Read Rongmei Naga 1 SAMUEL 24 Bible Online

1 SAMUEL 24 - Rongmei Naga bible

1 SAMUEL 24

¹Saul tei Philistinmei ta adowna guang dat pwkhou, David tei Engedi daeng khou bam e twmei dinclou the.

²Saul rui Isarael khou gay liangmei ricmei 3,000 ta nduanghna David lev kamei nunc ta phu khang Chalung khow thangc tat the.

³Kamei chaeng daeng khou naimei lauziu kuanc akhat daeng khou guang the, mi khou tei khowlang akhat nai bam khwan e, kumna Saul tei zaeng nthaekc khang mi khou tei gut the. Mi khowlang khou tei David lev kamei nunc tei kalungc syng thangc bamrey khwan the.

⁴David khou katuang mei nunc rui sa the, “Mi hei nang khang kadow chamei di the! RINGHPOUC kamei rui nang tuang zauczihmei ta nang baanc khou tiilou puni kumna nang rui karuc khou sw nii niimei sw nuh e twna sa kan tuang the.” David tei guangc pat lana Saul thay mak khou Saul tuang pheykiak ruamc tap pat the.

⁵Mi tangv tei David rui Saul tuang pheytin ruamc tap lapui zaeng rui kalung katuakc the,

⁶kumna kamei nunc khou sa the, “RINGHPOUC rui guangh khang kapah patloumei akaipouc ta ai rui tikabiu kabaeng mak khang RINGHPOUC rui swlou diu tho! Ai rui kata khat sini sw kasic lak ge, kalam thu kamei hei RINGHPOUC rui kadahloumei guangc e.”

⁷Kaniw rui Saul ta adow lak nina de twmei David rui kamei nunc khou sa nthanlou the. Saul thau datna mi khowlang khou tei rui tat dat kan the.

⁸Khoutei David rui kathei lay patna “Guanghle!” twna kauc the. Saul tei ziangrih pat the, kumna David kandih khou nkhum keyna sa the,

⁹“Ai rui nang ta sw kasic khang sw bam e twna samei nunc lat tei tabui swna nang laa bam tu cho?

¹⁰Ntaw na hei mi khowlang khou hei RINGHPOUC rui nang ta abaanc khou tiilou the twmei nang how puni the. Amei gaanvsaekc rui nang ta swluai khang sa the. Tiki ai nang khang alung kabiu e kumna ai rui nang ta katit na sini swkabiu lak ge, kalam thu nang ti hei RINGHPOUC rui guangh sw khang kadahloumei tuang e.

¹¹Zauclo, apule, nang tuang phey kiak ai sin bammei hei zauc lo! Ai nang ta swluai nuhmei tuang the, tiki mi na hei ai rui ruamc patmei tuang e. Ai nang ruc khou suc-rih sw nimei tuang khatni nang ta sw kasic nimei tuang maek ge twmei nang lwm nuh the. Ai rui nang khou nkhuailoumei tuang maek sini ata swluai khang nang rikna bam e.

¹²Anei kak khou thow rui nkhuai cho twmei Ravguangc rui latzan swlou pu diu o! Nang rui aruc khou sw bammei khang hei kamei rui nang ta dandi tii pu diu, kalam thu ai rui nang ta katit na sini tikabiu lak ge.

¹³‘Meicsimei rui simei taanh tu e’ twmei reynungc latkwdyn tei nang thay e cho. Kumna ai rui nang ta sw kasic lak ge.

¹⁴Isaraelmei guangc hei thow ta swluai nina pat tu cho? Nang thow ta rik bam tu cho? Si theihmei ta ny? Taleih ta ny?

¹⁵RINGHPOUC rui latzan swna thow rui nkhuai cho twmei thay puni. Kamei rui mi lam khou hei zauclouna ata gaeklou pw diu khatni nang khou rui kanlou pw diu.”

¹⁶David sa tangv key pwkhou Saul rui sa the, “Mi hei nang changh dina cho, anac Davidle?” Kamei kap the.

¹⁷Khoutei kamei rui David khou sa the, “Nang akhang suangc ravchap tatchuy the. Ai rui nang ta nkhuaina sw bam sini nang rui akhou gayna swlou the!

¹⁸Nang rui ata adih nzian cho twmei nang rui aseic akhou lyanlou the, kalam thu RINGHPOUC rui ata nang baanc khou tiilou sini nang rui ata swluai mak khe.

¹⁹Zauczihmei ta nym lana swkabiu kabaeng makna mpatlou bammei thow naina cho? Nang rui aseic akhang swloumei khang hei rui RINGHPOUC rui nang ta suaihiamlou pudiu!

²⁰Nang Isaraelmei guangc sw puni the kumna nang guanghdic tei ntipna nai bam puni the twmei ntaw ai thay the.

²¹Azanc khatni akai kaikhunc zanc hei amaanpary mak khang nang rui akikta ta daeklou ni de twmei latdyng RINGHPOUC zanc khou swlou o,”

²²Daeklou ni de twna David rui latdyng sw the. Mi tangv tei Saul kakai thangc hanc kan the, khatni David kamei nunc lev twna kaniw tuang kaithi kai thangc tat dat kan the.