Read Rongmei Naga 1 SAMUEL 25 Bible Online

1 SAMUEL 25 - Rongmei Naga bible

1 SAMUEL 25

¹Samuel theic the kumna Isaraelmei guay guang kaduaina kata huay the. Mi tangv kaniw rui kata Rama khou kakai khou mbeihlou the. Mi tangv tei, David Paran tuang tazikramv thangc tat kan the.

²Maon khou meic gaanv khatpu lungc bam khwan e, karamv kadui rui Karmel khou nai bam khwan e. Mi pu kiu mpeyna lungcgay khwan e; kalauziu 3000 khatni ziuh 1000 nai khwan e. Karmel khou tei kamei khouringh hiw tiapna bam khwan e.

³Sa bammeipu zanc kiu Nabal twna kaw e, kanow zanc rui Abigail twna kaw e. Mi pui tei ningtyngmei khatni kalwn kachav gay e tiki gaanvmeipu tei thu kareic simei khatni zauzian thay makmei Kaleb kaimei nunc sw khwan e. Nabal tei Karmel khou kalauziu pang hiw tiap bam khwan e,

⁴kumna tazikramv khou bammei David rui mi lam tei chu khwan the.

⁵Kumna Karmel thangc tatna Nabal ta phuna katuang suaihiam tiilou tio twna nggaanv ruh ta David rui thouclou the.

⁶Nabal khou kumna sa o twna kamei rui kaniw khou kady the: “Nang panty lungsing diu! Nang khatni nang kai kaikhunc ravgay rihgayna lungc diu! Nang tuang naimei kapwm tei kara-karic gayna lungc kan diu!

⁷Nang rui nang lauziu nunc hiw tiap bam e twmei kamei chu the, khatni nang tuang lauziu gaenghmei nunc aniw daeng khou bam the, kumna kaniw ta aniw swkasiclou mak ge twmei nang thay kanmei ta kamei kahaw e. Mi Karmel chyng khou bam khou kaniw tuang puat ramhkhat na sini houclou tuang maek ge.

⁸Nang rui kaniw khou thanv ti thei kaniw rui kaling sa puni de. Khumngai nungc aniw guang the, kumna aniw ta laa chuylou o twna David rui nang khou sa e. Nang bangc aniw khang khatni nang champanv David khang nang rui tii nuh nuhmei tiilou o.”

⁹David mei nunc tei rui mi lat hei Nabal khou David zanc khou rui dinclou the, kumna kaniw nkhwan bam khwan the.

¹⁰Kumna Nabal rui nkhamh khou daw the, “David kiu thow cho? Jesse nac kiu thow cho? Mipu lam kiu ai chu zat mak he! Aseicdou hei mi ramv khou hei pak tat kanmei bangc rui padik the!

¹¹Ai rui atuang ntyan lev dui, khatni atuang lauziu kahiw tiapmei nunc khang swluailoumei lauziuzanc hei laana tabui thangc mei cho twmei ai rui thay makmeipu rui thouc guangmei nunc khang hei tii ngam mak ge!”

¹²David mei nunc tei guang datna Nabal rui samei guay tei raclou the.

¹³“Nangniw tuang baengsaeng phungc tho!” twna kamei rui latdanv pat the, kumna kaniw tuang baengsaeng phungc the. David ni kabaengsaeng phungcna karicmei 400 dou ta nduanghna thau the, meic 200 ta kaniw puktaekloumei bamv khou ganclou duc the.

¹⁴Nabal bangcpu gaanv khat rui Nabal now Abigail khou sa the, “Nang chu tha cho? David rui tazikramv khou rui latdiwmei gaanvsaekc ta thouc guangna aniw kaipouc khang suaihiam tii guangmei tuang e, tiki kamei rui kaniw ta tizaklou the.

¹⁵Kaniw tei aniw khang mpeyna gayna swlou e, kaniw rui aniw ta tikatuakclou zat mak ge, khatni aniw kaniw lev ramvpuk khou bam nchamc bam saanv tei aniu tuang ramh akhat na sini amaan mak ge.

¹⁶Aniw tuang lauziu gaengcna kaniw lev bam kariu bam saanv kaniw rui aniw ta zingbangc kalaanv gaeklou e.

¹⁷Mi hei nang kakhanhna tabui sw nina cho twmei kaphianh tho. Mi hei akaipouc khatni kaikhunhmei guay khang sisihmei tuang pat nuhmei tuang di the. Kamei heidikamv kalung sina meic gaanv khat na lat sini chulou mak khe!”

¹⁸Abigail tei katumcna ntyan dwm 200, drakhadui padikmei guaihgic khau kanei, rawminhmei lauziu panguh, ntyan kang kilogram 12, drakhathai kang chuam 100, tadutthai kanghmei tyan 200, laana kuanniam nunc puat swlou the.

¹⁹Khoutei kamei rui siamruaimei nunc khou sa the, “nangniw tat hu tho kumna ai nangniw thei lay tat puni.” Tiki kamei kagaanv khou lat khat na sini salou mak ge.

²⁰Kamei katuang kuanniam tuangcna chyngnaek akhat khou tat pat pwkhou, David lev kamei nunc tat patmei ta thay mak daekna ariw the.

²¹Mi ganv khou tei David rui kumna kakhanh bam khwan the, “Mi tazikramv khou tabui sw khang ai rui mipu tuang puat nunc ta tei gaek bam khwan tu cho? Katuang ramh akhat na sini laalou mak ge, ai rui kata nkhavloumei phy kiu mi hei the ny!

