Read Rongmei Naga 1 SAMUEL 21 Bible Online

1 SAMUEL 21 - Rongmei Naga bible

1 SAMUEL 21

¹David Nob khou amuh Ahimelek daeng thangc tat the. Ahimelek kadunhna kata ariw khang patna “Tabui swna nang rana mi khou hei guang tu cho?” twna thanv the.

²David rui daw the, “Ai guangh tuang thouc tatna bammei tuang e. Kamei rui ata thoucloumei taanv hei meic gaanv khat na khou sini tithay riu twna sa e. Amei nunc ta thu, kabamv akhat khou ata ariw khang salou kan e.

³Nang khou tabui bui nai tu cho? Akhang ntyan dwm panguh na tiilou o, hamh e thei nang khou naimei baih baihmei pwni tiilou o.”

⁴Amuh tei rui sa the, “Akhou nthanmei ntyan na hamhna baihmei ntyan maek khe; nang mei nunc kiu aseic dak khou ntumei khou tatlou mak ge thei nang mi kiu laa tho.”

⁵David rui sa the, “Kaniw tatlou mak ge. Aniw nthukmei chaengtat hamh sini amei nunc thu kariak khou nthannna tat tanh tan bam de. Aseic luan thu nkunna nthukmei thouc tat bammei tuang e!”

⁶Kumna amuh tei rui David khang nthanmei ntyan tei tii the, kalam thu kakhou naimei twmei kiu Ravguangc khang katloumei ntyan, kathanh lou lynna nthanmei ntyan pang khou rui laa patmei ntyan na khwan e.

⁷(Mi nungc tei Saul tuang kiruai gaenghmei kapypu Edom thangc rui guangmei Doeg twmeipu kariak thouc sw khang bam nangc khwan the.)

⁸David rui Ahimelek khou sa the, “Akhang tii nuhmei bui hamh e thei baengsaeng nang khou nai puni cho? Guangh latdanv tei katumc langvna atuang baengsaeng khatni baihmei buy baeng sin nangh makna the.”

⁹Ahimelek rui daw the, “Nang rui Ela nzaengc khou dowluai kanmei Philistinmei Goliat tuang baengsaeng tei thu akhou nai e; hei tei phey rui duamna ephod thei khou tei lou kan e. Nang sin nii e thei hei tei sin tho. Mi khou hei naimei buy-baeng kiu mi na hei di the.” “Mi kiu tii tho. Baihmei gaymei baengsaeng baih thangc ni maek khe!” twna David rui sa the.

¹⁰David thau lana Saul khou rui pak tat the, kumna Gatmei tuang guangc Akis daeng thangc tat the.

¹¹Guangh tuang meicdaihmei nunc tei rui Akis khou sa the, “Mipu hei mi kandic tuang guangh David tei hamhna cho? Mipu hei meicpui nunc alaamhna ‘Saul rui aching aching dow e, tiki David rui ching ruh ching ruh dow e’ twna suan bammeipu tei the.”

¹²Kaniw lat rui David lung khou ramh tiningtowlou the, kumna kamei Guangh Akis ta ping thau the.

¹³Kumna David tei kaniw hu khou mbamei thak sw the. Kamei kaidai raengh kaikhamv ta kabaanc rui nkhuanhna kakhactang hiw khou katamv zow talaih laina bam the.

¹⁴Kumna Akis rui katuang meicdaihmei nunc khou sa the, “Zauc lo! Mipu hei mba the! Tabui swna nangniw kata adaeng khou nduangh guang bam tu cho?

¹⁵Adaeng khou mbamei geic langv mak hena cho? Tabui khang akai khou kumna swzin swzana ata sw kaguakc bam khang nduangh guang bam tu cho?”