Read Rongmei Naga 1 SAMUEL 30 Bible Online

1 SAMUEL 30 - Rongmei Naga bible

1 SAMUEL 30

¹Zaeng neih thumhpui nungc David lev kamei nunc tei Ziklak guang tangc dat the. Mi ganv khou tei Amalekmei nunc Juda tuang dihba biak thangc rihkeyna Ziklag khou adow gut the. Kaniw rui mi kaidai tei mailou the.

²Kumna ntumei guay ta nym tat kan the; meic gaanv khat na ta sini kaniw rui swluai mak ge, tiki meic kaguayna ta nym tat kan the.

³David lev kamei nunc tei guang dat pwkhou kaidai tei mai raw ngamna kaniw nownac nunc ta phungc tat ngam kan khwan the.

⁴David khatni kamei nunc tei kap the, kaniw zaeng maekpui nganvna kap the.

⁵David now nei, Ahinoam lev Abigail Nabal rui maypui tiswloumei Karmelmeipui ta ni nym tat kan the.

⁶David tei mpeyna ryanra the, kalam thu kamei nunc tei kaniw nac nunc amaanmei zaeng rui kaniw lungpuamc the, kumna kata ntauh nkwam khang sw the. Tiki RINGHPOUC kaRacguangc rui kata tibauclou kan the.

⁷Kumna David rui amuh Abiathar, Ahimalek nac mpouh khou tei “Ephod tei akhou laaguang o” twna sa the. Abiathar rui hei tei kakhou laaguang the.

⁸“Ai rui mi rihkeymei nunc ta tei suicna kaniw ta nym dat nuh puni cho?” twna David rui RINGHPOUC khou thanv the. RINGHPOUC rui daw the, “kaniw ta suic tat tho; nang rui kaniw ta nym dat puni kumna nym tat kanmei nunc ta tei kan dat puni.”

⁹Kumna David khatni katuang mei 600 tei kaamc thau the, kumna kaniw Besor duithuak khou guang tangc pwkhou, kaniw meic gaanvsaekc hei khou tei bam duc the.

¹⁰David tei meic 400 ta nduanghna tat key the; baihmei 200 tei thu ryanra langvna Wadi duithuak tei tat kaan ngam makna bam duc kan the.

¹¹David theilay tatmei nunc tei rui Izipmei nac pu gaanv khat ta ramvpuk khou ariwna David khou nduangh guang the. Kaniw rui kakhang taektw asaekc lev dui tii the.

¹²Tadutthai kang lev drakhathai kang chuam kanei ni tii the. Hei tei tulou lana, kazaeng tanc thau the; kamei zaeng neih thumh tu mak zangv makna bam lana khwan the.

¹³David rui kakhou thanv e, “Nang kaipouc thow cho, nang tabui thangc rui guangmei cho?” Kamei rui daw the, “Ai thu Izipmei e, Amalekmei bangc e. Ai nnau tina akaipouc rui ata zaeng neih thumh hu thangc rui ganclou duhmei tuang the.

¹⁴Juda tuang dihba thangc naimei Keretmei kandic khou khatni Kaleb kaikhwang tuang ramv khou rihkeyna Ziklag kaidai mai thoulou duc kan the.”

¹⁵“Mi nunc bamv thangc kiu nang ata nduanghlou nuh dai cho?” twna David rui kakhou thanv the. “Nang rui ata swluai lak ge hamh e thei akaipouc khou tiilou dat lak ge twna Ravguangc zanc khou rui latdyng swlou pw e thei ai nduanghlou nuh de” twna kamei rui daw the.

¹⁶Kumna kamei rui David ta kaniw bamv khou nduangh guanglou the. Philistin khatni Juda khou rui asut guangmei puat heizumei khang tei rui kaniw tuna zangvna ngayna kabamv kathuicna khou kaniw tei chaic lik sikh sik bam khwan the.

¹⁷Nthuanh thauna tinggaanhpui lev David rui kaniw ta adow the kumna tingzyn nganvna adow the. Chabwan meic 400 guaikuan khou tuangcna pak tat kanmei na hamhna kaniw gaanv khat na sini duak mak khe.

¹⁸David rui Amalekmei rui laa tat kanmei meic kaguayna khatni puatc kaguayna kanow gaanv nei tei lev kazauhna laa dat the;

¹⁹ramhkhat na sini amaan mak ge. David rui katuang mei nunc nah mpouh, aluh, khatni Amalekmei rui laa kanmei puat guay laaguang dat the.

²⁰Kamei rui Khouringh khounah guay tei ni laa dat the; kamei nunc rui khouringh khounah guay tei kaniw hu khou gaengc lana “Mi guay hei David tuang the!” twna sa tat bam the.

²¹David thei lay tangh ngam makna Besor duithuak thangc bam duc kanmei meic 200 bamv thangc tei David guang dat the. David ta kamei nunc tei riu pat the, kumna David rui kaniw ta ngangh ariwna neihla sihna ariwpui lat sa the.

²²Tiki David theilay tatmei lungning nthyammei khatni biuh makmei gaanvsaekc rui “Kaniw aniu theilay tat mak ge, asut guang datmei hei kaniw khang khat na sini tii lak ge. Kaniw nownac na ta laana tat dat kan diu” twna sa the.

²³Tiki David rui daw the, “Achana nuncle, Ravguangc rui aniu khang tiiloumei khou hei aniu heikumna sw nuh mak ge! kamei rui aniu ta gaeklou the khatni rihkeymei nunc ruc khou ngammei tiilou the.

²⁴Nangniw rui samei tei meic gaanv khat na sini nuh mak ge. Meic guay na nzanh nchamc nina de: puktaek bamv khou bammei nunc tei lev rihbamv khou tatmei nunc tei nzanh nchamc nina de!”

²⁵David rui mi riak hei kasiamhlou the, kumna Isarael khou hei tei tatna bam the.

²⁶David tei Ziklag khou guang tangc dat pwkhou, asut guangmei puat asaekc kapam nunc, Judamei gaanvthaih nunc khou “RINGHPOUC tuang zauczihmei nunc khou rui asut guangmei kaipat re” twna tii guang the.

²⁷Kamei rui hei tei Bethelmei nunc, Juda tuang dihba thangc naimei Ramamei, Jattirmei,

²⁸Aroermei, Siphmotmei, Estemoamei,

²⁹khatni Rakalmei, Jerameelmei, Kenmei,

³⁰Hormamei, Borashanmei, Athakmei

³¹khatni Hebronmei khang nzanhlou the. Heikumna kamei khatni kamei nunc ruanlou kanmei bamv guay khou tei kamei rui nzanhlou the.