²²Tinggaanc mak khou kaniw kaguayna ta swluai mutsutlou mak ge thei Ravguangc rui ata bailuailou pw di tho!”

²³Abigail rui David ta howpui lev, katumcna katuang kuanniam khou rui keyna kazaw kandih sow nkhumna David ta kalum the,

²⁴kumna kamei rui kaphaypav khou nkhum keyna sa the, “Kaipoucle, nangbangcpui ai rui samei nkinglou o! Nkhuaimei tei akhou nkhamlou o.

²⁵Nabal lat tei ramh khang chaklou rio, kamei ramhkhat na khang sini gaengpui mei hamh the! Kamei kazanc kumc rapna mbamei de. Kaipoucle, nang siamruaimei nunc guangmei ganv khou tei ai bam mak khwan the.

²⁶Nang rui khwm khangcna nang tuang zauczihmei ta swluai makmei hei RINGHPOUC na rui e. Ringcna bammei RINGHPOUC zanc khou ntaw ai nang khou latdyng sw e twmei thu nang tuang zauczihmei nunc khatni nang ta sw kasic niina ningmei guay ta Nabal ta kumcna dandi tii puni the.

²⁷Kaipoucle, ai rui nang khang phungc guangmei mi kaipat hei laalouna nang mei nunc khang tiilou ti tho.

²⁸Kaipoucle, ai rui taanc laanhloumei guay tei kuaklou o. RINGHPOUC rui nang ta khatni nang kikta ta guangh tiswlou puni the, kalam thu nang rui katuang ric adow bam e; khatni nang hei ringc bam saanv simei taanv taanc lak ge.

²⁹Thowkumhmei rui nang ta adow khang sw pwkhou khatni swluai swtiat khang sw pwkhou, meic gaanv khat rui kunghmei lanv ta gaek kumc RINGHPOUC nang Racguangc rui nang ta gaeklou diu. Nang tuang zauczihmei nunc ta thu, gaanv khat rui katuang tauziuru khou rui ntauh thu ziuc pat kumc kamei rui kaniw ta ndat ganc puni.

³⁰RINGHPOUC kamei rui nang khang nrianhloumei guay tei tiguang nthuihlouna nang ta Isaraelmei guangc tiswlou the.

³¹Kum e thei khuay maekmei ta swluai kanmei khatni nang khwm khangc kanmei khang tei rui nang lung kabiu bam rio. Kaipoucle, RINGHPOUC rui nang ta suaihiamlou pwkhou ata amuclou rio.”

³²David rui kakhou sa the, “RINGHPOUC Isarael Racguangc ta thuanc o, aseic nang ata ariw khang kamei rui thouc guangmei tuang the!

³³Nang khou mi kumhmei lungning gaymei hei ning patna swloumei paan rui ai khwm khangcna meicdow nimei khou rui zay kareiloumei khang Ravguangc ta thuancku e.

³⁴Nang ta sw kasic nimei khou rui RINGHPOUC rui ata zay kareilou the. Isarael tuang ringc bammei Racguangc zanc khou rui samei tuang e twmei thu nang rui ata katumcna ariw mak khwan e thei Nabal tuang mei guay tei aseic lauthwan hei theic ngam bam kan nimei tuang the!”

³⁵Mipui tei rui kakhang phungc guangmei kaipat tei David rui laalouna kakhou sa the, “Nang kai hanc dat tho kumna lungh ryanra ri tho. Nang rui kahawmei tei ai rui taanclou puni the.”

³⁶Kai khou guanghtaek tuna khumngay swna bammei Nabal daeng khou Abigail guang dat the. Kamei zouh zangv mbana kazaeng gayna bam the, kum tina nthuanh tinggaanc pat mak saanv kamei rui kakhou lat khat na sini sa mak ge.

³⁷Kagaanv mphaengv pat datmei tangv kamei rui ramh katana kakhou raclou the, khoutei kalungthw khimh khimlou the, ntauhbut kumcna kalung kari mak khe, kapaek theic the.

³⁸Zaeng ruh tangv RINGHPOUC rui Nabal ta bai luai the.

³⁹Nabal theic the twmei David rui chu lana, kamei rui sa the, “RINGHPOUC ta thuanc e! Ata tizakcloumeipu Nabal ta kamei rui khwm khangclou the kumna kabangcpu rui nkhuaimei taanv taanc nimei khou rui zay kareilou the. RINGHPOUC rui Nabal ta katuang simei taanv khang rui dandi tii kan the.” Mi tangv David rui Abigail ta kanow khang nthiam khang khatni kaw guang khang meic thouclou the.

⁴⁰David bangc nunc tei Karmel khou Abigail daeng khou guangna sa the, “David rui nang ta kanow khang kaw guang tho twna aniw ta thouclou pwna guang tuang the.”

⁴¹Khoutei Abigail kandih khou nkhum keyna sa the, “Ai hei kabangcpui e, kabangc nunc phay khiulou khang chamdaanv bam e.”

⁴²Kamei katumcna thau lana katuang kuanniam tuangc the. Kabangcpui gaanv panguh ta nduanghna kamei David bangc nunc thei lay tat the kumna kanow sw the.

⁴³David Jezreelmei luc Ahinoam ta kaw the, kumna ntaw Abigail ni David now sw the.

⁴⁴Mikal ta thu Saul rui Lais nacpu Palti, Gallim kaidaimeipu now khang tii dat kan the.