Read Rongmei Naga 1 SAMUEL 19 Bible Online

1 SAMUEL 19 - Rongmei Naga bible

1 SAMUEL 19

¹Saul kamei rui David ta swluai puni twna kanac Jonathan khatni katuang meicdaihmei nunc khou sa the. Kum tina Jonathan rui David ta heidikamv nzian lana,

²kamei rui David khou sa the, “Apu rui nang ta swluai khang sw bam the. Nthuanh lauthwan kiu nang ramhthay la tho; meic thay makmei bamv akhat khou nkamh bam la tho.

³Nang dup bammei ramv khou tei ai rui apu daeng khou guang dingna apu khou nang lam khou sa puni the. Ai thayloumei kaguay tei, ai nang khou tithaylou dat puni e.”

⁴Jonathan rui David ta thuancna Saul khou sa the, “Guanghle, nangmei David ruc khou nkhuaimei taanv taanclou rio. Kamei nang khou simei taanv khat na sini taanclou mak ge; kamei rui taancloumei guay hei nang khang gaengmei tuang rana the.

⁵Kamei theih khang ping makna Goliat ta swluai the, kumna RINGHPOUC rui Isaraelmei khang rih ngam daihmei tiilou the. Mi hei howna nang neihla kan the. Kum e thei, tabui swna kalam khat sini maekna David ta swluaina khuay maekmei ruc khou paapc taanc bam nina cho?”

⁶Jonathan rui Saul lung tikalaiclouna kamei David ta swluai dat lak khe twna RINGHPOUC zanc khou latdyng sw the.

⁷Jonathan rui David ta kaw guang datna kalam kaguayna tei raclou the; mi tangv tei kamei rui David ta Saul khou nduangh guanglou datna, David tei kahu nungc kumcna guangh tuang siamruai sw bam dat kan the.

⁸Philistinmei lev rih thau dat the. David rui kaniw ta adowna ngam dai ngamlou tina kaniw tei pak kan the.

⁹Zaeng neih khat thu RINGHPOUC rui tii guangmei simei bumaengc rui Saul ta sin dat the. Kabaanc khou buy sin lana kakai khou dungc bam khwan e, David tei ni katuang nrac downa mi khou tei bam khwan e.

¹⁰Saul rui David ta katuang buy rui ngaengsaeng khou chumbinlou khang karamc khwan the, tiki David rui karei kan tina buy tei ngaengsaengc khou khwn singh singlou the. David mi nungc zingbangc tei duakpatna pak tat kan the.

¹¹David kai tei ding nkuayna tinggaanc pat pwkhou swluai khang Saul rui kamei gaanvsaekc ta mi nungc zingbangc tei thouclou the. “Nang aseic zingbangc pak lam mak ge thei, nthuanh thu theic puni the” twna kanow Mikal rui David khou sa the.

¹²Kanow rui kata kailat khou rui mpat keyna, kamei pak duak tat kan the.

¹³Kamei rui tampyrav tei laana laeng khou nzilou the, kapy khou ziuh hiw pyban lou the, kumna hei tei pheysap rui gumbinlou the.

¹⁴David ta nym khang Saul tuang mei nunc guang pwkhou, kamei nau bam de twna Mikal rui kaniw khou sa daw the.

¹⁵David ta kiu guang zauc o twna Saul rui kaniw ta thouclou dat the. “Kata kiuc kalaeng khou rui mi khou hei puanc guang o, ai rui kata swluai puni” twna kamei rui kaniw khou latdanv tii the.

¹⁶Kaniw kainung gut zauc pwki tampyrav tei laeng khou nzilouna kapy khou ziuh hiw pyban lou bam khwan the.

¹⁷“Tabui swna nang ata kumna guatna ai zauczihmei ta tiduak bam tu cho?” twna Saul rui Mikal khou sa the. Kamei rui daw the, “Kamei pakduak khang ai rui nkhavlou mak ge thei ata swluai ni twna sana the.”

¹⁸David pakduak patna Rama thangc Samuel daeng khou guangna Saul rui kata sw bammei guay tei raclou the. Mi tangv tei Samuel lev kamei Naiot thangc tatna mi khou tei bam the.

¹⁹David tei Rama tuang Naiot khou bam the twna Saul khou poulou the.

²⁰Kata nym khang Saul rui meic thouclou the. Samuel rui kapy swna amuh pang akhat ravmundincna alaamhna bammei ta kaniw how the. Mi khou tei Ravguangc tuang bumaengc rui Saul mei nunc ta ni sinna kaniw ni ravmundincna alaamh thau the.

²¹Mi chamv tei Saul rui chu lana, kalatdiumei asaekc ta thouclou dat re, kaniw ni ravmundincna alaamh thau the. Kathumhmei latdiu tatmei kang ni thouclou dat muay the, mi nunc khou tei ni hei tei kumcna pat muay the.

²²Nkhamh khou kamei kahak Rama thangc kiu tat khang kaamc thau the. Kamei Seku khou duikhunc daihmei akhat daeng khou guang tangc pwkhou, Samuel lev David tabui thangc bam bu cho twna thanv tikhou kaney Naiot khou bam e twna dinclou the.

²³Mi tangv tei kamei tat bammei chaenglwan khou, Ravguangc bumaengc kakhou ni gutlouna kamei ni Naiot nganv ravmundincna alaamhna guang the.

²⁴Kamei kapheybaan luak gancna Samuel hu khou alaamhna neihmaryn khatni zingbangc saanvsaengh pumtang aliauna bam the. (“Saul ni amuh sw thena cho” twmei latchap hei heikumna pat kanmei tuang the.)