang the. David tei Goliat py phungcna guang the.

⁵⁸“Nggaanvpule, nang thow nac cho?” twna Saul rui thanv the. “Ai hei nang bangc Bethlehemmeipu Jessi nac e” twna David rui daw the.