Read Rongmei Naga 1 SAMUEL 5 Bible Online

1 SAMUEL 5 - Rongmei Naga bible

1 SAMUEL 5

¹Philistinmei rui Latdyng Khuk tei laana hei tei Ebenezer khou rui kaniw tuang namvdai Asdod khou phungc guangna,

²hei tei kaniw rav Dagon tuang Isaraelmei khou phungc guangna mi ravmaengc daeng khou tei lou the.

³Nthuanh lauthwan thwanzingh thau pwki Dagon maengc tei RINGHPOUC tuang Latdyng Khuk mav khou kandih khou kazaw sow nkhum khuakh khuak key bammei ta Asdodmei nunc tei how the. Kaniw rui hei tei zay thau datna kabamv khou lou dat the.

⁴Nthuanh thau datmei lauthwan ni mi ravmaengc tei Latdyng Khuk hu khou tei kandih khou kazaw sow nkhum khuakh khuak keyna bammei ta kaniw ariw dat the. Hei tei kapy khatni kabaanc kanei tei bau pat ngamna chaengmun daeng khou zip bam khwan the; kapumc dangv na tei kaimun daeng khou lou bam khwan the.

⁵(Kum tina aseic nganvna Dagon tuang amuh nunc khatni mi ta kalummei nunc tei Asdod khou mi bamv khou tei kaniw phay baclou makna kaamc kaanna tat bammei tuang e.)

⁶RINGHPOUC rui Asdodmei nunc ta ranv sihna dandi tii the khatni kaniw ta tipinglou the. Suhdai tipatna kamei rui Asdodmei khatni mi daeng khou lungc bammei ramv guay khou meic nunc ta dandi tii the.

⁷Pat bammei guay ta tei kaniw how lana kaniw kumna sa the, “Isaraelmei Racguangc rui aniu ta khatni aniu rav Dagon ta dandi tii bam di the. Aniu mi Latdyng Khuk hei mi bamv khou lou saengc nuh mak khe.”

⁸Kumna kaniw rui latdiumei thouclouna Philistinmei guangc panguh ta kaw guang kaduaina, “Isaraelmei Racguangc tuang Latdyng Khuk ti hei aniu tabui sw khona cho?” twna thanv the. “Hei tei Gat thangc titat dat ti tho,” twna kaniw rui daw the. Kumna kaniw hei tei Philistinmei namvdai akhat Gat khou laaguang the.

⁹Hei tei hei khou tei guang tangc pwkhou RINGHPOUC rui mi namvdai ta tei ni dandi tiina tiping nraamlou the. Mi namvdai khou maansei alauc, nthyamthauh — meic guayna khou suhdai tipatna dandi tii the.

¹⁰Kum tina kaniw Philistinmei namvdai akhat Ekron thangc Latdyng Khuk tei puanclou dat kan the. Hei tei puanc guang ti khou, “Aniu ta swluai ngam khang Isarael Racguangc tuang Latdyng Khuk hei aniu khou kaniw rui phungc guang bammei tuang di the,” twna kaucna kachin karo thau the.

¹¹Kum tina kaniw Philistinmei guangc guay ta kaw guang datna, “Isarael tuang Latdyng Khuk hei rui aniu ta swluai ngam mak khang mi hei kabamv thangc laaguanglou dat ti di kho” twna sa the. Ravguangc rui kaniw ta ranv sihna dandi tii tina namvdai kapwm khou tei pingmei rui padik the.

¹²Theih makmei nunc tei nganvna suhdai patna kaniw tuang rav nunc rui nkhavlou khang tingpuk nganv kaucku tangc bam the.