Read Rongmei Naga 1 SAMUEL 22 Bible Online

1 SAMUEL 22 - Rongmei Naga bible

1 SAMUEL 22

¹David Gat kaidai khou rui pak tat datna Adullam namvdai daeng khou naimei khowlang akhat khou paklou the. Kachaic nunc khatni kakai kaikhunhmei baihmei guay tei kamei mi khou tei bam e twmei chu lana kadaeng khou guang the.

²Rairiu khaengmei nunc, pow phunghmei nunc, khatni pian makmei nunc kadaeng khou guang the, kaniw kaguayna meic 400 tuang kapy sw the.

³David mi khou tei rui Moab tuang Mizpa thangc tatna Moabmei guangc khou sa the, “Ravguangc rui akhang taanclou nimei tei taanclou mak saanv apui lev apu nang daeng khou key bam ni the.”

⁴Kumna David rui kapui lev kapu kaney ta Moabmei guangc daeng khou lou duc the, kumna David rui khowlang khou nkamh tat bam saanv kaney mi khou tei bam the.

⁵Khoutei muhzwng Gad rui David daeng khou guangna sa the, “Hei khou hei bam ri tho, katumcna Juda kandic thangc tat dat tho.” Kumna David mi bamv tei ganclouna Heret ngouc bangc thangc tat the.

⁶Zaeng neih khat Saul tei Gibea khou luanghbut akhat khou tamuc bang akhat bangc khou, kabaanc khou buy ntungh lana, katuang ricmei guay kadaeng ding nkuayna bam khwan e. David khatni kamei nunc ta ariw the twna kakhou poulou the.

⁷Kum tina kamei rui katuang meicdaihmei nunc khou sa the, “Nking o, Benjaminmei nunc! David rui nangniw guayna khang laupuk khatni drakha pikwan tii pwng e khatni nangniw ta katuang ricmei pang khou meicdaihmei nunc tiswlou pwng e twna ningna cho?

⁸Nangniw rui aruc khou nkamhna sw bammei kiu mi khang hei tha? Anac kahak hei David lev kaney lat khat na sw bam the twmei nangniw gaanv khat na sini akhou dinclou mak ge. Meic gaanv khat na sini akhang kadanlou mak ge khatni amei David rui ata swluai khang rik bam e, hei tei anac rui katiu thaulou bam e twmei meic gaanv khat na rui sini akhou dinclou mak ge!”

⁹Khoutei Doeg tei Saul tuang rihpy nunc ding khou ding bam khwan e, kumna kamei rui sa the, “David tei Nob thangc Ahitub nac Ahimelek daeng khou guang bammei ta ai how the.

¹⁰Ahimelek rui David khang RINGHPOUC khou kachuc kan e, kumna kamei rui David khang taektw asaekc lev Philistinmei Goliat tuang baengsaeng tei tiilou kan e.”

¹¹Kumna guangh Saul rui amuh Ahimelek khatni kariang kaluaic Nob khou amuh sw bammei nunc ta kaw khang thouclou the, kumna kaniw guang the.

¹²Saul rui sa the, “Nking o, Ahimelek.” “Nking bam the, aguanghle,” twna kamei rui daw the.

¹³Saul rui kakhou thanv the, “Tabui swna David nangney ata sw kasic khang mbinna sw bam tu cho? Tabui swna nang kakhang ntyan khatni baengsaeng tii bam tu cho khatni kakhang Ravguangc khou kachuc bam tu cho? Ntaw thu kamei ata zauczihna ata swluai khang rik bam the.”

¹⁴Ahimelek rui daw the, “David thu nang tuang lwmnuh liangmei mei e cho! kamei hei nang luhgaanv the, nang ta gaek bammei rihpy the, khatni guanghkai khou bammei guay rui chakhwang chamhpouh sw sihna bammeipu the.

¹⁵Ngguay, ai kakhang rui Ravguangc khou kachuc the, mi hei aseic rui reymei hamh e. Nang ta sw kasic khang mbinna sw e twmei lat thu, guangh rui ata khatni akai khou gaanv khat na ta sini nkhamlou khang maek ge. Mi lam khou tei nthyampu, daicpu ai ramhkhat na sini thay mak ge!”

¹⁶Guangh rui sa the, “Ahimelek, nang khatni nang riangluaicmei guay hei theic nina di the.”

¹⁷Khoutei kadaeng khou ding bammei rigaanvpu khou sa the, “RINGHPOUC tuang amuh nunc ti hei dowluai tho! kaniw David lev lat khat na sw the, kaniw thay saengc sih bam sini David pak kan the twmei akhou dinclou mak ge.” Tiki rigaanvmei nunc tei RINGHPOUC tuang amuh nunc ruc khou tei kaniw baanc zay thau nii mak khwan e.

¹⁸Kum tina Saul rui Doeg khou, “Nang rui dowluai tho!” twna sa the, kumna Doeg rui kaniw kaguayna ta dowluai kan the. Mi nungc tei amuh tuang ephod phungc biuhmei amuh gaanv 85 ta kamei rui dowluai kan the.

¹⁹Saul rui amuh tuang kaidai Nob khou bammei baihmei guay ta ni dowluai ngam khang latdanv pat the: Ntu nggaanv, alauc ngasatna, guaih, kuanniam khatni lauziu kapwmna dowluai ngam the.

²⁰Tiki Ahimelek nac mpouh pang khou Ahitub rui puanhmei Abiathar thu pak duakna David thei lay kan the.

²¹Saul rui RINGHPOUC tuang amuh nunc ta swluai ngam kan the twna kamei rui David khou dinclou the.

²²David rui kakhou sa the, “Mi nungc tei ai Doeg ta how khou tei kamei Saul khou dinclou puni muay di the twmei ai thay the. Kumna nang riang nang luaic guay theic kanmei tei akhuay di the.

²³Adaeng khou bam tho; ping dat ri tho. Nang ta swluai khang phu bammei tei ata ni muay di the. Adaeng khou bam e thei kabiu mak puni the.”