Read Rongmei Naga 1 SAMUEL 7 Bible Online

1 SAMUEL 7 - Rongmei Naga bible

1 SAMUEL 7

¹Kumna Kiriath Jearimmei nunc rui RINGHPOUC tuang Latdyng Khuk tei guang puancna chyngramv khou lungc bammeipu kazanc Abinadab twmeipu kai khou puanclou the. Hei tei zauc bam khang kanac Eleazar ta katgutlou the.

²RINGHPOUC tuang Latdyng Khuk tei Kiriath Jearim khou kaganv tingsaengc sihna tingkwm 20 dou lou the. Mi lungc khou tei Isaraelmei guay tei RINGHPOUC rui nkhavlou khang kaucna huay bam khwan e.

³Samuel rui Isaraelmei nunc khou sa the, “Nangniw lung kapwm rui RINGHPOUC khou hanc guang dat nii e thei rav baihmei guay khatni Astarte tuang maengc tei nangniw ganc nina e. Nangniw RINGHPOUC khou tiigutloupary o kumna kata na kalum o, kum e thei kamei rui nangniw ta Philistinmei baanc khou rui kanlou puni.”

⁴Kumna Isaraelmei nunc tei Baal khatni Astarte tuang maengc guay tei ganc lana RINGHPOUC ta na kalum the.

⁵Khoutei “Isaraelmei guay ta Mizpa khou kaw guang kaduai o, ai rui nangniw khang RINGHPOUC khou huayneylou puni,” twna Samuel rui sa the.

⁶Kumna kaniw Mizpa khou guang kaduai the. Kaniw rui dui zu thauna hei tei bun patna “RINGHPOUC khou paapc taanc dyng the” twna kaniw sa pat the. Samuel tei Mizpa khou Isaraelmei tuang latzanpouc sw the.

⁷Isaraelmei nunc tei Mizpa khou kaduai bam the twmei Philistinmei nunc tei chu pwkhou, Philistinmei guangc panguh tei kaniw mei nduangh lana Isaraelmei ta adow khang kaamc thau the. Isaraelmei nunc tei mi chamv tei chu lana ping the.

⁸Kumna “Aniu ta Philistinmei nunc khou rui kanlou khang RINGHPOUC aniu Racguangc khou huayney tanh tanlou o” twna Samuel khou sa the.

⁹Samuel rui lauziunac akhat laana mi kapwm tei rawna RINGHPOUC khang khaeng the. Kumna Isaraelmei ta nkhavlou khang kamei rui RINGHPOUC khou kalum the, kumna RINGHPOUC rui karavsuai dawlou the.

¹⁰Samuel rui khaengna bam khou Philistinmei nunc tei adow khang guang the; mi dyng khou tei RINGHPOUC rui kaniw ruc khou tingkauh thangc rui ganh key the. Kaniw kasuakc kaguakc the kumna kaluang nraamna pak the.

¹¹Isaraelmei guay tei Mizpa khou rui patna Philistinmei nunc ta Bethkar daeng nganv alay key the, kumna chaeng saanv tei dow key the.

¹²Khoutei Samuel rui Mizpa lev Shen kak khou ntauh lingclouna “RINGHPOUC rui aniu ta chaeng saanvsaengh nkhavlou the,” twna sa the, kumna kamei rui hei tei “Nkhavloumei Tauc” twna phuaklou the.

¹³Kumna Philistinmei nunc ta ngamlou the. Samuel ringc bam saanv Isaraelmei ruc khou rih key dat mak khang RINGHPOUC rui kaniw ta thingclou kan the.

¹⁴Philistinmei rui laa kanmei Ekron khatni Gat kak khou naimei namvdai guay tei Isarael khou hanclou dat the, kumna Isaraelmei tei kaniw tuang ramv guay laa dat the. Isaraelmei lev Kanaanmei kak khou nchu-nzaenghmei ni nai dat the.

¹⁵Samuel kamei ringh saanv Isarael ta sinna lungc khwan e.

¹⁶Tingkwm pum kamei Bethel, Gilgal, khatni Mizpa khou tat lianglouna latlu patmei ta latzan sw tat bam khwan e.

¹⁷Mi tangv kamei kakai Rama khou guang datna kamei latzanpouc sw bam khwan e. Kamei Rama khou RINGHPOUC khang ravchabamv kasiamh thau khwan e.