Read Rongmei Naga 1 SAMUEL 6 Bible Online

1 SAMUEL 6 - Rongmei Naga bible

1 SAMUEL 6

¹RINGHPOUC tuang Latdyng Khuk tei Philistin kandic khou bw chanei loumei tangv

²Philistinmei nunc rui amuh nunc khatni ravtow amuc nunc ta kawna “RINGHPOUC tuang Latdyng Khuk ti hei tabui sw kho cho? Aniu rui mi hei thouc hanc dat re thei tabui lev tikazauh kho cho?” twna thanv the.

³Kaniw rui kumna daw the, “Isarael Racguangc tuang Latdyng Khuk tei nangniw hanc guang dat re thei nangniw paap khang khaeng khang ramh akhat thu tikazauh mak nuh mak khe. Puatkat kazauhna Latdyng Khuk tei hanc dat nina the. Kum e thei nangniw ta tigaylou dat puni khatni tabui sw tina kamei rui dandi tii bam tu cho twmei thay pat puni.”

⁴“Tabui tuang kaipat tii khona cho?” twna meic nunc rui thanv the. Kaniw rui daw the, “Kachaekc rui kasiamhmei suhdai maengc panguh khatni kachaekc rui kasiamhmei apuakc maengc panguh, Philistinmei guangc panguh pumsing kasiamh tho. Mi ravpyan tei nangniw guayna khou khatni guangh panguh khou tei ni guanglou the.

⁵Kumna nangniw kandih swkamut kamailoumei suhdai khatni apuakc maengc hei kasiamh lana nangniw Isarael Racguangc ta chakhwang sw nina e. Kum ti thei kamei rui nangniw ta, nangniw tuang rav nunc ta, khatni nangniw kandic ta dandi tii nthaekc kho ni nuh e.

⁶Izipmei guangc khatni Izipmei nunc kumcna tabui swna nangniw lung tanc bam nina cho? Ravguangc rui kaniw ta kadakc nganvmei tangv rui kaniw rui Isaraelmei ta titat kanmei tei amuc riu.

⁷Kumna gari thanh khatni guaihpuat lou zat makmei guaituamkui kanei chamdaanv tho. Hei tei gari khou tiphungc tho, kumna kanac kanei ta tei kakai thangc alay gutlou dat tho.

⁸RINGHPOUC tuang Latdyng Khuk tei laana mi gari ruc khou tei lou tho. Nangniw paap khang katloumei tuang kachaekc tuang maengc nunc tei thing khuk akhat khou lou tho. Mi gari ta tei nthaulou ti tho, hei tei karana tat kan di tho.

⁹Hei tei tat kanmei chaeng tei zauc o; hei tei Beth Shemes biak thangc tat kan e thei mi meic pingmei swkamut kamaimei hei Isaraelmei rav rui tii guangmei tuang tina the, tiki kum mak ge thei thu mi ravpyan hei kamei rui tii guangmei tuang hamh e; mi hei karana patmei tuang de twmei aniu thay puni.”

¹⁰Kaniw ta taanc o twna samei tei kaniw taanc the: kaniw rui guaituamkui kanei laana gari tei tiphungclou the, kumna guaih nac nei ta tei kakai khou mbangh binlou kan the.

¹¹Kaniw kachaekc tuang suhdai maengc khatni apuakc maengc loumei thing khuk tei gari khou tei lou the.

¹²Guaihkui nei tei chaengdai khou Beth Shemes biak thangc nzut phutna tat mbiangh dat makna tat kan the. Hei tei kara nrahna tat kan the. Philistinmei guangc panguh tei mi ta tei Beth Shemes ramvrei nganv lay key the.

¹³Beth Shemes meic nunc tei nzaengc khou gehu tay bam khou, kaniw zauc thau pwki Latdyng Khuk tei how the. Hei tei how pwkhou kaniw neihla the.

¹⁴Mi gari tei Beth Shemesmeipu kazanc Joshua twna kawmeipu laupuk khou guang the kumna mi khou tei taudaic akhat daeng khou guang ding the. Meic nunc tei rui gari tuang thing tei kapakc lana khatni guaituamkui nei tei dowluai lana rawna RINGHPOUC khang khaeng the.

¹⁵Levimei nunc rui RINGHPOUC tuang Latdyng Khuk tei khatni kachaekc rui kasiamhmei maengc nei thing khuk tei puanc pat lana taudaic ruc khou tei lou the. Kumlana Beth Shemesmei nunc tei rawna khaengmei khatni baihmei khaengmei RINGHPOUC khang kat the.

¹⁶Philistinmei guangc panguh hei tei zauc lana mi nungc kahak tei Ekron thangc guang dat the.

¹⁷Philistinmei rui kachaekc tuang suhdai maengc, kaniw paap khang khaeng khang RINGHPOUC khang tii guangmei tei Asdod, Gaza, Askelon, Gat, khatni Ekron kaidai guay pumsin e.

¹⁸Kaniw rui kachaekc tuang apuakc maengc ni tii e, mi akhat khat tei Philistinmei guangc nunc rui sin bammei, raengh raengloumei namvdai khatni raengh maekmei namv guay pumsin e. Beth Shemesmeipu Joshua tuang laupuk khou naimei RINGHPOUC tuang Latdyng Khuk mbaengloumei taudaic tei pat kanmei tuang sakhi tei swna ntaw ni nai bam e.

¹⁹Beth Shemesmei nunc rui Latdyng Khuk tei ntyn tina RINGHPOUC rui kaniw meic 70 ta swluai the. RINGHPOUC rui kaniw meic heizumei ta swluai tina meic nunc tei latluna huay the.

²⁰Kum tina Beth Shemesmei nunc rui kumna sa the, “Thow rui RINGHPOUC, nthanmei Ravguangc mav khou ding ngam nina cho? Tabui thangc aniu mi hei thouc ganclou kho cho?”

²¹“RINGHPOUC tuang Latdyng Khuk tei Philistinmei rui hanc guanglou bam dat the. Mi hei keyna laa dat la tho,” twna sa tho twna kaniw rui Kiriath Jearim thangc meic thouclou kan the.