Read Rongmei Naga 1 SAMUEL 18 Bible Online

1 SAMUEL 18 - Rongmei Naga bible

1 SAMUEL 18

¹Saul lev David pary rac tang the. Saul nac mpouh Jonathan tei David ta heidikamv nzian the kumna kapumc kahak ta kumcna nzian the.

²Mi nungc tei rui thauna Saul rui David ta kadaeng khou lou the, kakai titat dat mak khe.

³Jonathan rui David kaney tingsaeng champanv sw khang latdyng sw the, kalam thu kata nzian nthuk sihna nzian the.

⁴Kamei rui nu bammei thiula saenghmei lauk patna David khang tii the. Katuang ricpwan, baengsaeng, sauhpai khatni siangiat tii the.

⁵Saul rui David khou thoucloumei taanv guay tei kamei rui tiguang nthuihlou the, kum tina Saul rui kata katuang ricmei pang khou meicdaihmei akhat tiswlou the. Mi ti hei Saul tuang meicdaihmei nunc khatni kamei nunc rui ni pian the.

⁶David rui Goliat ta dowluaina guang dat pwkhou khatni rihmei nunc kakai kakai guang tangc dat pwkhou, Isarael kaidai kathuic khou rui Guangh Saul ta ariw khang ntumei nunc guang the. Kaniw tei neihlamei lu suanna, syamtuaic hiwna, nrah downa alaamhna bam the.

⁷Kaniw tuang ngai khou tei meicpui nunc tei kumna suan the, “Saul rui aching aching ta dowluai the, tiki David rui ching ruh ching ruh ta dowluai the.”

⁸Saul rui hei tei kahaw mak khe, kumna kamei kalungpuamc the. Kamei rui sa the, “David khang kaniw rui ching ruh ching ruh twna sa e, akhang rui ching ching twna sa e. Mi tangv thu kaniw rui kata guangh tiswlou puni the!”

⁹Mi nungc tei rui thauna Saul rui David ta zaucsinhmei kahouh the khatni mamav thau the.

¹⁰Nthuanh thauna Ravguangc rui tii guangmei simei bumaengc rui Saul ta sin the, kumna mbamei kumcna kakai khou kauc katuakc katitna bam the. Kamei tingmik pum sw bammei kumcna, David tei nrah dow bam the, khatni Saul tei buy sinna bam the.

¹¹“Ai kata ngaengsaengc khou chumbinlou rap puni the” twna Saul rui kakhanhna kamei rui kata tamcna buy tei phian pat luan nei the; tiki David rui ley duak ngam kan the.

¹²Saul tei David ta ping the, kalam thu RINGHPOUC rui kata mpatlouna David ta lamluai dat kan the.

¹³Kumna Saul rui kata thouc ganc lana meic 1000 ta kapy sw khang lou kan the. David rui kamei nunc ta rihbamv khou nduangh tat the,

¹⁴khatni kamei rui adowmei guay ngam the, kalam thu RINGHPOUC rui kata nduanghlou bam khwan e.

¹⁵David rui kumna ngam bammei tei Saul rui thay lana kata ping hay hay the.

¹⁶Tiki Isarael khatni Juda khou meic kathuicna rui thu David ta nzian the, kalam thu kamei hei heidikamv ngammei kapy swmei akhat khwan the.

¹⁷Mi tangv tei Saul rui David khou sa the, “Nang tancbauhmei khatni lat piuchuymei rihmei swna ataanv taanc bammei khatni RINGHPOUC tuang ric adow bammei zaeng rui anac aluh gaanvthaihmei Merab ta nang now khang tii ni the.” (Hei kumclou e thei Philistinmei rui David ta swluai kan pwng e, kamei rui sw bam khang kage mak ge twna ning khwan e.)

¹⁸David rui daw the, “Ai guangh tuang aluhgaanv sw bam khang thu ai ni akai kaikhunc ni biuh mak ge.”

¹⁹Tiki Merab ta David khang tii nimei ganv guang pwkhou, kata tei Meholamei kazanc Adriel twna kawmeipu now khang tii kan the.

²⁰Tiki, Saul nacpui Mikal rui David ta nzian the. Hei tei Saul chu pwkhou neihla the.

²¹Kamei kumna kakhanh the, “Ai Mikal ta kakhang tii ni the; David ta phah manh khang ai kata piu ni the, kumna kata Philistinmei rui swluai kan di tho.” Kumna kaneimei swna Saul rui David khou sa the, “Nang hei akai aluhgaanv sw nina the.”

²²“Guangh rui nang ta pian the, guangh tuang meicdaihmei guay rui ni nang ta nzian the; kumna nang kanacpui ti hei kaw khang kadow chamei di the” twna David ta nthiam o twna Saul rui katuang meicdaihmei nunc ta ndiulou the.

²³Kaniw rui hei tei David khou sa the, kum tina kamei rui daw the, “Guangh kai alucgaanv swmei twmei hei daihmei champouhmei bamv laatowmei tuang di the, ai kumhmei lungcsi lungcroucmei khatni ramhkhat na sini hamhmei nunc khang thu mi hei biuh mak ge.”

²⁴Saul tuang meicdaihmei nunc tei rui David rui samei tei kakhou raclou the.

²⁵“Nowpeic manv swna guangh rui nang khou rui laa nimei thu kata zauczihmei khou rui khwm khanghmei swna Philistinmei ta swluaina meic 100 tuang gic ruamc guang nina e” twna David ta Philistinmei rui swluai kan diu khang mi hei Saul rui swmei raeng e.

²⁶Saul tuang meicdaihmei nunc rui Saul rui samei tei David khou raclou pwkhou guangh kai alucgaanv sw nimei tei kakhanhlouna David neihla the. Nowsuanh tingmik nrianh makmei hu khou,

²⁷David rui kamei nunc ta nduanghna Philistinmei meic 200 ta dow the. Kamei guangh kai alucgaanv sw diu khang rui kamei rui kaniw tuang gic tei laaguangna mi guay tei guangh hu khou pac the. Kum tina Saul tei kanacpui Mikal ta David now khang tii pat the.

²⁸RINGHPOUC rui David ta nduanghlou bam e khatni kanacpui Mikal rui kata nzian e twmei Saul rui thay pwkhou

²⁹David ta ping hay hay the khatni mi nungc tei rui thauna Saul tei David tuang zauczihmei kamei ringh saanv sw the.

³⁰Philistinmei ricmei nunc rui guang adow raph rap khwan e, tiki rihbamv kathuicna khou Saul tuang mei baih baihmei khang suangc David tei tancliang raph rap the. Hei zaeng rui David zanc mpeyna dinc the.