Read Rongmei Naga 1 SAMUEL 2 Bible Online

1 SAMUEL 2 - Rongmei Naga bible

1 SAMUEL 2

¹Hanna rui kumna huayney the: “RINGHPOUC rui alung khou neihlamei tipadiklou the; kamei rui taancloumei khang hei rui ai adih neihla cho! Ata zauczihmei nunc ta ai nuic the; ai adih neihla cho, kalam thu Ravguangc rui ata nkhavlou the!

²“RINGHPOUC kumcna nthanmei baihmei maek ge; kamei kumhmei baihmei maek ge, aniu Racguangc kumhmei baihmei gaekloumeipu maek ge.

³Heidi nang gaengh swna sa bammei tei nthaekc tho, daic tuh tumei latsa nang mwang khou rui pat dat ri tho. kalam thu RINGHPOUC hei thaymei Racguangc e, khatni maansei rui taanhmei guay tei kamei latzan sw e.

⁴Tanhmei ricmei nunc tuang saucpai kamei rui riambaulou the, tiki suanmei thu tanc thau the.

⁵Tu nthic-nlic bammei nunc tei phic tu phic zangv the, tiki ndaapc bammei nunc tei ndaapc dat mak khe. Nakamcpeic tei kanac chanei puanc the, tiki kanac geihmeipui ta tei ganc nrulou the.

⁶RINGHPOUC rui swluai e kumna tiringc dat re; kamei rui meic nunc ta taruaih thangc thouc key e khatni kaniw ta laa pat dat re.

⁷Kamei rui asaekc ta tilungcgaylou e, asaekc ta tilungcsilou e; kamei rui asaekc ta ti-nthyamlou e, asaekc ta tidaiclou e.

⁸Kamei rui lungcsi lungcroucmei ta kandih khou rui zaythaulou e, khatni lungcthuy lakmei nunc ta kaniw ramrianra khou rui zaythaulou e. Kamei rui kaniw ta guangh nac nunc pam tiswlou e khatni kaniw ta chakhwang champouhmei bamv khou lou e. Kandih bamv hei RINGHPOUC tuang e; mi ruc khou tei kamei rui kandih kasiamh thau the.

⁹“Kakhou lwmnuhmei nunc panty tei kamei rui gaeklou e, tiki meicsimei nunc tei zinghmei khou amaan kan the; maansei hei karana kapumtan khou rui ngammei tuang hamh e.

¹⁰RINGHPOUC ta zauczihmei nunc ta swmutlou puni; kaniw ruc khou kamei rui tingkauh thangc rui ganh key kumc key puni. RINGHPOUC rui kandih kapwm ta latzan sw puni; kamei rui katuang guangc khou ngamv tiilou puni. Kamei rui thauh teyloumei guangc khou rih ngammei tiilou puni.”

¹¹Mi tangv tei Elkana Rama thangc guang dat the, tiki Samuel thu Shilo khou amuh Eli bangc khou RINGHPOUC siamruai sw bam kan the.

¹²Eli nac mpouh gaanv nei tei kachangc pat mak khwan the. Kaney RINGHPOUC ta thouh sw mak khe,

¹³khatni amuh nunc rui meic nunc khou rui laa nimei riak ni ngaek mak khe. Mi phaan tei meic nunc rui ramh khaengmei tuang nai ti thei amuh nei tuang bangc tei karuang kathumhmei zanh nruang sinna guang raph rap the. Zanh tei suangcna bam khou,

¹⁴kamei rui nruangbuy tei ganlai khou chum gutna chum tow towmei tei amuh khang laa the. Shilo khou khaeng khang guangmei Isaraelmei kaguayna khou hei tei kumcna swlou the.

¹⁵Hei tei na hamhna, kathav tei laa patna raw mak khou rui nganvna amuh bangc tei khaeng bammeipu khou tei guangna “Amuh zanh raw tu khang tii tho; suanghmei zanc kamei laa mak ge, zanh nahmei na khang de kamei laa nimei,” twna sa the.

¹⁶“Taanc nimei thouc taanc kho kumna kathav raw rey kho; mi tangv kiu rui laa nimei laa o,” twna sa ti thei “Ntaw tii rap do! Nang rui tii mak ge thei asutna laa tim e” twna amuh bangc tei rui daw raph rap the.

¹⁷Eli nac mpouh nei tuang paap tei RINGHPOUC mikzaw khou kanganv tangcna si the, kalam thu RINGHPOUC khang khaengmei puat ta tei heidi thouh sw makna kumna sw the.

¹⁸Tiki Samuel thu linen tuang amuh phey piuna RINGHPOUC siamruai sw bam khwan e.

¹⁹Mi ganv khou tei Samuel pui rui kagaanv lev tingkwm tuang khaengmei taanv taanh khang guang khou Samuel khang thiula kasiamhna phungc guang raph rap the.

