Read Rongmei Naga 1 SAMUEL 9 Bible Online

1 SAMUEL 9 - Rongmei Naga bible

1 SAMUEL 9

¹Lungcgaymei khatni kalat tatmei kazanc Kis twna kawmeipu Benjamin kaikhwangmei gaanv khat nai khwan e. Kamei tei Abiel nac, khatni Zeror tou, Bekorat puinacmei, Aphia mpouhlangmei e.

²Kanac mpouh kazanc Saul kawmei nggaanv karesemei, kalwn kachav gaymei gaanv khat nai khwan e. Saul twmeipu hei Isarael khou naimei nggaanvmei guayna pang khou rui ding ri taph tapmei kalwn kachav gaymeipu khwan e.

³Khoutei Kis tuang kuanniam asaekc ruan maan tat kan khwan e, kum tina kamei rui Saul khou sa the, “Bangh gaanv khat ta nduanghna kuanniam nunc ta tei phu tat tho.”

⁴Kaney tei Ephraim tuang chyngramv khatni Shalisa ramvgei khou ruan likna phu the, tiki phutow mak khe. Kumna kaney Shaalim ramvgei khou ruan key the, tiki khou tei ni kuanniam nunc tei bam mak khe. Kaney Benjamin ramv lungc khou ni tat ruan guang the, hei khou tei ni phutow mak khe.

⁵Kaney Zup ramv khou guang pwkhou, Saul rui kabangcpu khou sa the, “Anei kai hanc dat kan di kho, apu tei kuanniam khang kakhanh taanna anei khang lungh ryanra bam dat pwng the.”

⁶Banghpu tei rui kumna daw the, “Nkhwan o, mi kaidai khou hei Ravguangc ngamv naimeipu gaanv khat kamei rui saloumei nchumh raph rap tina chakhwang sw sihna bammeipu gaanv khat nai e. Anei kadaeng thangc tat zauc kho, kuanniam nunc tei tabui thangc ariw puni cho twmei kamei rui dinclou kho ni nuh e.”

⁷“Anei kadaeng thangc tat re thei anei kakhang tabui tii nicho? Anei tuang napkouc khou ni tu zangvmei tuang ni ramh maek khe, kumna kakhang tii khang ni ramhkhat na sini maek ge, kiuc hamhna cho?” twna Saul rui sa the.

⁸Banghpu tei rui sa the, “Akhou daandi paek kadouh akhat nai e. Ai hei tei kakhang tii nuh de, kum e thei anei kuanniam nunc ta tei ariw puni cho twmei dinclou pwng e.”

⁹Kahu nungc Isarael khou Ravguangc khou lat thanv khang tatmei guay rui Aniu howmeipu daeng thangc tat kho twna sa bam khwan e kalam thu muhzwng ta kahu nungc “Howmeipu” twna kawbam khwan e.

¹⁰“Gaymei lat di the tat di kho” Saul rui daw the. Kumna kaney rui Ravguangc ngamv naimeipu daeng thangc tat khwan e.

¹¹Kaney mi kaidai khou tei ngangh pwki dui zu khang patmei tunac gaanvsaekc ta ariw the. “Howmeipu kiu bam dai cho” twna tunac nunc khou tei thanv the.

¹²Kaniw rui daw the, “Ngguay, kamei nangney hu khou na ngangh kan the.” Katumc tho ntaw na hei mi tuang kaidai khou meic nunc tuang ravchabamv khou khaengmei tuang nai tina guanglou duc e.

¹³Nangney namvdaih khou gutpui lev, ravchabamv thangc tu zangv khang ngangh mak khou kata ariw rap puni the. Kamei guang mak saanv kawguangloumei nunc tei tu thau ni tuang hamh e, kalam thu khaengmei puat khou tei kamei rui suaihiamlou nina e. Mi tangv kaw guangmei nunc tei tu khang e. Ntaw ngangh tho kata ariw rap puni the.

¹⁴Kumna Saul tei kabangcpu lev kaney kaidai thangc tei gut the, kumna kaney gut pwki Samuel tei kalummei bamv thangc tat khang pat pumei ta ariw the.

¹⁵Saul guang nimei neihkhat ahuna RINGHPOUC rui Samuel khou tithaylou the.

¹⁶“Nthuanh kiu mi kumhmei ganv khou hei ai rui nang khou Benjamin kaikhwang khou rui gaanv khat thouc guang puni; kata amei Isaraelmei nunc tuang dihsinpouc khang thauh teylou tho, kumna kamei rui Isaraelmei ta Philistinmei nunc baanc khou rui kanlou puni. Amei nunc rui ryanra bammei ta ai how the khatni nkhavlou khang kapna huay bammei ta ai chu the.”

¹⁷Samuel rui Saul ta how pwkhou RINGHPOUC rui kakhou kumna sa the, “Ai rui nang khou saloumeipu kiu mi hei the. Kamei hei amei nunc tuang dihsinpouc sw puni the.”

¹⁸Khoutei raenghmun daeng khou bammei Samuel khou tei Saul rui “Howmeipu kiu tabui thangc bamna cho?” twna thanv the.

¹⁹Samuel rui daw the. “Howmeipu kiu ai the kalummei bamv thangc tei nang tat hu tho. Nangney aseic hei ai lev tu nchamc puni the. Nthuanh lauthwan kiu ai rui nangney thay niimei guay kiu dinclouna thouclou dat puni the.

²⁰Zaeng neihthumh hu thangc amaan kanmei kuanniam nunc khang tei thu lungh geih dat ri tho; hei tei phutow dat tang kan the. Tiki Isaraelmei nunc rui kahaw liangmeipu kiu thow cho? Mi kiu nang the, nang khatni nang pu kai kaikhunc ta the.”

²¹Saul rui daw the, “Ai hei Isarael kaikhwang nthyam liangmei Benjamin kaikhwangmei e, khatni akai puinac hei mi kaikhwang khou nkhiw liangmei e. Kum ki, tabui swna nang rui mi kumhmei lat hei akhou sa bam tu cho?”

²²Khoutei Samuel rui Saul lev kabangcpu ta tei kainung thangc nduangh gutna kaw guangmei gin gaanv 30 dou dungc bammei kuakpaeng khou kaney ta bamvpy khou tidungclou the.

²³“Laa pat langclou o twna ai rui nang khou tiilou kanmei zancbangv tei laa pat tho,” twna Samuel rui langdicmeipu khou sa the.

²⁴Kumna langdicmeipu tei rui kanaeng thuat gay liangmei zanc tei laa patna Saul hu khou mbaenglou the. Samuel rui sa the, “Zauc tho, mi hei nang khang loumei zanhbangv the. Mi hei tu tho. Mi hei rui kaw guangloumei mei nunc lev ntaw tu nchamc khang ai rui damcloumei nang dam the.” Mi nungc tei Saul tei Samuel lev tu nchamc the.

²⁵Kaniw kalummei bamv khou rui kaidai khou tei key dat khou, kaniw rui Saul khang kainam khou laeng kasiamhlou the,

²⁶kumna kamei mi khou tei ziplou the. “Thau tho, ai nang chaeng suanclou puni the,” twna tinggaanc pat pwkhou Samuel rui Saul ta kaw the. Saul tei zip thauna Samuel lev chaengdai akhat khou tat pat the.

²⁷Kaney kaidai tin pat pwkhou “Nang bangcpu ta tat hu tho tu ti tho,” twna Samuel rui Saul khou sa the. Banghpu tei tat hu kan the, kumna Samuel rui sa the, “Matat akhat mi khou hei nthaekclou o, Ravguangc rui samei ai nang khou dinclou puni.”