Read Rongmei Naga 1 SAMUEL 23 Bible Online

1 SAMUEL 23 - Rongmei Naga bible

1 SAMUEL 23

¹Philistinmei rui Keila namvdai ta adow bam the kumna tay guang thanhloumei nap houc bam the twmei David rui chu the.

²“Ai tatna Philistinmei nunc ta adow di kho cho?” twna kamei rui RINGHPOUC khou thanv the. “Ngguay, kaniw ta tei adowna Keila ta kanlou tho” twna RINGHPOUC rui daw the.

³Tiki Davidmei nunc rui kakhou sa the, “Mi Juda khou sini aniu pingna bam the ki akumhna Keila thangc keyna Philistinmei ricmei ta adow bam dat khona cho?”

⁴Khoutei David rui RINGHPOUC khou thanv dat re. RINGHPOUC rui kakhou daw the, “Keila thangc tatna adow tho, Philistinmei ta nang baanc khou tiilou kan the.”

⁵Kumna David kamei nunc ta nduanghna Keila thangc tatna Philistinmei ta adow the; kaniw rui meic geihmei ta dow the kumna kaniw tuang khouringc mpeyna laa the. David rui mi namvdai ta heikumna kanlou the.

⁶Ahimelek nac Abiathar kamei pak duakna Keila khou David khou paklou khou tei, kamei ephod phungc tat khwan e.

⁷David Keila thangc tat kan the twmei Saul khou dinclou pwkhou, kamei rui sa the, “Ravguangc rui kata abaanc khou tiilou the. Raengh raeng piangh piangna raenghmun mbangh tiatloumei kaidai khou gutna David karana phah khou gutlou di the.”

⁸Saul rui katuang ricmei nunc ta rih sw khang kabaina Keila thangc keyna David khatni kamei nunc ta dingbin khang thouc the.

⁹Saul rui kata kwam khang sw bam the twmei David rui chu lana kamei rui amuh Abiathar khou sa the, “Ephod tei mi khou hei laaguang tho.”

¹⁰Khoutei David rui sa the, “He RINGHPOUC, Isarael Racguangc, Saul tei Keila khou guangna nang bangc azaeng rui mi kaidai ta tei swmutlou khang sw bam the twna chu the.

¹¹Keilamei nunc rui ata Saul baanc khou tiilou nina cho? Ai rui chumei kumcna Saul kiu guang changh puni cho? He RINGHPOUC, Isarael Racguangc, mi hei dawlou khang ai huay e!” “Saul guang puni” twna RINGHPOUC rui daw the.

¹²“Keilamei nunc rui amei nunc khatni ata Saul khou tiilou puni cho?” twna David rui thanv dat re. “Ngguay” twna RINGHPOUC rui daw the.

¹³David lev kamei nunc meic guayna 600 dou tei katumcna Keila mpatlouna tat dat kan the. Kaniw rui tatdiwmei bamv kathuic khou ruanna tat the. David Keila khou rui tat dat kan the twmei chu lana Saul tei nthaekc dat kan the.

¹⁴David chyngramv, Zip daeng khou naimei tazikramv khou nkamh bam the, Saul rui kata phuna bam e tiki Ravguangc rui David ta Saul baanc khou tiilou mak ge.

¹⁵Saul rui kata swluai khang pat the twmei David thay the. David tei Zip daeng khou naimei tazikramv khou Hores kawmei bamv khou bam khwan e.

¹⁶Jonathan rui mi khou tei kadaeng khou guangna Ravguangc rui gaeklou puni de twna kata katiuthaulouna,

¹⁷kakhou sa the, “Ping nangh e, apu Saul rui nang ta sw kasic ngam ni tuang hamh e. Nang hei Isaraelmei guangc sw puni khatni ai rui nang bangc khou bam puni twmei apu rui nthanna thay e.”

¹⁸Kaney tei champanv khanv khang khat khat khou nthukmei latdyng sw kan the. David tei Hores khou bam duc kan the, kumna Jonathan kai guang dat kan the.

¹⁹Mi tangv Ziphimei gaanvsaekc Gibea khou guangna Saul khou sa the, “David tei aniu ramv Juda tazikramv tuang dihba biak thangc naimei Hakila Chyng khou Hores kawmei bamv khou nkamh bam the.

²⁰Guanghle, nang rui kata nym niina bam e twmei aniu thay e; nang guang tho, aniw rui nang khang kata nymlou puni the.”

²¹Saul rui sa the, “Nangniw rui ata heidikamv nzianloumei khang rui RINGHPOUC rui nangniw ta suaihiamlou pu diu!

²²Nangniw tat datna thay nthan dat ro, kamei tabui bam khou bam cho khatni mi khou kiu thow rui howna cho twmei thay nthan guang o. Kamei hei karouc thaypui mei e twmei chu e.

²³Kamei dup bammei bamv kahak kiu thay nthan thiak guang o, kumna katumcna akhou mi chamv hei phungc guang dat nina the. Kum pw e thei ai nangniw thei tatna, kamei mi bamv khou kiu bam di he tw e thei, Juda kandic kapwm sini gapna ai rui kata phu puni.”

²⁴Kumna kaniw rui Saul hu kasuakcna Zip khou hanc guang dat the. David khatni kamei nunc tei Maon tuang Tazikramv tuang dihba Araba khou bam khwan e.

²⁵Saul lev kamei nunc tei David ta phu khang tat pat the, tiki David rui mi chamv tei chu lana Maon tuang tazikramv khou khowtau chyng thangc tatna mi khou tei bam the. Mi chamv tei Saul rui chu lana David ta suic tat kan the.

²⁶Saul lev kamei nunc tei mi chingcbut naek akhat thangc khatni David lev kamei nunc tei kanaek akhat thangc bam the. Saul khatni kamei nunc tei ana guangna kaniw ta nym khang guang the, khoutei David kaniw pak tat khang chadi thau the.

²⁷Hei dyng khou tei latdiwmei gaanv khat guangna Saul khou sa the, “Katumcna guang dat tho! Philistinmei rui aniu ramv khou rih key bam the!”

²⁸Kumna Saul tei David ta suic taanna Philistinmei ta adow khang tat kan the. Kum tina mi bamv ta tei pakduakmei Taudaic twna kaw the.

²⁹David rui mi bamv tei mpatlouna Engedi ramv thangc dup tat the.