Read Rongmei Naga 1 SAMUEL 31 Bible Online

1 SAMUEL 31 - Rongmei Naga bible

1 SAMUEL 31

¹Philistinmei nunc rui Isaraelmei ta Gilboa Chyng khou adow the. Mi bamv khou tei Isaraelmei meic mpeyna ta dowluai the, baihmei guay, guangh Saul khatni kanac nunc lev kazauhna pak the.

²Tiki Philistinmei rui Saulmei nunc ta adow ranv guangna kanac mpouh gaanv thumh— Jonathan, Abinadab, khatni Malkishua ta dow luai the.

³Saul daeng khou adow guangmei tei ranv sihna guang the, kumna kata ni pailu mpeyna towlou the kumna nzamh the.

⁴Katuang buy-baeng phunghmei nggaanvpu khou tei kamei rui sa the, “Rav ta thay makmei Philistinmei nunc hei rui aruc khou kaniw zaenggay mak khang khatni ata swluai mak khang nang tuang baengsaeng tei satpatna ata dowluai tho.” Tiki mi nggaanvpu tei hei tei sw bauh mak khe. Kumna Saul tei katuang baengsaeng sat patna karana kabung khou ruat the.

⁵Saul theic the twmei nggaanvpu tei how lana kamei ni karana katuang baengsaeng khou ruat lana Saul lev theic nchamc kan the.

⁶Heikumna Saul, kanac mpouh gaanv thumh khatni nggaanvpu tei theic kan the, Saul tuang mei guay tei ni mi nungc tei theic kan the.

⁷Jezreel nzaengc paengc thangc, Jordan neihpat biak thangc bammei Isaraelmei nunc tei Isaraelmei ricmei nunc pak kan the khatni Saul lev kanac nunc ta swluai kan the twmei chu lana, kaniw tuang kaidai guay ta mpatlouna pak kan the. Mi khou tei Philistinmei nunc guangna lungc kan the.

⁸Adow tangna nthuanh thauna Philistinmei nunc theihmei pumc laa khang guang pwki Saul lev kanac gaanv thum Gilboa Chyng khou theiclou bam khwan the.

⁹Kaniw rui Saul py dangv the khatni katuang ricpwan luak the, kumna kaniw tuang ravmaengc khatni meic nunc khou mi gaymei chamv tei dinh khang Philistin kandic kapwm khou latpaumei thouclou kan the.

¹⁰Kaniw rui katuang buy-baeng tei Astarte ravpui kai khou lou kan the, kumna kapumc tei Beth Shan kaidai raengh khou daanclou kan the.

¹¹Philistinmei rui Saul khou taanclou kanmei tei Gilead tuang Jabes khou bammei nunc rui chu pwkhou,

¹²tancbauhmei rihphyan nunc kaamc thauna Beth Shan thangc zingbangc tat thangc the. Kaniw rui Saul khatni kanac nunc tuang pumc tei Beth Shan raengh khou rui laakeyna, Jabes thangc laaguangna hei khou tei mai ntei the.

¹³Mi tangv tei Kaniw rui rou guay tei laana tamuc bang bangc khou mi kaidai khou tei phuplou kan the, kumna zaeng chanei munthiangc the.