²⁰Eli rui Elkana lev kanow khou suaihiamlouna, Elkana khou kumna sa the, “Nangney rui RINGHPOUC khang tigutloumeipu phaan tei lyn khang RINGHPOUC rui mi pui khou rui ngana baihmei ni nang khang tiilou dat diu o.” Mi tangv tei kaney kai hanc dat the.

²¹RINGHPOUC rui Hanna ta suaihiamlouna kanac mpouh gaanv thumh khatni aluh gaanv nei puanc dat the. Samuel tei kumna RINGHPOUC tuang siamruai taanv khou daic thau the.

²²Ntaw thu Eli hei gaanvthaih sih the. Kanac nei rui Isaraelmei meic nunc khou taanclou bammei khatni RINGHPOUC tuang pheykai chaengmun khou taanvtaanc bammei ntumei nunc ta ni nkhuaimei taanv taanc the twmei kamei chu bam the.

²³Kamei rui kaney khou sa the, “Nangney tabui swna hei kumhmei tuang hei sw bam tu cho? Nangney tuang simei chamv hei meic nunc khou rui chu the.

²⁴Anac neile, hei tei nthaekc tho! RINGHPOUC tuang mei nunc rui sa bammei hei meic pingmei tuang di the!

²⁵Meic gaanv khat rui maansei gaanv khat ruc khou paapc taanclou e thei, Ravguangc rui kata sa gaeklou nuh de; tiki RINGHPOUC ruc khou paapc taanhmei ta thu thow rui sa gaeklou nina cho?” Tiki kaney tei kaney pu lat chulou mak khe, kalam thu kaney ta swluai khang RINGHPOUC rui dinglou tang the.

²⁶Samuel tei kasaeng kadai khou khatni RINGHPOUC lev maansei rui nzianloumei khou daic thau the.

²⁷Muhzwng gaanv khat RINGHPOUC khou rui mi chamv hei phungc lana Eli khou guang the: “Nangniw pupouc Aron khatni kakai kaikhunc Izipmei guangc bangc sw bammei douc, ai rui ata Aron khou ndauhlou the.

²⁸Isaraelmei kaikhwang kaguayna pang khou rui ai rui kakai kaikhunc ta amuh sw khang, ravchapaeng khou taanv sw khang, agaw ntei khang, khatni nthanmei amuh tuang ephod piu khang kadahlou the. Ravchapaeng khou rawna khaeng nimei tuang zanh saram kakhang laa khang ai rui kaniw khou tiilou the.

²⁹Kum e thei ai rui amei nunc khou rui laa nimei puatkat khaengmei puat ta tei tabui swna agaamvna zauc bam tu cho? Eli, tabui swna amei nunc rui akhang katloumei puatkat khou tei rui gay liangmei tei rui kamei tu chuth chutlouna bam khang nuhlouna ata suangc nang nac ney ta chakhwang sw bam tu cho?

³⁰Nang kai kaikhunc khatni nang kai puinac rui atuang amuh sw bam tanh tan puni twna RINGHPOUC Isaraelmei Racguangc, ai rui rey nungc tei latdyng swlou kan the. Tiki ai rui sa the, hei tei kumc dat lak khe. Ata chakhwang swmei nunc ta tei ai rui chakhwang swlou puni, ata thouh sw makmei nunc ta tei ai thouh sw mak puni.

³¹Zauclo, nang kai kaikhunc khou rui gaanvsuh gaanvthaih lungc pat mak khang, nang kai kaikhunc khou khatni nangkai puinac khou chabwan guay ta ai rui swluai nimei ganv guang pu the.

³²Nang hei ryanra puni the khatni Isaraelmei baihmei guay khou ai rui tiilou pw nimei suaihiam ta tei nang zaucna mamav puni the, tiki nang kai kaikhunc khou thu gaanvsuh gaanvthaih lungc pat dat pw lak khe.

³³Tiki ai rui nang kikta gaanv khat ta thu tiringclou puni, kumna kamei rui atuang amuh sw puni. Kamei kamik tiat puni kumna rigwnmei maekna lungc puni, kumna nang kikta baihmei guay tei thu suc-rih hu khou theic puni.

³⁴Nang nac mpouh Hophni lev Phinehas neih khat na khou theic pwkhou, ai rui samei guay hei guang puni the twmei lyan the.

³⁵Alat piu chuymei khatni ai rui kata taanh khang kahawmei guay taanc pw nimei amuh akhat ai rui kadah puni. Ai rui kakikta tinailou puni. Kamei ai rui thauh teyloumei guangc hu khou siamruai sw tanh tan bam puni.

³⁶Nang kikta theic nsaekcloumei guay tei mi amuc khou tei guangna syandui khatni taektw ney puni, kaniw bung khang amuh nunc daeng khou taanvphy khang taanv ney puni.”