Read Rongmei Naga 1 SAMUEL 27 Bible Online

1 SAMUEL 27 - Rongmei Naga bible

1 SAMUEL 27

¹David rui kakhanh the, “Zaeng neih khat thu Saul rui ata swluai pwng di the. Akhang gay liangmei thu Philistinmei kandic thangc pakloumei na pwng di the. Kum pwkhou Saul rui ata Isarael khou phu taan pwng the, kumna ai duak pwng the.”

²Kumna David tei katuang mei 600 tei lev twna Gatmei guangc Maok nac Akis daeng thangc katumcna tat the.

³David khatni kamei nunc tei kaniw kai kaikhunc nunc lev twna mi khou tei lungc the. David kanow gaanv nei — Jezreel thangc mei Ahinoam khatni Karmel thangc mei Abigail Nabal rui amaypui tiswloumeipui kaney ni hei khou tei bam khwan e.

⁴David Gat thangc pak tat kan the twmei chu lana Saul kata phu nthaekc the.

⁵David rui Akis khou sa the, “Nang rui ata nzian e thei, ai lungh khang kaidai launa akhat tiilou o. Nang tuang guangc kaidai khou lungc katuakc bam lak ge!”

⁶Kumna Akis rui kakhang Ziklag kaidai tei tiilou the, kum tina mi khou tei rui thauna Ziklag hei Judamei guangc nunc tuang sw bammei tuang e.

⁷David rui Philistinmei kandic khou bw 16 lungclou khwan e.

⁸Mi ganv khou tei David lev kamei nunc tei, mi bamv khou tei lungc saengc sih guangmei nunc — Geshur, Girzi, khatni Amalekmei nunc ta adow khwan e. Kamei rui Shur nganvna, Izip chaeng saanvsaengh kaniw kandic tei laa key the.

⁹Ntumei, nggaanvmei baih makna swluai key the khatni kaniw tuang lauziu pang, guaih pang, kuanniam pang, guaikuan pang, khatni pheybaan nganvna laa the. Mi tangv tei kamei Akis khou guang dat the,

¹⁰kumna Akis rui kakhou “Aseic luan hei nang tabui thangc akwam tat lana cho?” twna thanv the. David kamei Juda tuang dihba biak thangc, hamh e thei Jerameelmei ramv thangc, ham e thei Kenmei lungc bammei ramv thangc tat lana e twna daw the.

¹¹David rui meic kaguayna ta, ntumei ta ni nggaanvmei ta ni swluai ngam the, kum tina Gat thangc guangna David khatni kamei nunc rui sw bammei tei poulou nimei maek khe. David rui Philistinmei kandic khou lungc bammei saanvsaengh tei heikumna sw bam the.

¹²Tiki Akis rui David ta heidikamv lwm the kumna “Kati hei kamei nunc Isaraelmei nunc rui heidikamv karaeng the kum tina kamei kapanty saanvsaengh asiamruai swna bam pwng di the” twna kakhanh the.