Read Rongmei Naga 1 SAMUEL 28 Bible Online

1 SAMUEL 28 - Rongmei Naga bible

1 SAMUEL 28

¹Kaganv asaekc tangv, Philistinmei nunc Isaraelmei ta adow khang kaniw tuang ricmei khuam kaduai the. Kumna Akis rui David khou sa the, “Nang lev nang mei nunc thu abiak thangc adow nina the twmei nang thay the cho.”

²David rui daw the, “Ngguay, ai hei nang tuang siamruaimei e, kumna ai tabui sw ngam cho twmei nang how puni the.” “Gay the! Ai rui nang ta ringh saanv ata gaekmei ricmei khang laalou puni the.”

³Ntaw thu Samuel tei theic kan the, kumna Isaraelmei guay rui kata huay the, kumna katuang kaidai Rama khou mbeihlou the. Saul rui mangmuh nunc ta Isarael khou rui alay ganc the.

⁴Philistinmei rihmei nunc guang kaduaina Shunem kaidai daeng khou zypui sw bam the; Saul rui ni Isaraelmei nunc ta khuam kaduaina Gilboa Chyng khou zypui sw bam the.

⁵Saul tei Philistinmei ricmei nunc ta how pwkhou kamei ping the,

⁶kumna tabui sw nina cho twmei RINGHPOUC khou thanv the. Tiki RINGHPOUC rui kakhou mang khou rui pwni, Urim lev Thummim khou rui pwni, muhzwng nunc khou rui pwni dawlou mak khe.

⁷Khoutei Saul rui katuang meicdaihmei nunc khou tei sa the, “Mangmucpui akhat ta phu tho, ai kata kachuc tat ni the.” “Endor kaidai khou gaanv khat nai e” twna kaniw rui daw the.

⁸Kumna Saul rui kalwn swkalaicna, pheybaan baihmei piu lana, zingbangc gaanv nei ta nduanghna mipui ta kiuc ariw khang tat the. “Bumaengh nunc khou tei thanv lana tabui pat puni cho twmei akhou dinclou o, ai rui kazanc dinhmei bumaengc tei kaw pat ro” twna Saul rui mipui khou tei sa the.

⁹Mipui tei rui daw the, “Guangh Saul rui mangmuh khatni duaih raengh swmei nunc ta Isarael khou rui alay ganc bammei ta nang thay e. Tabui swna nang ata nang phah khou timancna ata swluai khang sw bam tu cho?”

¹⁰Khoutei Saul rui nthukmei latdyng akhat sw the, “Mi khang hei nang ta dandi tii lak ge twmei Ringhmei RINGHPOUC zanc khou rui ai rui latdyng sw the,” twna kamei rui kakhou sa the.

¹¹“Thow ta kaw pat ro twna cho?” twna mipui tei rui thanv the. “Samuel ta” twna kamei rui daw the.

¹²Mipui tei rui Samuel ta how pwkhou, kamei kauc rah ndy thauna “Nang tabui swna ata kumna guat bam tu cho? Nang Guangh Saul diki!” twna Saul khou sa the.

¹³Guangh tei rui kakhou sa the, “Ping riu! Nang tabui how buna cho?” “Kandih bangc thangc rui bumaengh akhat kumei ta how the” twna kamei rui daw the.

¹⁴“Mi kiu kalwn akumh bo?” twna kamei rui thanv the. “Karapouc gaanv khat, thiula saenghmei piuna ku pu the” twna kamei rui sa the. Khoutei, hei tei Samuel the twmei Saul thay the, kumna kamei kandih khou nkhum key the.

¹⁵Samuel rui Saul khou sa the, “Tabui sw khang nang ata swkaguakc bam tu cho? Tabui sw khang nang ata kaw pat bam tu cho?” Saul rui daw the, “Akhang ryanramei tuang daicna nai the! Philistinmei rui ata adow bam the, khatni Ravguangc rui ata ganclou the. Kamei rui akhou muhzwng nunc khou rui pwni, mang khou rui pwni dawlou dat mak khe. Kumhpui zaeng rui ai rui nang ta kaw tina the, ai tabui sw nina cho twmei dinclou o.”

¹⁶Samuel rui sa the, “RINGHPOUC rui nang ta ganclouna nang ta zauczihna bam khou tabui khang nang ata kaw bam tu cho?

¹⁷RINGHPOUC rui nang khou akhou rui dinclou kanmei tei pat bammei tuang di the: kamei rui guanghdih tei nang khou rui laa patna David khou tiilou kan the.

¹⁸Nang rui RINGHPOUC tuang latdanv tei liamna Amalekmei nunc ta khatni kaniw tuang naimei guay tei swmutlou mak khe. Hei zaeng rui RINGHPOUC rui ntaw nang khou mi hei swlou bammei tuang the.

¹⁹Kamei rui nang ta khatni Isaraelmei nunc ta Philistinmei baanc khou tiipatlou puni the. Nthuanh kiu nang khatni nang nac mpouh nunc adaeng khou guang puni the, kumna Isaraelmei ricmei nunc ta tei Philistinmei baanc khou tiipat puni the.”

²⁰Mi dyng khou tei Saul tei kandih khou pun key the. Samuel rui samei tei ping langv lana kamei zingbangc kalaanv tei tu zangv lam makna kapumc suan the.

²¹Mipui tei kadaeng khou guang pwki kamei pingna bam the twmei how lana kamei rui kakhou sa the, “Guanghle, ai apanty maan nimei ta nganvna ping makna nang rui samei tei taanclou kan the.

²²Ntaw thu ai rui samei ni taanclou dat tho. Ai nang tu zangv khang kasiamhlou puni the. Nang nangzaeng tancna tat dat ngam khang tu nina the.”

²³Saul kamei ramhkhat na sini tu lak ge twna sa the. Tiki katuang meicdaihmei nunc rui ni tu khang kata katiu bam the. Kum tina nkhamh khou kamei nuhlouna, kandih khou rui thauna laeng khou thau dungc the.

²⁴Mipui tei rui kameigaymei guaituamchic launa akhat dow key the. Ntyan buay laana khay lou makmei ntyan kasiamh the.

²⁵Kamei rui Saul khatni katuang meicdaihmei nunc khang taektw tei tiipat the, kumna kaniw hei tei tu the. Mi nungc zingbangc tei kaniw tat dat kan the.