Read Rongmei Naga 1 SAMUEL 8 Bible Online

1 SAMUEL 8 - Rongmei Naga bible

1 SAMUEL 8

¹Samuel kamei gaanvthaih key pwkhou, kamei rui kanac nei ta Isarael khou latzanpouc tiswlou the.

²Nareimeipu zanc tei Joel khatni alaucmeipu zanc tei Abija twna kaw e; kaney tei Beersheba khou Latzanpouc nei sw bam khwan e.

³Tiki kaney tei kaney pu ta layluih mak khe; kaney tei syan khang na lungh gut the, kumna kaney lanvbiwmei laa the kumna lungning nthanna latzan sw mak khe.

⁴Khoutei Isaraelmei kapy guay kariuna Samuel daeng thangc Rama khou guang the.

⁵Kaniw rui kumna sa the, “Zauc lo, nang thu gaanvthaih guang the, nangnac nei hei nang thei lay mak khe. Kum thena aniw ta sin khang guangh kadahlou tho; baihmei kandic nunc kumcna aniw ni guangh nai nii the.”

⁶Kaniw rui guangh neymei tei Samuel neihla mak khe; kumlana kamei rui RINGHPOUC khou huayney the.

⁷RINGHPOUC rui kumna sa the, “Meic nunc rui nang khou samei kaguayna tei nking o. Kaniw rui nang ta laa nii makmei tuang hamh e; Kaniw rui ata kaniw guangc swmei ta laa nii makmei tuang de.

⁸Ai rui kaniw ta Izip khou rui kaw patlou khou tei rui thauna, kaniw akhou rui tat patna rav baihmei ta kalum tat kan the. Kaniw rui akhou sw guangmei tei ntaw nang khou swloumei tuang the.

⁹Hei zaeng rui, kaniw rui samei tei nking o, tiki kaniw guangc rui kaniw ta akumhna sin puni cho twmei thu dinc nthanlou tio.”

¹⁰Samuel rui kakhou guangh ney bammei nunc khou tei RINGHPOUC rui kakhou saloumei guayna tei salou the.

¹¹Samuel rui kaniw khou sa the, “Guangh rui nangniw ta sin nimei kiu kumna sin puni the. Kamei rui nangniw nac nggaanvmei nunc ta rihmei tisw puni the; gaanvsaekc rui rih gari khou, gaanvsaekc rui takuanh ricmei khou taanvtaanc puni the, khatni baihmei asaekc rui katuang gari mav khou pak tat puni the.

¹²Kamei rui gaanvsaekc ta meic 1000 ta phunghmei, khatni baihmei gaanvsaekc ta meic 50 ta phunghmei tiswlou puni the. Nangniw nac mpouh nunc rui katuang lau suakmei, lau taymei, katuang rihna kasiamhmei khatni katuang gari na kasiamhmei sw puni the.

¹³Nangniw nac aluh nunc tei kakhang rui mwndui thauc kasiamhmei, kanapgan suanghmei khatni ntyan kasiamhmei sw puni the.

¹⁴Kamei rui nangniw tuang gayliang liangmei laupuk guay, drakhalau guay khatni Olive ding guay tei laana katuang meicdaihmei nunc khang tii kan puni the.

¹⁵Kamei rui nangniw tuang nap-bi khatni drakhathai tei kadam ruh khou akhat guangh kai khou meicdaihmei nunc khatni baihmei meicdaihmei nunc khang laa puni the.

¹⁶Kamei rui nangniw tuang bangc nunc, gayliang liangmei guaic nunc, khatni kuanniam nunc ta tei laana mi guay ta tei katuang taanv titaanc puni the.

¹⁷Nangniw tuang lauziu tei ruh khou akhat laa puni the. Nangniw kahak ni kabangc sw puni the.

¹⁸Hei kumhmei ganv kiu guang pwkhou nangniw rui kadahmei guangc zaeng rui nangniw kap puni the, tiki hei tei RINGHPOUC rui chulou dat lak khe.”

¹⁹Samuel rui samei ta tei meic nunc tei nkinglou dat mak khe, kumna sa the, “Aniw ruc khou guangh swlou khang guangh kahaw rap di the,

²⁰aniw ni zaatc baihmei nunc kumcna aniw guangc rui aniw ta sinmei khatni aniw ta rih khou zaylouna rih adow tatmei ta laa nii the.”

²¹Kaniw rui samei kaguayna tei Samuel nking lana kamei rui RINGHPOUC khou guangna raclou the.

²²“Kaniw rui kahawmei kiu taanclou ti tho, kaniw khang guangh kiu tiilou ti tho,” twna RINGHPOUC rui daw the. Mi tangv tei Samuel rui Isaraelmei kaguayna ta tei kaniw kai hanc dat khang sa the.